Jehovakwe Jesús kriemikani

Kä keteiti kädrikri kä Israel yekänti, nitre nämene nütüre muke nämene niaratre jie ngwen. Bati deu nitre kä Oriente yei muke trä ngitiekä jutuabare kä kwinbätä muke ye namani näin aune niaratre nikani jiebiti. ‘Muke’ ye niaratre jie ngwani nememe Jerusalén. Nitre ye namani ngwentari nitre ie: ‘¿Monso chi rabai reire nitre judío kräke ye tä medente? Nun tö rabai ngukodokwäre niara ngwärekri’.

Kukwe mikani gare rei mrä yebätä ye rei Herodes kä Jerusalén yekänti käkwe kukwe nuani. Niara namani töbike krubäte aune ngwanintari kwe sacerdote däkientre ie: ‘¿Rei ye däredre kä medenkänti?’. Niaratre käkwe niebare: ‘Nitre Ngöbö kukwei niekä käkwe niebare monso ye däredre Belén’. Yebätä Herodes käkwe nitre kä Oriente yekri käräbare aune niebare kwe ietre: ‘Mun nän Belén aune munkwe monso chi ye känä. Ye bitikäre mun jatata aune tä medente ye munkwe mika gare tie, ñobätä ñan aune ti tö rabai ngukodokwäbiti niara ngwärekri arato’. Akwa nämene ni ngökö.

‘Muke’ ye nikani aune nitre ye nikaninta jiebiti nememe Belén. Angwane ‘muke’ ye namani nünaninkä jubiti kuin, nitre ye nikani gwä aune Jesús bätä María kwani ietre. Niaratre namani ngukodokwäre monso chi ye ngwärekri aune niaratre jondron biani ie, oro, jondron rä mane aune mirra. Akwa, ¿Jehovakwe nitre ye juani Jesús nämene yekänti? Ñakare.

Köbö yete deu, Jehová niebare köböre José ie: ‘Herodes tö Jesús murie ketai. Mä muko aune monso mäkwe ye ngwena mento bätä ngitie kä Egipto yekänti. Mun raba yete aune kukwe tare rikai ta tikwe mikaita gare munye angwane mun jatata’. Yebätä José aune mräkätre kwe ye nikani jötrö ngwarbe kä Egipto yekänti.

Ne madakäre, Jehovakwe niebare nitre Oriente yei niaratre ñaka rikadreta Herodes känti. Nitre ye ñaka nikaninta Herodes känti namani gare ie ye ngwane namani rubun krubäte. Aune Jesús ñaka kwani ie yebätä monsotre kia nämene Belén biti kä nämene ja näre Jesube ye jökrä murie keta manabare kwe. Akwa kukwe tare ye ñaka namani bare Jesubätä, ñobätä ñan aune niara nämene mente Egipto.

Kä nikani ta aune Herodes krütani. Angwane Jehová niebare José ie: ‘Kukwe tare ñaka nebera. Mun raba nikenta’. José, María aune Jesús nükaninta Israel aune namani nüne juta Nazaret yekänti.