Biblia: kukwe metre niekä aune tö ngwandre ie

¿Kukwe meden tä mike gare Biblia tä kukwe kira ye mike gare metre? ¿Kukwe meden namanina bare abokän tä ni dimike tö ngwen kukwe köböra nemen bare yei? Kukwe ne mikata gare video ketamä kädekata La Biblia: historia exacta, profecía confiable yete; video ye tä mikani DVD kädekata La Biblia: libro de hechos y profecías yete. Nunta mun nübaire video ye tuin, aune kukwe ngwantarita jatäri nete mikadre gare:

1) ¿Kukwe metre nieta Bibliabätä ye nirekwe Ükaninte? (Dan. 2:28.) 2) ¿Ñobätä ni raba niere Biblia tä kukwe metre niere juta Egipto yebätä aune kukwe nieta Isaías 19:3, 4 ye namani bare ño? 3) Nitre asirio bätä nitre nämene reire juta yete käkwe dre nuainbare aune dre namani bare juta yebätä ye Biblia tä mike gare, akwa ¿jondron kwani kä yekänti tä kukwe ye mike gare ño metre? (Nah. 3:1, 7, 13.) 4) ¿Kukwe meden niebare Babilonia yebätä abokän namani bare metre? (Jer. 20:4; 50:38; 51:30.) 5) ¿Kukwe niebare Medopersia yebätä ye namani bare ño? (Isa. 44:28.) 6) ¿Kukwe nieta Daniel 7:6 bätä 8:5, 8 ye namani bare ño juta Grecia yebätä? 7) ¿Roma namani dite krubäte juta madabiti ta ye ngwane Daniel 7:7 ye namani bare ño? 8) ¿César meden meden kädekata Bibliabätä? 9) ¿Nerón gobranbare ye ngwane dre namani bare nitre kristiano yebätä? 10) ¿Kukwe nieta Revelación 13:11 bätä 17:10 namani bare ño? 11) ¿Rei ni kwäkäre bämikata drebätä? 12) ¿Jondron meden mikata tuare video yete abokän tä mike gare kukwe nieta Eclesiastés 8:9 ye nemen bare metre? 13) ¿Kukwe meden Bibliabätä mä tö tuai nemen bare? 14) ¿Video nebiti mä raba nitre dimike ño ne kwe rabadre gare ietre Biblia ye kite Ngöbökri?