KUKWE NGWANTARITA BIBLIA YEBÄTÄ
¿Kukwe rabai bare niebare Ngöbökwe tä Bibliabätä ye ñokäre tikani?
¿Ñobätä biblia tä blite kukwe jökrä tä nakainkä kä nengwane yebätä? (Lucas 21:10, 11)
Kukwe rabai bare niebare Ngöbökwe ye keta kabre mikata gare kwin jatäri Bibliabätä. Dre rabai bare ja känenkäre ye ni ñaka jire iti abokän raba niere metre. Ye medenbätä kukwe rabai bare niebare Ngöbökwe tä nemen bare ye kätä mike gare metre nie Biblia ye Kukwe Ngöbökwe. (Mäkwe ñäkä Josué 23:14; 2 Pedro 1:20, 21 yebätä.)
Kukwe rabai bare niebare Ngöbökwe tä Bibliabätä abokän erere namanina bare ye tä ni dimike tödeke Ngöböi (Hebreos 11:1). Arato Ngöböta jondron kwin krubäte käbämike ja känenkäre nie ye rabai bare metre ye tä nemen gare nie. Ye medenbätä, kukwe rabai bare niebare Ngöbökwe ye tä ni mike tö ngwen jondron kwin ie. (Mäkwe ñäkä Salmo 37:29; Romanos 15:4 yebätä.)
¿Kukwe rabai bare niebare Ngöbökwe ye tä ni dimike ño?
Kukwe rabai bare niebare Ngöbökwe ye ruäre tä nitre kristiano töi mike kukwe ruäre nuainne. Ñodre, kukwe rabai bare niebare Ngöbökwe ye nämene nemen bare jutuabare nitre kristiano siklo kena yete yei angwane, kä mikaninkä kwetre Jerusalén. Ye bitikäre, nitre jökrä juta yete käkwe ñaka Jesús kani ngäbiti yebätä ganinte, ye ngwane nitre kristiano ye namanina mente aune kwäre. (Mäkwe ñäkä Lucas 21:20-22 yebätä.)
Kukwe rabai bare niebare Ngöbökwe keta kabre namanina bare nüke kä nengwane, ye tä mike gare gwäune Gobran Ngöbökwe ye käkwe gobrantre kä tibienbätä ye gaite (Daniel 2:44; Lucas 21:31). Kä negwane arato, ni itire itire käkwe ja di ngwandre ne kwe Jesukristo kädekani reire Ngöbökwe, ye käkwe ni kadre ngäbiti. (Mäkwe ñäkä Lucas 21:34-36 yebätä.)