Nitre tä kukwe ngwentari

¿Kukwe nieta Salmo 144:12-15 ye juta Ngöbökwe kräke o nitre menteni töi käme kädekateta bersikulo 11 yete ye kräke?

Texto hebreore ye raba nüke gare bä jene jene nie. Aisete, kukwe ketebu ne tä ni dimike texto ye mike nüke gare kwin jai.

1. Salmo yekänti bersikulo mada mada tä yebätä töbikadre. Bersikulo 12 yekänti then nieta inglere ye tä mike gare, kukwe kwin nieta bersikulo 12 nemen 14 yete ye nieta nitre kukwe kwin nuainkä ye kräke. Nitre ye tä ‘ja mikamana kwäre’ nitre käme kisete Jehovai (bersikulo 11). Kukwe ye arabe mikata gare bersikulo 15 yete. “Kätä juto” nieta bobu bersikulo yekänti ye ngwane, tä blite juta arabebätä abokän tä “Jehová mike Ngöböre jai”.

2. Jehovakwe kukwe kwin mikai nemen bare nitre niara mikaka täte metre kräke mikata gare texto mada Bibliabätä yebätä ye erere nieta Salmo 144 yekänti. Jehovakwe juta Israel mikani kwäre rüe kisete ye bitikäre, juta ye mikai nüne kä jutobiti kwe aune kukwe kwin mikadi nemen bare kwe niaratre kräke käbämikani metre kwe salmo 144 yekänti (Lev. 26: 9, 10; Deut. 7: 13; Sal. 128: 1-6). Ñodre, Deuteronomio 28:4 tä niere: “Monsotre mäkwe aune nura nökadi mäkwe bätä nibi ngäbä mäkwe bätä oveja mäkwe ye ririai krubäte”. Erametre, Salomón David monsoi, nämäne gobrane ye ngwane juta Israel nämäne nüne jäme aune kwin. Akwa ye ñan aibe, Salomón gobranbare ye käkwe kukwe ruäre mikani gare Mesías gobrandi yebätä (1 Rey. 4: 20,21; Sal. 72:1-20).

Ye medenbätä, kukwe käbämikata Jehovakwe nie abokän ni Ngöbö mikaka täte tä ngübare ye Salmo 144 tä mike gare bäri merebe nie. Ye abokän, Jehovakwe nitre käme gaite, ni kukwe metre nuainkä mikai nüne kwin aune jäme kwe kärekäre (Sal. 37:10,11).