KUKWE JA TÖTIKARA 14

Kukwe bäri ütiäte kädekadrete

Hebreos 8:1, TNM

KUKWE MIKATA GARE: Mäkwe nitre dimika ja töi mike kukwe kädrieta mäkwe ye kukwe nuin. Kukwe ütiäte ye tä kukwe mike gare ño aune ñokäre mätä kukwe ye kädriere ye mäkwe mika gare kwin nitre ie.

NUAINDRE ÑO:

Ñokäre mätä kukwe kädriere. Ñokäre mäkwe kukwe kädriei yebätä mäkwe töbika. Ñodre, kukwe keteiti mikakäre gare, nitre dimikakäre o töi mikakäre kukwe mike era jai. Mätä ja tötike kukwe kädriekäre ngwane, kukwe ye jökrä mäkwe ngwan törö jai. Ñokäre mätä kukwe kädriere ye mäkwe ükate kwin ne kwe rükadre gare nitre ie.

Töbike: “¿Kukwe nebätä nitre ti kukwe nuaka raba kukwe meden ngwentari tie aune niaratre raba kukwe ye ngwentari ño jatäri tie?”. Aune ye ererebätä mäkwe kukwe ükate jai kädriekäre ne kwe mätä kukwe mike gare ño ye rükadre gare nitre ie aune rabadre kain ngäbiti.
Mäkwe kukwe meden kädriei metrere ye mäkwe mika gare. Mätä kukwe kädriere ye ngwane, mäkwe kukwe ruäre kädekate bati bobu ne kwe kukwe meden kädrieta metrere mäkwe ye rabadre gare nitre ie.
Kukwe bäri ütiäte ye mäkwe mika gare mrebe aune kukwe nuärebiti. Minuto bianta nuäi ye ererebätä mäkwe kukwe kädrie ne kwe kukwe bäri ütiäte rükadre gare nitre ie. Kukwe bäri ütiäte ye mäkwe ükate kädriekäre aune mäkwe mika gare mrebe. Mäkwe kukwe keteitire keteitire kädrie ngwane, mäkwe ja kukwei mika nünenkä chi.

Kukwe bäri ütiäte ye mä raba kädekete käne mätä kukwe kädriere ye ngwane, ne kwe nitre ñaka riadrete aune mä raba kädeketeta mrä ngwankäreta törö nitre ie.