Ni jondron bianka töi kwinbiti ye kräke kukwe kwin rabai bare
KIRABE nükebe kä nengwane, jondron biandre Jehová mikakäre täte ye ütiäte krubäte. Nitre israelita nämene jondron nire kukwe Ngöböi, akwa ni kristiano abokän tä käre Ngöbö “käikitekä” yebätä ni nüke gare ni madai. Akwa kukwe mada nuainta Ngöbö mikakäre täte ye tuin kwin ie arato (Heb. 13:15, 16). Nire nire tä nuainne yebätä kätä juto aune kukwe kwin tä nemen kwetre, ye mikata gare ja käne.
Ana ye ni israelita Ngöbö mikaka täte metre abokän tö nämene monso tuai jakwe, akwa monsoi ñaka nämene nemen. Bati käbämikani kwe orasionte Jehovai, niara monsoi rabai ngwane biain kwe Jehovai sribikäre “kärekäre” kräke (1 Sam. 1:10, 11). Ja känenkäre, Ana namani bulebiti aune monso brare namani kwe abokän kädekani kwe Samuel. Ana Samuel dianinkä kianbätä ye ngwane, nikani ngwena tabernáculo yete sribikäre Jehová kräke käbämikani kwe ye erere. Ye köböire Jehovakwe kukwe kwin mikani nemen bare kräke. Monso namani nirike mada kwe aune Samuel namani ni Ngöbö kukwei niekä bätä Biblia tikani kwe arato (1 Sam. 2:21).
Ana aune Samuel ye erere, ni kristiano raba ja denkä mento ni ni Sribekä mikakäre täte. Nikwe ja di ngwain Jehová mikakäre täte ye ngwane, kukwe kwin keta kabre rabai nikwe ye Jesukwe käbämikani (Mar. 10:28-30, TNM).
Dorcas meri kristiana siklo kena ye nämene “jändrän kuin nuene ni mda mdakrä amne käre nämane ni bobre bobre die mike arato” yebätä nämene gare nitre jökrä ie. Akwa namani “bren jume amne krütani” yebätä ja mräkätre konkrekasion kwe yete namani ulire krubäte. Pedro nämene juta yete ye namani gare ietre ngwane, niara rikadre jötrö ngwarbe niaratre känti ye ribebare kwetre ie. ¡Pedro nükani yete aune Dorcas ganinkröta kwe ye ngwane, kä namani juto bätätre ye ni raba bämike ja töite! Ye ngwane krire kena apóstol iti käkwe ni iti ganinkröta nieta Bibliabätä (Hech. 9:36-41). Dorcas kukwe kwin nuainbare ye Jehovakwe ñaka käi kwitaninkä jabiti (Heb. 6:10). Biblia tä blite Dorcas yebätä aune nengwane ni raba ja ngwen niara erere.
Apóstol Pablo kukwe kwin bämikani ni käne arato, ñan ñobätä aune nämene kä denkä jai nitre mada kräke. Nitre kristiano Corinto ie kukwe ne tikabare kwe: “Ja moto kuinbti ti tö jändrän tikwe gainte jökrä munkrä amne, ti ne ara jire bike ja gaente au mun kräke” (2 Cor. 12:15). Nita jondron kwin nuainne ni mada kräke ye ngwane, kätä nemen juto nibätä aune kukwe bäri ütiäte tä nemen nikwe ye abokän: Jehovata kukwe kwin mike nemen bare ni kräke aune tä ni kain ngäbiti ye namani gare akwle Pablo ie (Hech. 20:24, 35).
Erametre, nikwe kä diandrekä jai aune nikwe sribidre ja dibiti Gobran Jehovakwe kräke aune ja mräkätre kräke ye tuin kwin ie. Akwa ¿ni raba kukwe mada nuainne? Jän. Nikwe jondron kwin nuaindre nitre mada kräke, akwa nikwe ngwian biandre Jehová mikakäre ütiäte jai arato. Ngwian bianta ja tö jeñebiti ye köböire kukwe drieta jankunu kä jökräbiti tibien. Ñodre, nitre misionero aune nitre sribikä köbö täte Ngöbö kräke tätre jondron ruäre ribere jai ye ütiä bianta ngwian yebiti. Ngwian bianta yebiti, tärä, täräkwata aune video sribeta bätä kwitata, nitre mada dimikata kukwe tare tä nakainkä ye ngwane aune Ju Ja Ükarakrö sribeta bäri. Nikwe jondron biandi töi kwinbiti ngwane, kukwe kwin rabai bare ni kräke yei nikwe tö ngwandre. Ne madakäre, ‘jondron ütiäte nikwe yebiti’ nikwe Jehová mikai ütiäte jai (Prov. 3:9; 22:9).