Jesús nänbare ñöbiti ta

Jesús kräke nämene nuäre nitre bren mikakäreta kwin aune nitre krütani mikakäreta nire. Ne madakäre, di nämene murie dite aune ñü ketabätäkäre. Jesús orabare ünä kä tokwäte ye bitikäre, nikrabare kwe mar Galilea kokwäre aune murie ribi ñübe minimini jutuabare ie. Nitre apóstol kwe nämene ru teri ja di nuin murie dite yebe. Jesús jatani motokwäre aune nikani näin ñöbiti ru kokwäre. Nitre apóstol yei ni jutuabare näin ñöbiti ye ngwane, niaratre nikaninkä krubäte. Akwa, Jesukwe niebare ietre: ‘Ti ara. Mun ñan kä jürä ngwan jabätä’.

Pedro niebare: ‘Ti Däkien, mä ara ngwane niere tie ti rikadre mä kokwäre’. Jesús niebare ie: ‘¡Jakwre!’ Aisete, Pedro nankwani timo rute aune nikani ñöbiti näin Jesús kokwäre murie ribi ñübe minimini yete ta. Akwa, Pedro jatanina nüke Jesús ken ye ngwane, murie ribi ñübe minimini ye mikani ñärärä kwe aune kä jürä namanibätä. Jatani niken nguse ñöte namani ruin ie aune ñäkäbare ja dibiti kwe: ‘¡Ti Däkien, ti dentari!’. Jesukwe niara kani kisebiti aune niebare kwe ie: ‘¿Ñobätä mä ñaka tö ngwini tie? ¿Akräke mä ñaka tä tödeke?’.

Jesús aune Pedro nikani rute aune drekebe ngwarbe murie ribi ñübe minimini ye namani kwekebe. ¿Ja namani ruin ño nitre apóstol yei raba ruin mäi? Niaratre niebare: ‘Erametre, mä abokän Ngöbö Monsoi’.

Murie ribi ñübe minimini Jesukwe ketaninbätä akwa ñan ye aibe ngwane nuainbare kwe. Köbö mada ngwane, Jesús aune nitre apóstol nämene näin rute mren kwäräkri, Jesús namani kübien ru ye trökri. Niara nämene kübiani ye ngwane, murie ribi ñübe minimini mata nükani. Mren namani mate rubätä aune namani nen ruteri. Nitre apóstol namani ñäke Jesús ie: ‘¡Dirikä, nibike murie nötökä! ¡Nun dimike!’. Jesús nükani ngwäte aune niebare kwe mren ie: ‘¡Nemen kwekebe!’. Angwane, murie ribi aune mren namaninta kwekebe. Jesús ngwantaribare nitre apóstol ie: ‘¿Mun ñaka tä tödeke?’. Aune niaratre itire itire käkwe niebare jai: ‘¡Murie ribi aune mren tä niara kukwei mike täte arato!’. Nitre apóstol ie nükani gare niaratre tödekadre Jesús ie angwane, ñaka rabadre kä jürä ngwen jabätä.