Ni dimikakäre Biblia mike nüke gare jai

Mä rikadre kena juta madate ye bämike ja töite. Nitre ye bä jene, jondron bä jene nuainne, mrö bä jene kwete, aune ngwian bä jene kwetre ye rabai gare mäi. Erametre, ja rabadre ruin jene mäi.

Mäkwe ñäkädre kena Bibliabätä ye ngwane erere raba nemen bare mäbätä. Nitre kirabe aune kukwe nuain nämene kirabe kädrietabätä ye ñaka rükai gare mäi. Juta keta kabre rabai gare mäi, nitre filisteo ye kwrere, jondron bä jene nuain nämene rabai gare mäi, ñodre, nitre nämene dän ngienkä jabätä. Arato mrö kädeka nämene maná, aune ngwian mününe, kädeka nämene dracma ye rabai gare mäi (Éxodo 16:31; Josué 13:2; 2 Samuel 3:31; Lucas 15:9). Kukwe jökrä ye raba mä töi gainte. Mä tädre juta madate ye ngwane, ni madakwe mä dimikadre ye mä rabadre ribere jai. Kukwe Bibliabätä ñaka nüke gare mäi ye ni madakwe driedre mäi ye rabadre kwin mä kräke, ¿ñan ererea?

NITRE DIMIKANI KIRABE

Biblia tika jatani kena siklo 16 kä 1 känenkri ye ngwane, nitre dimikanina ne kwe rükadre gare ietre. Ñodre, Moisés, dianinkä kena juta Israel jie ngwankäre, ye käkwe kukwe nämene tikani ye ngwane ye mikani gare (Deuteronomio 1:5).

Siklo nikani 10 ta ye bitikäre, nitre dirikä nämene kukwe Ngöbökwe ye dirire. Kä 455 kä 1 ye känenkri, nitre judío kwati, ye ngätäite monsotre kia nämene kwati arato, käkwe ja ükaninkrö juta Jerusalén yete. Nitre dirikä Bibliabätä “namanintre ñäke jankunu ja dibiti, täräbätä Ngöbö metre Kukwei nämene yebätä, namanintre mike gare metre aune dre gärä nämene ye namanintre mike gare; angwane kukwebätä ñäkä nämene ye niaratre käkwe nitre dimikani mike nüke gare jai” (Nehemías 8:1-8).

Kä nikani 500 ta ye bitikäre, Jesukristo käkwe nitre tötikani arato. Ñodre, nitre ie niara nämene gare ni dirikä ye erere (Juan 13:13). Nämene ni itire itire aune nitre kwati ye tötike. Bati, nitre kwati nämene ja ükaninkrö ye ngwärekri kukwe kädriebare kwe ngudrebiti. “Ni kwati ye [...] ñan töi namani krütare.” (Mateo 5:1, 2; 7:28.) Kä 33 yete, nitre nibu ja tötikaka Jesube yebe niara käkwe blitabare nikanintre Jerusalén ken ngwane. Niara “ki blite ji ngrabare nibe Ngöbö Kukweibtä”, kukwe nämene tikani ye mikani gare mrebe kwe ietre, ye meden gärätä (Lucas 24:13-15, 27, 32).

Nitre ja tötikaka Jesukwe ye namanintre Ngöbö Kukwei ye dirikä arato. Bati, ni etíope sribikä gobranbe nämene ñäke kukwe Ngöbökwe yebätä. Felipe ni ja tötikaka Jesube ye nikani ken aune ngwanintari kwe ie: “¿Tärä btä mata ñäke, ye tä nüke gare mae ya?”. Ni Etíope käkwe niebare ie: “¿Kukwe ne dirikä ñakare tie, se rükadre gare ño tie?”. Ye ngwane Felipe käkwe kukwe ye mikani gare ie (Hechos 8:27-35).

NI DIMIKATA KÄ NENGWANE

Mekerabe nitre dirikä nämene kukwe Bibliabätä driere, ye erere arato, kä nengwane, nitre testiko Jehovakwe tätre nuainne juta 239 jene jene yekänti (Mateo 28:19, 20). Bämän kratire kratire tätre nitre millón 9 biti bäri dimike kukwe Bibliabätä ye mike nüke gare jai. Nitre kwati ye ñaka kukwebätä. Nitre tötikata ye ütiä kärä ñaka ietre aune mä tötika raba mä gwirete o kä madakänti, teléfono yebiti o Internet yete arato.

Mä tö ja tötikai Bibliabätä angwane, mäkwe blita nitre testiko Jehovakwe ben. Kukwe Bibliabätä ye nuäre rükadre gare ye rabai gare mäi. Ye medenbätä “kukwe ütiäte dirikrä amne kuin mäträkrä amne, kuin ni mda töi diankrä amne, kuin ni töitikakrä nüne metre Ngöbö ngwärekri. Ne köböire abko nitre tödekaka Jesubti tä nüne Ngöbökrä ye tädre juto biare sribi kuinkuin bätäkä ngwarbe nuenkrä” (2 Timoteo 3:16, 17).