Kukwe kira 111
Monso chi nikani küben
¡MIKE ñärärä! ¿Dreta nakainkä nete? ¿Monso chi tuin tibien yebätä dre namani bare? ¡Ni iti kite tuin jubäre ye Pablo! ¿Timoteo tuin yete mäi arato? ¿Monso ye betaninkä timon?
Jän, ye erere namani bare. Pablo nämene kukwe kädriere nitre ja tötikaka kräke Troas känti. Niarakwe ñaka nitre ye tuaita jötrö ngwarbe nämene gare ie, ñobätä ñan aune jädrinaine rikadreta rute kä madakänti. Aisete blitabare kwe nememe kä ruäre deu.
Monso ye kädeka nämene Eutico, nämene täkäni bentana yete, aune nikani küben. ¡Niara nämene mente kwin bentana yete abokän betaninkä timon! Yebätä nitre tuin töbike krubäte nete. Nitre käkwe monso ye ganinkrö angwane, ¡nämene ngwakare!
Monso ye nämene ngwakare jutuabare Pablo ie angwane, namani monso yebiti aune ketabare jabätä kwe ja kisete. Biti niebare kwe: ‘Munkwe ñaka töbika. ¡Niara tä kwin!’ ¡Aune ye metre! ¡Ye jondron ñan tuabare! ¡Pablo käkwe ganinkröta! Nitre kwati yebätä kä namani juto krubäte.
Nitre jökrä nikaninta kwin bobukäre aune mröbare kwetre. Pablo namani blite jankunu aune kä nükani ngwen. ¡Akwa Eutico ye ñaka nikaninta küben bobukäre! Biti Pablo, Timoteo bätä nitre nämene näin ben ye nikani rute. ¿Niaratre nikani medente gare mäi?
Pablo nikani bämäkäre kukwe driere ye abokän namanina krüte ie. Nikani bämäkäre ye ngwane, nuabare kä komä kwe juta Éfeso yekänti. Ye medenbätä, nänbare bäri mente kwe bobukäre yekrä.
Nämene Troas nikani mentokwäre, ye bitikäre ru ye mikani nünenkä kwe kä braibe te Mileto. Éfeso ye nämene känime, yebätä Pablo käkwe nitre umbre konkrekasionte Éfeso ye käräbare Mileto blitakäre mrä bentre. Ye bitikäre, ru nikanina ye ngwane, ¡nitre ye namani ulire krubäte Pablo nikaninta yebätä!
Mrä mada ru ye namaninta Cesarea. Pablo namani ni ja tötikaka Felipe ye gwirete angwane, Pablo rabaita Jerusalén ye ngwane mikai ngite profeta Ágabo käkwe niebare. Ágabo käkwe niebare ye erere namani bare. Pablo mikani ngite kä kubu te Cesarea, ye bitikäre juani Roma kukwe ükatekäre gobran César yebe. Nikani Roma ye ngwane, dre namani bare ye ani mike gare jai.
Hechos kapitulo 19-26.