Jehová tä ngite kite ta mäbiti ye mike era jai

1, 2. ¿Nita ja töi kwite bokän ye ngwane Jehová tä dre nuainne? ¿jata nemen ruin ño nie? (Üai kena).

DAVID ja mikani ngite krubäte ye nämäne töi nike (Sal. 40:12; 51:3; encabezamiento). Akwa, David ja töi kwitani brukwä tätebiti ye ngwane Jehovakwe ngite kitani tabiti ye nämäne gare ie (2 Sam. 12:13). Akwa Jehovakwe ngite kitani ta Davidbiti ye nükani gare kwin ie ye ngwane, töi namani jäme aune kä juto namaninta kwe (Sal. 32:1).

² Ni töi raba nementa jäme aune kä juto raba nementa nikwe arato. Nita ja töi kwite aune ja driere bätä ja di ngwanta ñaka kukwe blo ye nuainenta mada ye ngwane,Jehová tä ngite kite ta nibiti kukwe käme krubäte nuainta yebiti ta ye tä ni töi mike jäme (Prov. 28:13; Hech. 26:20; 1 Juan 1:9). Jehová tä ngite kite ta nibiti ye ngwane, tä käi kwitekä täte jabiti aune ni ñan ja mikabare ngite jire kwrere tä ni mike tuin jai ye tä ni töi mike jäme (Ezeq. 33:16).

3, 4. ¿Ja namani ruin ño Jennifer ie? ¿Drebätä ja kitai kukwe ja tötikara nebätä?

³ Jehovata ngite kite ta nibiti ye ruäre ngwane ñan raba nemen nuäre ni kräke mikakäre era jai. Ñodre, kukwe ye erere namani bare Jenniferbätä ye ani mike gare jai. Niara tä niere: “Ti rün bätä ti meye testiko akwa ti nämä bati ngwane ti ñan jataba ja ngwen kwin aune ti nämä kukwe blo nuainne yebätä tikwe kämikakaba Jehovabätä”. Kä nikani ta ye bitikäre, niara jataninta Jehová kokwäre aune kä ruäre te ja ngökani ñöte kwe. Niara tä niere: “Ti tö nämä jondron tuin kabre jakwe, ti nämä ja mike gure ngwarbe. Ti nämä dö ñain krubäte aune ti töi käme krubäte. Tikwe ja töi kwitani aune kukwe blo ye tuanimetre aune Jesukwe ja nire biani ti ütiäre ye köböire Jehovakwe ngite kitani ta tibiti ye nämä gare tie akwa ti brukwä ye ñan nämä ti tuenmetre kukwe ye kai ngäbiti”.

⁴ Nikwe ja mikani ngite ye Jehovakwe kitanina ta nibiti akwa ni töi ñan kukwe ye mike era jai ngwane, Jehová ni mikaka tuin bobre jai aune tä ngite kite ta nibiti nämäne gare David ie ye erere nikwe mikadre tuin jai. Jehová tä ngite kite ta nibiti ye tädre gare nie ye ñobätä ütiäte krubäte aune dre raba ni dimike kukwe ye mikakäre era jai yebätä ja kitai kukwe ja tötikara nebätä.

JEHOVÁ TÄ NGITE KITE TA NIBITI MIKADRE ERA JAI YE ÑOBÄTÄ ÜTIÄTE KRUBÄTE

5. ¿Nikwe dre mikadre era jai ie Satana tö? ¿Bämikata kukwe medenbiti?

⁵ Jehová tä ngite kite ta nibiti ye era ni kräke ngwane ni ñaka rakai kä okwä Satanakwe yete. Ñobätä ñan aune Satana tä kukwe ñokwä nuainne ni nötakäre tibien ne kwe nikwe Jehová tuadremetre ye nikwe ngwandre törö jai. Brare iti Corintio käkwe ja mikani ngite krubäte yebätä ani töbiketa. Niarakwe ja töi kwitani aune kukwe blo ye tuanimetre kwe (1 Cor. 5:​1, 5, 13). Akwa, ja mräkätre ñan ngite kitadre tabiti aune ñaka kadre ngäbiti ta konkrekasionte ye ie Satana tö namani. Kukwe ye erere rabadre bare ni ja mikaka ngite yebätä ngwane, niarakwe ja mikani ngite krubäte aune ñaka ngite kita raba ta jirebiti ye rabadre ruin ie aune yebätä rabadre ulire krubäte aune kämikadrekä kwe Jehovabätä. Ye köböire Satana töi nämä dre nuainbätä ye erere rabadre bare ie. Nengwane Satana töi täbe kore, akwa niara tä sribire ño ye garera nie (2 Cor. 2:​5-11).

6. ¿Ja ñan rabadre ruin ngite jankunu nie yekäre dre raba ni dimike?

⁶ Jehovata ngite kite ta nibiti ye rabai era ni kräke ngwane, ja ñan raba ruin ngite jankunu nie. Nita ja mike ngite krubäte ye ngwane ni töi tä ni nike ye nierare aune kwin krubäte (Sal. 51:17). Ñobätä ñan aune raba ni dimike kukwe kwin nuainne (2 Cor. 7:​10, 11). Nita ja töi kwite akwa ja tädre ruin jankunu ngite nie ye ngwane, raba ni di gainkä. Jehová tä ngite kite ta nibiti ye tädre era ni kräke ngwane, nikwe kukwe blo nuainbare ye ñaka ngwainta törö jankunu jai. Aune ye köböire ni töi täi jäme, ni täi kä jutobiti aune sribidi Jehová kräke niara tö ie ye erere (Col. 1:​10, 11; 2 Tim. 1:3). Jehovakwe ngite kitanina ta nibiti ye rabadre era ni brukwä aune ni töi kräke yekäre dre raba ni dimike ye ani mike gare jai.

¿JEHOVAKWE NGITE KITANINA TA MÄBITI YE DRE RABA MÄ DIMIKE MIKA ERA JAI?

7, 8. ¿Jehovakwe blitabare ño jabätä Éxodo 34:​6, 7 yete, kukwe ye tä dre mike gare metre nie?

⁷ Jehovakwe blitabare ño jabätä yebätä töbike. Ñodre, ja mikani tuare kwe Moisés ie ngutuä Sinaibiti ye ngwane yebätä töbikea (Ñäkädre Éxodo 34:​6, 7 yebätä).b Kukwe keta kabre Jehová raba niere jabätä akwa metrere ja töi mikani kwe kukwe ne niere: “Ti Jehová abokän Ngöbö ni mike tuin bobre jai aune moto kwin”. Ye medenbätä ni niara mikaka täte aune tä ja töi kwite kukwe blo nuainta kwe yebätä ye, ¿niara ñan raba mike tuin bobre jai ya? Jehová ie ñaka ni ruentari tare aune tä kukwe tare nuainne nibätä ye nie ñaka raba jire chibätä.

⁸ Jehová ni mikaka tuin bobre jai ye rabadre era ni kräke, ñobätä ñan aune niara kukwe metre niekä (Sal. 31:5). Akwa, jämi ngite kite ta mäbiti ruin mäi ngwane, töbike kukwe nebätä. Jehová ni mikaka tuin bobre jai aune niré niré tä ja töi kwite aune kukwe blo tuenmetre yebiti ta tä ngite kite. Aisete niarakwe ngite kitai ta mäbiti ye tädre gare metre mäi.

9. ¿Jehová tä ngite kite ta ño nibiti ye Salmo 32:5 tä mike gare ño nie?

⁹ Jehovata ngite kite ño ta nibiti ye Biblia tä mike gare yebätä töbike. Ñodre, Davidkwe niebare Jehová ie: “Tikwe ja mikaba ngite aune kukwe ranteba tie ye mäkwe juanba ta tibiti” (ñäkädre Salmo 32:5 yebätä).c Ngite kitata ta ye kwitata hebreore ngwane “ngwandre”, “kadrekä kwin” meden gärätä arato. Ye medenbätä Jehovakwe ngite kitani ta Davidbiti ye ngwane, tribe doboko kaninkä niara kötärä aune jä nikani kwe. Yebätä ja namani ruin kwin aune kä jutobiti ie (Sal. 32:​2-4). Ye erere arato nita ja töi kwite aune kukwe blo tuenmetre ye ngwane ja raba nemen ruin David ye erere nie. Ni ñan niena ngite Jehová kräke ñobätä ñan aune ngite nibätä ye kaninkä kwe aune jä nikani mento kwe ye kwrere.

10, 11. ¿Salmo 86:5 ye tä dre driere Jehovabätä nie?

¹⁰ (Ñäkädre Salmo 86:5 yebätä).d Jehová tä “juto biare ngite juankäre ta” nibiti niebare Davidkwe. Tärä keteiti tä kukwe mike gare bäri Bibliabätä yete ngite kitata ta ye Jehová töi nierare kore. Ni ngite akwa tä ja töi kwite yebiti Jehová tä juto biare ngite kitakäre tabiti, ¿ñobätä tä nuainne? Bersikulo ja känenkäre tä mike gare: “ni jökrä kätä mä kärere ye tare metre krubäte mäkwe”. Rababa gare nie kukwe ja tötikara känebätä erere, niré niré tä Jehová tarere ye Jehová tä tarere metre aune kärekäre. Aune ja tare ye köböire niré tä ja mike ngite ye niara tä juto biarebe ngite juankäre tabiti (Is. 55:7). Jehová tä ngite kite ta mäbiti ye ñan nemen era mä kräke ngwane, töbike kukwe nebätä: “Jehová tä juto biarebe ngite kitakäre ta niré tä ja töi kwite aune tä ja mike bobrebätä ye jökräbitita ye gare tie. Ye erere arato Jehovata ngite kite ta tibiti ye rabadre era ti kräke”.

¹¹ Nierare ni töi ngite aune ni sribebare ño ye nüke gare kwin Jehovai mikata gare Bibliabätä ye tä ni töi mike jäme (Sal. 139:​1, 2). Kukwe ne mikakäre gare bäri nguseta jai ani ja kite salmo tikani keteiti Davidkwe yebätä yekwe ni dimikadi mike gare jai Jehová tö ngite kitai ta nibiti.

DRE TÖRÖ JEHOVAI YE AIBE NGWEN TÖRÖ JAI

12, 13. Salmo 103:14 tä mike gare erere, ¿dre törö Jehovai aune ye tä töi mike dre nuainne?

¹² (Ñäkädre Salmo 103:14 yebätä).e “Ni abokän dobro” ye törö Jehová ie niebare Davidkwe. Nita ja töi kwite bokän ngwane Jehová tä juto ngite kitakäre ta nibiti ye nemen gare nie kukwe nebiti: ni ngite ye käre törö ie. ani töbiketari bäri bersikulo nebätä.

¹³ Ni sribebare ño ye gare kwin Jehovai niebare Davidkwe. Niarakwe Adán sribebare dobrobiti yebätä kukwe ruäre nita ribere nuainkäre ñodre, mröre, murie jäke, kümien ye nüke gare kwin Jehová ie (Gén. 2:7). Adán aune Eva sribebare dobrobiti ye erere ni kite jatäri akwa niaratrekwe ja mikani ngite ye köböite mada, ni jatani därere ngite jatäri yebätä ni töi niera kukwe blo nuainbätä. Akwa, ni ngite gare Jehovai ye ñan aibe niebare Davidkwe, ñakare aune törö ie niebare kwe. Salmo 103:14 yekänti “törö ie” ye kwitata kukwe hebreobiti ngwane, kukwe ye tä Jehová töite ye ñan aibe, ñakare aune ye köböire niara tö kukwe kwin nuainbätä. Aisete bersikulo nebiti nüke gare nie ni töi ngite yebätä kukwe rainte nie ye nüke gare Jehovai. Akwa, nikwe ja töi kwitai aune kukwe blo ye tuainmetre ngwane, niara töi rabai ni mikabätä tuin bobre jai aune ngite kitai ta nibiti kwe (Sal. 78:​38, 39).

14. a) ¿Salmo 103:12 ye tä dre mike gare nie Jehová tä ngite kite ta ño nibiti yebätä? b) ¿Kukwe namani bare Davidbätä yebiti Jehová tä ngite kite täte nibiti aune tä käi kwitekä jabiti ye nemen gare ño nie? (Recuadro “Jehová tä ngite kite ta nibiti aune tä käi kwitekä täte jabiti” ye mikadre ñärärä).

¹⁴ ¿Jehovata ngite kite ta nibiti ye Salmo 103 tä dre mada mike gare nie? (Ñäkädre Salmo 103:12 yebätä).f Ngite nikwe ye Jehová tä mikekä “kä kädrikri tä mente krubäte jai kä nidrinkri yebätä, ye kwrere”, niebare Davidkwe. Metrere kä känti ñänä tä niken nekä dere ye tä mente jai ye kwrere arato Jehová tä ngite nikwe ye mikekä mente krubäte nibätä. ¿Dre nemen gare nie? Ni ja kitakä Bibliabätä käkwe niebare krörö: “Ngite nikwe jänta niken mende krubäte, yebätä kukwe ñaka jire raba ngwenta törö” (El tesoro de David, de Charles Spurgeon, volumen 2, traducción de Samuel Vila). Aune kukwe ñaka jire raba ngite nikwe ye ngwenta törö Jehovai ne kwe niarakwe ngite ye ngwandre törö nie (Ezeq. 18:​21, 22; Hech. 3:19).

15. ¿Ja täbe ruin ngite nie ye ngwane dre nuaindre?

¹⁵ Ja ruin ngite jankunu mäi ye ngwane mäkwe töbikatari Salmo 103 yebätä yekwe mä dimikai krubäte. Mäkwe ngwantari jai: “Ti ngite ye törö Jehovai akwa yebiti ta tita ja töi kwite ngwane tä juto biare ngite juankäre ta tibiti, ¿ñobätä ti ñan ja töi mike siba kore? Tikwe ja mikani ngite ye Jehovakwe käi kwitaninkä täte jabiti aune ñaka ngwenta törö tie, ¿ñobätä ti ñan nuainne kore arato?”. Mäkwe ja mikani ngite yebätä Jehová ñaka töbike, ¿se ño amarebiti mäkwe nuaindre? (Sal. 130:3). Jehovakwe ngite kitanina ta nibiti rabadre era ni kräke ye ngwane, rabai bäri nuäre ngite kitakäre ta jabiti nie aune kukwe ye käi kwitakakäre jabiti.

16. ¿Töbikadre krubäte ja mikani ngite kirabätä ye ñobätä ñaka kwin? (Üai mikadre ñärärä).

¹⁶ Töbike kukwe nebätä. Ni iti tä karo ngwen ye raba nikren nuai tä karo dokwäte (retrovisor) yebätä. Ye köböire dre jatadre jiebiti o kukwe tare ñan raba nemen barebätä ye kräke. Akwa, ni ye töi kwekebe ökwä nuai yebätä ngwane raba rüaine tare ñobätä ñan aune dre tädre ja känenkäre ye ñan gai kwe yebätä. Ye erere arato nikwe ja mikani ngite ye ni raba ngwenta törö jai ruäre ngwane ye kwin, ñobätä ñan aune ye köböire nikwe ñaka ja mikaita ngite bobukäreta. Akwa, nikwe töbikai jankunu kukwe yebätä ngwane, raba ni dikainkä aune ni ñan sribidi Jehovata ribere nie ye erere. Ye medenbätä nikwe ja töi mike kwatibe sribire kä jutobiti Jehová kräke aune töbikadre kukwe käbämikata kwe nie ja känenkäre bätä: känti kukwe blo ye ‘ñaka rükaita jire ni brukwäte’ (Is. 65:17; Prov. 4:25).

JEHOVAKWE MÄ TARE YE MIKE ERA KÄRE JAI

17. ¿Jehovakwe ni tare aune tö ngite kitai ta nibiti ye ñobätä nikwe mikadre era jankunu jai?

¹⁷ Ni jökrä tare Jehovakwe aune tö ngite kitai ta nibiti ye nikwe ja di ngwandre mike era jai (1 Juan 3:​19, nota). Ñobätä ñan aune ni ñaka tare Jehovakwe aune ñan tö ngite kitai ta nibiti ye nikwe mikadre era jai ie Satana tö. Kukwe ne erere Satanakwe nuaindi jankunu ñobätä ñan aune kä kitera braibe käne ye gare ie yebätä. Aisete töita kwatibe mä töi gatebätä (Apoc. 12:12). ¡Akwa ñaka ja tuametre ngökadre ie!

18. ¿Jehovakwe mä tare aune ngite kitanina kwe mäbiti ye dre raba mä dimike mike era jai?

¹⁸ Jehovakwe mä tare ye rabadre era mä kräke ye rababa gare nie kukwe ja tötikara känebätä. Aune nikwe dre nuaindre ne kwe Jehová tä ngite kite ta nibiti rabadre era ni kräke, nibi gare nie kukwe ja tötikara nebätä. Jehová tä ngite kite ta nibiti ye ngwane tä nuainne ño ye mikani gare kwe tä tikani Bibliabätä yebätä töbikadretari jankunu. Ni töi ngite ye nüke gare ie aune tä ni mike tuin bobre jai. Bätä niara tä ngite kite ta nibiti ye ngwane, tä käi kwitekä täte jabiti ye ngwandre törö jai. Nikwe kukwe ne erere nuaindi jökrä ngwane, Davidkwe kukwe niebare ne erere nikwe niedi: “¡Tikwe ja mikaba ngite aune kukwe ranteba tie ye mäkwe juanba ta tibiti, tä debe ere Jehová!” (Sal. 32:5).