Kä krütai: kä jürä, tua tö nüke gare jai aune töbike krubäte

Calendario nitre maya yekwe aune nitre kwati tä niere arato, köbö 21 diciembre 2012 yete, kukwe ñan tuabare rabai bare kä jökräbiti tibien, akwa ¿mätä töbike köbö yebätä angwane jata nemen ruin ño mäi? Kukwe meden ie mätä tö ngwen ye ererebätä, ja raba nemen ruin kwin mäi, töbike krubäte o kukwe ye ñaka raba nemen tuin ütiäte mäi. ¿Kukwe mada keta kabre ngwarbe mikanina gare kä krüte yebätä?

¿Aune “kä ne rikai ta” nieta Bibliakwe yebätä mätä töbike ño? (Mateo 24:3.) Kä tibien ne kukwai ruin nitre ruäre ie yebätä kä jürä bätätre. Kukwe tare rabai bare kä krüte te bämikata tuare ye nitre mada abokän tö tuai nüke gare jai. Aune kä krüte nibira ja ken nieta ye nitre mada kwati ñaka tö niena kukwe nuai. Akwa, ¿ye kukwe ngwarbe kädrieta o kukwe metre nieta abokän kätä niaratre töi mike ye erere?

Biblia tä dre driere metrere kukwe yebätä rabai gare mäi ye mä töi mikai ñan krütare. Kukwe keta kabre nietabätä abokän köböire ni tö kä krütai tuai nemen bare; akwa kä krüte ye ñaka rabadre nüke rabadre tuin nie ye ngwane, ni raba nemen nainte ye mikata gare metre kwe arato. Ye medenbätä, nitre tä kukwe ketabokä ngwentari krubäte jai, ye abokän Biblia tä mike gare ño ye nunta mä nübaire mike gare jai.

¿Kä tibien ne kukwai?

BIBLIA TÄ MIKE GARE: “[Ngöbö] kä tibien ye ükaninte kwin, ñaka gaite jire, ñakare aune tädi kärekäre” (SALMO 104:5).

Kä tibien ne ñaka gaite jire ñukwäbiti aune jondron madabiti; ñakare aune Biblia tä mike gare täi käre nünankäre nitre kä tibienbätä ie. Tärä Salmo 37:29 tä mike gare: “Nitre kukwe kwin nuainkä ye aibe kwe kä tibien ye rabai, aune nünandi kärekäre te kwetre.” (Salmo 115:16; Isaías 45:18.)

Ngöbökwe Kä tibien sribebare ye bitikäre, niebare kwe “namani tuen bäri nuäre ie”, aune ye erere töi täbe kä nengwane arato (Génesis 1:31, Jändrän Kena [JK]). Niara töi ñaka kä tibien ne juanbätä ngwarbe; ñakare aune, “nire nire käta kä temen ne juen ngwarbe abko [niara]kwe juandi ngwarbe” käbämikata kwe. Ye abokän niarakwe ñaka nitre tuainmetre kä juen ngwarbe kärekäre gärätä (Apocalipsis 11:18).

Akwa kukwe nieta 2 Pedro 3:7 yebätä mätä töbike mada, yekänti nieta: “Kä käinta amne kä tementa nita tuen mtare noko abko Ngöbö ara jire käkwe gadikä ñukwä jutrabti”. ¿Akräke Kä tibien ne kukwai ñukwäbiti nieta texto nekänti? Ruäre ngwane Biblia tä blite kä kwinta, kä tibien aune ñukwä yebätä akwa kukwe ja üaire yebiti. Ñodre, Génesis 11:1 [JK] tä niere “Ni jökrä [hebreore: ʼÉ·rets, “kä tibien” gärätä] ye nämane nüne Noe näire btä Noe täbti abko kukwe kwatibe jökrä”. Erametre texto nekänti “kä tibien” nieta ye nitre nünanka kä jökräbiti tibien gärätä.

Kukwe nieta 2 Pedro 3:7 känenkri aune kukwe bersikulo ye bitikäre tä mike gare kä kwinta, kä tibien aune ñukwä nieta ye blitata kukwe ja üaire yebätä arato. Bersikulo 5 aune 6 tä kä te nita nüne ne bämike Ñü Kri Noé näire yebätä. Kä ye ngwane nitre kirabe ye ganinte jökrä. Akwa kä tibien ye ñaka ganinte jire. ‘Kä tibienʼ o nitre ja ngwanka käme, aune ‘kä kwintaʼ, o nitre nämene nitre nünanka kirabe gobraine ye ganinte jökrä (Génesis 6:11). Ye erere arato, 2 Pedro 3:7 tä mike gare, ñukwä tä jondron juen gwarbe täte ye kwrere, nitre ja ngwanka käme aune gobrantre kukwe käme nuainkä ye gaite täte.

¿Dre rabai bare kä krütai yete?

BIBLIA TÄ MIKE GARE: “Nitre ñaka Ngöbö mike täte ye näin ta bätä tö dre dre nuain ye näin ta arato, akwa Ngöbö tö dre dre ie ye erere nire nire kätä nuainne ni ye käkwe nünain kärekäre” (1 JUAN 2:17, TNM).

Kä tibien ñan ai näin ta, ñakare aune “nitre” näin ta, ye abokän nitre ñaka Ngöbö tö dre dre ie erere nuainne gärätä. Ñodre, ni ni operaka kätä bren tumor denkä ni iti ie ne kwe rabadrete nire, ye kwrere Ngöbökwe nitre kukwe käme nuainkä diainkä ne kwe nitre kukwe kwin nuainkä rabadre nüne kwin erametre Kä tibienbätä (Salmo 37:9). Ye medenbätä “kä krüte” ye kwin krubäte.

Kukwe kwin mikata gare “kä rikai ta” yebätä, ye Biblia ruärebätä mika ñaka gare metre ta, ñodre tä kukwe ne kwite krörö “kukweta ükaninte ye rabaira krüte” o “kä ja ken känenkri” (Mateo 24:3, Ngöbö Täräe, tärä okwä ükaninte [NGT]). Kä krütai ye bitikäre nitre aune Kä tibien tädi jankunu, yebätä kä mrä aune kukwe mrä ükaite ye kömikai metre. Biblia tä kukwe ye niere metre, ñobätä ñan aune “kä mrä kwain” ye tä kädriere (Lucas 18:30, NGT).

Jesús kä ja känenkäre kädekani “jändrän jökrä ükadite btin”. Niarakwe kä ükaiteta ne kwe Ngöbö tö namani nitre tuai nüne ño kena ye erere rabadre bare (Mateo 19:28). Ye rabai bare angwane nikwe nünain ne erere:

• Kä tibien bä nuäre känti nünandi jäme aune jondron rabai krubäte ni jökrä kräke (Isaías 35:1; Miqueas 4:4).

• Sribi kwin aune ütiäte rabai (Isaías 65:21-23).

• Bren jökrä ye ñaka rabaira (Isaías 33:24).

• Ni rabaita bati (Job 33:25).

• Nitre krütanina gaikrota (Juan 5:28, 29).

“Ngöbö tö dre dre ie” ye erere nikwe nuaindi angwane köbö te nitre ñaka Ngöbö mike täte gaite ye jürä ñaka rabai nibätä; ñakare aune, ni törbai krubäte köbö ye tuai nüke.

¿Erametre kä krütai ye tä ja ken?

BIBLIA TÄ MIKE GARE: “Kukwe [...] ye jata nakenkä jökrä mun okwäbti angwane, Ngöbö kebera nüke gobrane ye rabara gare munye” (LUCAS 21:31).

Tärä The Last Days Are Here Again (Los últimos días han vuelto), profesor Richard Kyle tikani “kukwe nemen bare jötrö ngwarbe aune ngwian ñaka tä nemen nitrekwe ye ngwane metrere tä nemen kukwe mike gare kä krüte yebätä”, ñobätä kukwe tä nemen bare aune ngwian ñaka tä nemen ye mika ñaka raba gare tä nemen ruin ye ngwane tätre nuainne metrere.

Akwa, nitre kukwe Bibliabätä niekä käkwe kukwe niebare kä krüte yebätä ye ñaka nuainbare kukwe tä nemen bare kätä nitre mike töbike krubäte ye mikakäre gare. Ngöbökwe nitre niara kukwei niekä töi mikani ne kwe dre dre rabai nakainkä abokän käkwe kä krüte rükai jötrö ngwarbe bämikai ye niekäre. Nitre Ngöbö kukwei niekä käkwe kukwe rabai bare jatäri niebare ye mä raba mike ñärärä aune kukwe ye tä nemen bare o ñaka ye mä raba niere.

• Rü, mrönika, dobo kri aune bren keta kabre kräkäi ñaka (Mateo 24:7; Lucas 21:11).

• Kukwe tare nuainta krubäte ni madabätä (Mateo 24:12).

• Nitre tä Kä tibien juen ngwarbe (Apocalipsis 11:18).

• Nitre rabai ja tarere akwle, ngwian aune kä ngwan juto jabätä tarere, akwa ñaka Ngöbö tarere (2 Timoteo 3:2, 4).

• Ni ja mräkäre ñaka tä nüne keteitibe jabe (2 Timoteo 3:2, 3).

• Kä krütai ye kukwe keta kabre tä mike gare abokän nitre kwati ñaka mike era jai (Mateo 24:37-39).

• Kukwe kwin Gobran Ngöbökwe yebätä drieta kä jökräbiti tibien (Mateo 24:14).

Jesukwe niebare ye erere, nikwe “jondron ne tuadi jökrä” ye mikai gare nie kä krüte tä nökrö ja ken (Mateo 24:33). Nun testiko Jehovakwe ie gare kwin kukweta nemen bare ye tä mike gare metre nita nüne kä krüte te; ye medenbätä nunta tödeka nunkwe mike gare juta 236 jene jene yete.

Kä krütai yebätä kukwe metre nie ñaka, ye medenbätä ¿ñaka rabai bare ni raba nütüre?

BIBLIA TÄ MIKE GARE: “Meri ñan mobe bren kwe kisete, ye käkwe ja ngibiadre ñongwane metre gare ñakare ie, akwa batibe ja ngibia käi tä nüke ie, ye kwrere nitre tödekaka ñakare Jesubti tädi niere krörö: Mtare kukwe ñakare. Nita nüne kuin jäme, tädi niere. Ye ngwane ni Dänkien Jesu jatadita käkwe juandi ngwarbe jökrä amne ñan kwäräbedre jire kwetre” (1 TESALONICENSES 5:3).

Biblia tä nitre kä nebätä gaite ye bämike meri ñaka mobe ie ja ngüba käi tä nüke ye kwrere: meri ie ja ngüba käi tä nüke ye tare krubäte aune tä nüke jötrö ngwarbe. Ye erere arato, kä krüte ye bämika raba meri ñan mobe ye kwrere, ñobätä ñan aune meri ye monsoi rabadre köböi tä nökrö bäri ja ken tä nemen gare ie. Monsoi däredre köbö medente doctor tä niere ye köböi te ñan tä nemen bare, akwa gwäune monso rabai kwe ye tä gare metre ie. Kä krüte rükadre köbö medente nieta nitre ruäre käkwe akwa ñaka tä nemen bare köbö yete, yebätä ni ñan rabadre nütüre ni ñaka tä nüne ‘kä krüte teʼ (2 Timoteo 3:1).

“Kukwe tä nemen bare kätä mike gare metre kä krütai niena ja ken krubäte, akwa mä raba ngwentari jai, ¿ñobätä nitre kwati ñaka mike era jai?” Biblia tä mike gare, kä krütai rabaira ja ken ye ngwane nitre kwati rabai kukwe metre ye kötaire. Kä krüte yete kukwe rabai nemen bare drekebe ngwarbe ye nitre ñaka rabai mike era jai, ñakare aune rabai niere kötare kwärä: “Ni rün kira ngatani näire, jondron jökrä tä näin ja erebe jankunu mentokwäre nükebe [...], kä sribebare kena ngwane” (2 Pedro 3:3, 4, NGT). Kukwe rabai nemen bare ye rabai mike gare metre nita nüne kä krüte te, akwa nitre jökrä bäsi ñaka rabai mike era jai (Mateo 24:38, 39).

Kä krütai niena ja ken ye kukwe keta kabre tä mike gare ye ruäre mikata gare täräkwata nebätä.a ¿Mä törba kukwe ye mikai gare bäri jai? Ye erere angwane, nunta mä nübaire blite nitre testiko Jehovakwe yebe aune tätre ni tötike Bibliabätä abokän ñaka ütiä kärere ye mä raba kärere ietre. Niaratre raba mä tötike mä gwirete, medente mä törbadre ja tötikai yekänti aune raba nuainne teléfono yete mäbe arato. Ye nuainkäre mä rabadre kä denkä jai, akwa kukwe kwin rabai mäkwe ye bäri ütiäte.