KUKWE TÄRÄ KWATABÄTÄ: ¿NIRE ABOKÄN NITRE TESTIKO JEHOVAKWE?
¿Ñobätä tätre kukwe driere?
Nunta kukwe driere yebiti nun nüke gare bäri kwin raba ruin nunye. Nunta kukwe driere ju ju te, nitre tä nemen kwati yekänti aune kä mada nitre tärä ye jökrä känti. ¿Ñobätä nunta nuainne?
Nun testiko Jehovakwe tä kukwe driere Ngöbö käikitakakäre aune niara kä mikakäre gare (Hebreos 13:15). Arato nuaindre niebare Kristokwe ye erere nunta mike täte: “Mun nän, amne nitre nünanka kä jökräbti temen, ye känti mun näin ti mike gare ietre amne munkwe niaratre mika ja töitikaka siba tibe [...]. Amne kukwe diribare tikwe munye, ye erere munkwe diri jökrä ietre amne niaratre käkwe ti kukwei ye mikadre täte jökrä arato” (Mateo 28:19, 20).
Ne madakäre, nitre mada tare nunkwe yebätä nunta nuainne (Mateo 22:39). Nitre jökrä bäsi tärä kukwe mada mike täte aune nunta kukwe driere ye nitre ruäre ñaka tö kukwe nuai ye gare nunye. Akwa kukwe drieta Bibliakwe ye köböire nitre raba nemente nire ye gare metre nunye. Ye kätä nun töi mike “Jesu Ni Dianinkä Ngöbökwe abko kukwe kuin ye [...] dirire bäri mda köbö kwatirekwatire” (Hechos 5:41, 42).
Ni sociólogo Antonio Cova Maduro käkwe mikani gare: “nitre testiko Jehovakwe tätre ja di ngwen krubäte, tätre nuainne ja nire tätebiti ne kwe kukwe deme Ngöbökwe ye rabadre gare nitre Kä tibienbätä ye jökrä ie”. (Periódico El Universal, Venezuela)
Nitre tä ñäke täräkwata nunkwe yebätä ye jökrä bäsi ñaka testiko Jehovakwe. Nitre kwati tä kukwe madabätä aune tö ni Testiko tuai näin jakänti ye nunta tötike Bibliabätä.
Mä tö tä kukwe ruäre mikai gare jai nunbätä raba ruin nunye. Mä raba kukwe keta kabre nuainne mikakäre gare jai:
Mäkwe ngwantari ni testiko Jehovakwe ie.
Mäkwe känä Internet käi nunkwe www.jw.org/jw-ngb yete.
Mä rika gätä nuainta nunkwe yete. Ütiä kärä ñaka aune nitre jökrä raba niken.