Nitre mantiame ye kräke Jehová tä kukwe kwin mike nemen bare krubäte
NI NI Sribekä jondron kwin biani ni kä tibienbätä ie, ye abokän niarakwe ni töi mikani ne kwe ni törbadre dre nuain ye erere nikwe nuaindre, yebiti bämikani kwe ni ütiäte kräke. Ne madakäre, nire kätä ja töi jeñebiti kukwe nuainne ne kwe niara mikadre täte metre, Niara kä ye mikadre deme aune Niara tö dre nuain ye dimikakäre, ye kräke niara tä kukwe kwin mike nemen bare krubäte. Jehová ñaka tö ni tuai ja mike täte krenbe kwärä o kä jürä nibätä aune ni töi mikata nuainne yebätä, ñakare aune nikwe mikadre täte tare nikwe aune nita debe bien ie yebätä ye tä nemen kwin kräke.
Ñodre, nitre Israel nämene kä ngwarbe nötare Sinaí yekänti angwane, Jehovakwe kukwe biani ietre ne kwe rabadre ju sribere niara mikakäre täte. Niebare kwe ietre: “Mun jökrä käkwe jondron ükakrö biandre Jehová kräke. Mun jökrä törba ja brukwä tätebiti jondron biain Jehová kräke angwane mun jata ngwena” (Éx. 35:5). Nitre Israel itire itire kwe dre dre nämene ye erere rabadre bien aune nuaindre kwetre ja töi jeñebiti, törbadre dre biain aune nuäi ye erere biandre kwetre Ngöbö tö nämene dre nuain ye mikakäre nemen bare. ¿Juta yekwe dre nuainbare?
“Nitre jökrä tö namani ja brukwä tätebiti jondron biain” yekwe jondron biani ja töi jeñebiti, niaratre jökrä käkwe biani “ja brukwä tätebiti”. Nitre brare aune merire jondron biani sribi Jehovakwe ye nuainkäre: bilebätä jondron bä nuäre mikani, olo mie, sortija, oro, ngwian, cobre, kö azul, lana jükani mire tain, kö tain träte, lino kwin krubäte, cabra druen aune oveja nidan kwata jükani tain bätä foca kwata, kri acacia kukwän, jä bä nuäre aune aceite bätäkä ngwarbe. Mrä, “jondron jänükani ye namani täte sribi jökrä nämene nuaindre ye kräke, aune ribe nämene yebiti ta bäri jänükani” (Éx. 35:21-24, 27-29; 36:7).
Jondron ütiäte jänükani ye ñan ai käi namani juto Jehovabätä, ñakare aune nitre ja töi mikani mantiame jondron biankäre Ngöbö mikakäre täte metre ye käi namani jutobätä. Juta ye ja töi mikani kä denkä jai sribi nuainkäre ja kise jeñebiti. Biblia tä niere: “Meritre jökrä ie jondron sribe nämene gare ye namani kö dätere ja kisebiti”. Aune tä niere arato: “Meritre jökrä ie jondron sribe nämene gare abokän tö namani ja brukwä tätebiti jondron sribei ye käkwe cabra druen dätebare”. Ne madakäre, Jehovakwe Bezalel mikani töbätä, kukwe mikani nüke gare kwe ie, kukwe mikani gare kwe ie aune “jondron bätäkä ngwarbe sribedre ño ye mikakäre nüke gare ie”. Ye erere, Ngöbökwe Bezalel aune Oholiab tötikani sribi keta kabre biani kwe ietre ye nuainkäre (Éx. 35:25, 26, 30-35).
Jehovakwe nitre Israel nübaibare jondron bien ye ngwane, nämene gare metre ie nitre ye “ja brukwä tätebiti” niara mikai täte metre. Nitre ja töi mikani mantiame jondron biankäre ye kräke niarakwe kukwe kwin mikani nemen bare krubäte, niarakwe jie ngwani aune kä mikani juto krubäte bätätre. Kukwe yebiti Jehovakwe bämikani nitre niara mikaka täte kätä ja töi mike mantiame jondron biankäre ye kräke niarata kukwe kwin mike nemen bare, tä nitre ye tötike aune dre dre nuain gare ietre yebiti tä töi mike sribi Kwe nuainne (Sal. 34:9). Nikwe ja töi mikai mantiame Jehová mikakäre täte angwane, erametre niarakwe kukwe kwin mikai nemen bare ni kräke.