Kukwe kira 112

Namani kwäre ngutuä mrente

¡MIKE ñärärä, ru tuin niken ñöte! ¡Tä ngidiente! ¿Nitre nankwani ñöte ye tuin mäi? Niaratre ruäre kitra nemen ümanbiti. ¿Pablo tä yete? Dre namani bare ye ani mike gare jai.

Kä kubu te Pablo mikani ngite Cesarea. Biti Pablo bätä nitre ngite mada jänikani rute Roma. Ngutuä mrente Creta ye ken, murie dite krubäte namani mate. Nitre ie ru ngwan ñaka namani gare. Ñänä ñaka namani tuin rare ietre aune muke ñaka namani tuin deu ietre. Köbö nikani kabre ta angwane, nitre ye ñaka rabai kwäre namani ruin ietre.

Pablo nükani krö aune niebare kwe: ‘Mun ñaka gatai jire iti, ru aibe näin ngwarbe. Ñobätä ñan aune ángel Ngöbökwe nü deu käkwe nini tie: “¡Mä ñaka kä jürä ngwan jabätä Pablo! Tä nändre César gobran Roma ye ngwärekri mäi. Aune nitre jökrä tä näin mäbe ye Ngöbökwe mikai kwäre.”’

¡Köbö 14 yete murie kri matani kena ye näire kä ruäre deu, ñö namani ñaka tuin ngüse nitre ru ngwanka ie! Nane matadre jäte deu yebätä jiero ru ketatekrä ye kitani ñöte kwetre. Jädrinaine dekä kä jate namani tuin ietre. Ja di ngwani kwetre ru ye ngwen nemen mrenkräbiti yete.

Ru ye namanina mrenkrä ken angwane matani ümante aune namaninkä te. Aune ñö namani mate ru yebätä, aune jatani ngidiente kiakia. Ni iti nitre rükä jie ngwanka käkwe niebare: ‘Nire jökrä raba jübenkä ye käkwe jübadrekä nemen mrenkräbiti; nitre mräkä käkwe ja kitadre köre bätä ru kukwain yebiti raba jübenkä.’ Ye erere nuainbare kwetre, aune nitre 276 nämene rute ye namani kwäre mrenkräbiti, ángel käkwe niebare ye erere.

Ngutuä mrente ye kädekata Malta. Nitre yete töi kwin krubäte, aune nitre nükani rute ye dimikani kwetre. Kä namaninta moren angwane, Pablo mikani ru madate aune jänikani Roma.

Hechos 27:1-44; 28:1-14.