MONSOTRE BATI TÄ KUKWE NGWENTARI
¿Tikwe ñäkädre Bibliabätä ye raba ti dimike ño? Kena: Kukwe ütiäte känändre Bibliabätä
“Tikwe ja di ngwanina ñäke Bibliabätä, akwa tärä ye nga krubäte tuin tie” (Briana, 15 año).
¿Ye erere tuin mäi? Erere ngwane kukwe ja tötikara ne mä kräke.
¿Ñobätä ütiäte ñäkädre Bibliabätä?
¿Ñäkädre Bibliabätä ye tä ni mike nainte ruin mäi? Ye erere ngwane, ñan mä aibe töita kore. Biblia ye abokän te página tä ere krubäte aune tärä okwä kiakia täbätä aune jondron üai ñaka bätä ye kwrere tuin mäi. ¡Ye ñan ja erebe televisión aune video yebe, ñan ererea!
Akwa töbike kukwe nebätä: Cofre kira te jondron ütiäte tädre kwandre mäi, mä törbadre tikai ¿ñan ererea?
Biblia ye abokän cofre te jondron ütiäte tä ye kwrere. Yete perla ütiäte keta kabre tä abokän käkwe mä dimikai:
Kukwe kwin den nuaindre jai.
Ja mäke kwin mä rün ben.
Ja ketamuko kwin känene.
Aune ja tuin töbikakwe krubäte yebe.
¿Tärä kirabe se ño raba kukwe kwin mike bare ni kräke? Ñobätä ñan aune jondron jökrä tä tikanibätä yebätä Ngöbökwe ja töi mikani (2 Timoteo 3:16). Ye tä mike gare kukwe nieta Bibliabätä mäträkäre nibätä ye kite ni bäri töbätä kä jökräbiti yekri.
Biblia ye abokän cofre te jondron ütiäte tä ye kwrere.
Ñäkä raba Bibliabätä kore
Keteiti ye abokän kömikadre kena nememe mrä. Ye käkwe mä dimikai drebätä Bibliata blite ye mike gare jai. Mä raba nuainne kukwe keta kabrebiti; akwa ani ketebu aibe mike gare jai:
Mä raba ñäke tärä 66 yebätä jirere jatäri, Génesis nemen Revelación (Apocalipsis).
Mada abokän mä raba ñäkebätä kukwe nakaninkä ño jatäri ye ererebätä.
Mä raba ne nuainne: Tärä Ni Testiko Jehovakwe jie ngwankäre ja tötike sección 4-A yete, kukwe namani bare Jesubätä ütiäte ütiäte tä mikani jatäri kwain mäi.
Kukwe ketebukäre nuain raba, ye abokän kukwe kädrieta Bibliabätä erere ben mäta ja tuin, ye mäkwe känändre. Ñodre:
¿Ja ketamuko abokän ie mä raba tö ngwen ye kwrere mä törba tuai jakwe? Ye erere ngwane, mä raba ñäke David aune Jonatán ja ngwani ño yebätä (1 Samuel, kapitulo 18 nemen 20). Biti mäkwe ejercicio “Ño ja ketamuko erametre raba kwen nie” ye nuain, ne kwe kukwe drieta ja töi kräke nie ye rabadre gare mäi.
¿Mä nuateta ye ngwane mä törba ja di tuai bäri ja tuakäre kukwe yebe? Kukwe namani bare Josebätä yebätä mä raba ñäke, aune nuaninte ngwane ño ja tuani kwe kukwe yebe ye mä mikatari ñärärä (Génesis, kapitulo 39). Biti, ejercicio “Ni nuateta yebe ño ja tua raba” aune “Kukwe ñan erabätä mikani ngite”, ye mäkwe nuain abokän käkwe kukwe ütiäte driei ja töi kräke mäi.
¿Orasion ye raba mä dimike ño ye mä tö mikai gare jai? Dre namani bare Nehemiabätä, yebätä mäkwe ñäkä (Nehemías, kapitulo 2). Biti, ejercicio “Jehovakwe orasion kwe kani ngäbiti” ye mäkwe nuain abokän käkwe kukwe ütiäte ja töi kräke driei mäi.
Mä raba kukwe ne nuainne: Mä törba ñäkäi Bibliabätä ngwane, mäkwe kä kaibe känä ne kwe mä ñan töi rabadre kukwe mada jiebiti.
Kukwe ketamäkäre nuain raba ye abokän kukwe keteiti nakaninkä o salmo keteiti diandrekä jai aune ñäkädrebätä. Biti ño raba ni dimike yebätä töbikadretari, mäkwe ñäkäbätä ye bitikäre mä ngwantari jai:
¿Ñobätä Jehovakwe kukwe ne tikamanabare Bibliabätä?
¿Jehovata ja ngwen aune tä jondron nuainne yebätä kukwe ne tä dre driere tie?
¿Tikwe gwä ñäri kukwebätä ne raba ti dimike ño?
Mä raba kukwe ne nuainne: Mäkwe kukwe mika nuaindre ja käne jai. Ñongwane mäkwe ñäkä Bibliabätä kömikai, ye mäkwe tika täräbätä jai aune mäkwe nuain aune “Kukwe ükaninte ñäkäkäre Bibliabätä” tä internet käi nunkwe te yebiti mä raba nuainne.