Ngöböta mä ngübare

ÑOBÄTÄ ÑAKA TUIN METRE NITRE RUÄRE IE: Nitre ja tötikabare bitinkä käkwe mikani gare, galaxia yete planeta tä 100 mil millón näre. Kä kwinta ye kri krubäte, yebätä nitre kwati nemen ngwentari jai: “¿Ngöbö raba ni kä tibienbätä ñaka ütiäte tä jondron nuainne kä chi te ye mike ñärärä?”.

DRE DRIETA BIBLIAKWE: Jehová Biblia biani nie biti ñaka ni käi kwitaninkä kwe jabiti. Niara tä mike gare nie: “Erametre tikwe mäträi mäbätä ti okwä nebiti” (Salmo 32:8).

Ani töbike Agar yebätä, meri Egipto yekwe nünanbare siklo XX kä 1 känenkri. Meri kädeka nämene Sarai kräke Agar nämene sribire ye ñaka mikani ütiäte kwe jai, aune Sarai käkwe mikani tuin ngwarbe jai. Yebätä ngitiani kä ngwarbe nötare yekänti. ¿Ja mikani ngite kwe yebätä Ngöbökwe käi kwitaninkä jabiti? Biblia tä mike gare “Angel Sribikä Dänkin Ngöbökwe [“Jehová”, TNM] nükani känti” aune kukwe ne niebare kwe ie dimikakäre: “Mata ja tare nike ño, ye jarabare Dänkin Ngöbö ie”. Agar käkwe niebare ie: “Ngöbö [mä] ie [...] [ti] tuen” (Génesis 16:4-13, Jändrän Kena).

Mä tuin Ngöböi arato. ¿Mä tuin ño ie? Kukwe bämikata nebiti raba nüke gare nie. Meri iti tä monsotre kwe jökrä ngübare töi kwinbiti, akwa tä monsotre kia kwe ye ngübare bäri, ñobätä ñan aune täbe bobre aune ngübadre bäri. Ye erere arato, ni nemen di ñakare aune nita bobre ye ngwane Jehová tä ni ngübare bäri. Niara tä niere: “Tita nüne mente kwin aune kä deme yekänti, nitre di ñakare aune nitre bobre yebe tita arato, nitre bobre ye mikakäreta dite aune nitre di ñakare ye brukwä mikakäreta dite” (Isaías 57:15).

Akwa yebiti ta mä raba ngwentari jai: “¿Ti tuin ño Ngöböi? ¿Jerekäbe okwäta tibätä, o dreta ti brukwäte ye tuin ie aune ti töita ño ye tä mike nüke gare jai?”.