¿Diablu ye tärä ya?
Biblia tä kukwe ye mike gare
Jän, Diablu ye abokän bökän, niara abokän ni üaire abokän käkwe ja töi mikani blo aune ja mikani kwe Ngöbö rüere. Metrere, “diablu ara tä kä tibien ne gobrainne” (Juan 14:30; Efesios 6:11, 12). Biblia tä diablu kädeke bätäkä ngwarbe mikakäre gare diablu ye abokän ño. Kädekata ño ye ani mike ñärärä ruäre:
Satana, ye abokän ni ja mikaka “Ni Mada Rüere” meden gärätä (Job 1:6).
Diablu, ye abokän ni “Ni kukwe Ngwarbe Niekä” meden gärätä (Revelación [Apocalipsis] 12:9).
Tbi, ye abokän Bibliabätä ni ni ngökaka meden gärätä (2 Corintios 11:3).
Ni nuatekä (Mateo 4:3).
Ni ngökaka (Juan 8:44).
Niara ñaka kukwe käme bämikaka aune ñaka ni jökrä töi käme bämikaka
Nitre kwati tä nütüre Diablu ye abokän kukwe käme bämikaka o ni jökrä töi käme bämikaka. Ne madakäre, bati Ngöbökwe blitabare Diablube ye Biblia tä mike gare. Akwa Ngöbö abokän töi metre aune deme kukwe jökrä bitita. Aisete, ¿se ño raba ja ngwen käme? (Deuteronomio 32:4; Job 2:1-6.) Aune, ¿Diablu käkwe Jesús, töi metre nuaninte bätä Biblia tä blite yebätä dre nie raba? (Mateo 4:8-10; 1 Juan 3:5.) Biblia tä driere nie Satana ye bökän aune ñaka kukwe käme bämikaka jerekäbe.
Nitre kwati tä nütüre Diablu ye abokän ñan bökän. ¿Kukwe ne rabadre ni töi mike niä? Ñakare jire chi, ñobätä ñan aune Biblia tä mike gare nie Satana tä kukwe ñokwa nuianne nitre ngökakäre (2 Tesalonicenses 2:9, 10). Aune kukwe keteitibiti tä nitre ngökö ye abokän niara ñan bökän ye nitrekwe nütüdre ie tö (2 Corintios 4:4).
Kukwe ruäre ñan metre Diablubätä
Ngwarbe: Diablu ye kädekata Lucifer.
Metre: Kukwe hebreo kwitata Biblia ruärebätä “Lucifer” ye abokän “trä ngitiekä” gärätä (Isaías 14:12). Kukwe ne tä profecía keteitibätä, aune contexto tä mike gare ye blitata nitre gobranka jatäri Babilonia yebätä, abokän Ngöbökwe ngwain ja gaire bikabätä kri (Isaías 14:4, 13-20). Profecía nebätä, reitre babilonio ganinte ngwane, kädekata kötare kwärä “trä ngitiekä”.
Ngwarbe: Diablu ye tä sribire Ngöbökrä.
Metre: Diablu ye abokän Ngöbö rüe, ñaka niara mikaka täte. Arato ni Ngöbö mikaka täte ye rüe, yebätä tä ja mike rüere aune kukwe ngwarbe niere bätätre (1 Pedro 5:8; Revelación 12:10).