Ñaka kä jürä ngwan jabätä
1. ¿Ñobätä ni raba niere ni ñaka tä ‘kukwe kwin ye käbäire’ ni mada ye kräke?
1 Ni testiko Jehovakwe ñaka ‘kukwe kwin ye käbäire’ nitre mada ye kräke, ñakare aune Gobran Ngöbökwe tä kukwe kwin käbämike yebätä nita blite bentre (Pro. 3:27). Nitre jökrä ie rabadre gare Gobran ye käkwe dre mikai nemen bare ye abokän kukwe kwin krubäte kräketre. Ne madakäre, mätä ja di ngwen kukwe driere käre —ñodre, mätä täräkwata driere nitre madai o mätä kukwe driere kä jökrä ngwane— akwa mä raba kukwe mada nuainne arato: mä raba ni iti tötike Bibliabätä. ¿Ñobätä mä ñan ja töimike nuainne?
2. ¿Kukwe meden raba ni mike ñaka ni mada tötike Bibliabätä?
2 Ruäre ngwane, ni mada tötikadre Bibliabätä ye nuaindre ño ñan tä nemen gare nie, yebätä kä jürätä nemen nibätä o kä ñaka nemente nie nuainkäre. Kukwe nieta nete ye käkwe mun dimikai ñaka kä jürä ngwen jabätä aune mun töimikai ni iti tötike Bibliabätä (Mat. 28:19; Hech. 20:20).
3. ¿Ñobätä ni raba niere nita juto nitre tötikakäre Bibliabätä?
3 Ja ñan törö tie nuainkäre. Mä ñaka janamane kwela kri te, yebätä ja ñan törö mäi ni iti tötikakäre Bibliabätä. Akwa, ¿nitre kristiano siklo kena “käkwe ja tötikani ñakare amne [nämene] bobre” ye törö mäi? Akwa yebiti ta niaratre käkwe kukwe metre ye driebare kwin. ¿Ja tötikabare medente kwetre? Biblia tä mike gare: “Nitre ne käkwe dikakabare Jesube” (Hech. 4:13, Kukwe Kuin Ngöbökwe [KKN]). Erametre Dirikä Kri yebätä ja kitani kwetre. Niarakwe diribare ño nitre madai aune nuainbare ño kwe ye tä Bibliabätä, aune yebätä nikwe ja kitadre arato. Ye medenbätä, ni ñaka ja tötikabare kwela kri te, akwa ni jökrä tötikata kukwe Ngöbökwe yebiti aune ye bäri ütiäte jondron jökräbiti ta (Isa. 50:4; 2 Cor. 3:5).
4. ¿Amós käkwe kukwe nuainbare ye tä dre driere nie?
4 Ruäre ngwane Jehová nämene nitre bobre ye juen kukwe tare mike gare nitre kädekani krikri yei. Ñodre, ni iti kädeka nämene Amós käkwe niebare: “Ti rün ñaka ni Ngöbö kukwei niekä, ti ñaka nämene ni Ngöbö kukwei niekä erere, ti nämene obeja ngübarebiti aune ti nämene higo [...] däkete” (Amós 7:14). Yebiti ta, kä jürä ñaka namani Amós yebätä kukwe metre niekäre Amasías ni jondron ngwarbe mikaka ngöböre jai ye ngwärebätä (Amós 7:16, 17). Ye erere arato, nikwe ngwandre törö jai nita sribi Ngöbökwe nuainne aune niarakwe ni tötikai sribi ye nuainkäre (2 Tim. 3:17).
5. Sribita krubäte ni kisete akwa, ¿ñobätä nikwe ja di ngwandre ni iti tötike Bibliabätä?
5 Kä ñaka nemente tie. Erametre sribi tä nuaindre krubäte mäi, akwa mä tärä köbö ükete jai kukwe driekäre käre ¿ñan ererea? Mäkwe kä diandrekä ni iti tötikakäre Bibliabätä angwane, rükai gare mäi sribi ye käkwe kä mikai juto mäbätä. Kukwe Ngöbökwe tä nitre töi kwite ye abokän kukwe ütiäte krubäte (Heb. 4:12). Nita ja di ngwen nitre mada dimike ne kwe, “kukwe era metre [...] rabadre gare ni jökräye”, ye tä kämike juto Jehovabätä (1 Tim. 2:4, KKN). Ni iti tä ja töi kwite aune tä kite nirien kukwe ja üaire yebiti ye tä kämike juto angeletre yebätä arato (Luc. 15:10).
6. ¿Ngöbö töita ño ye mikakäre bare sribi meden ütiäte tä ni kisete?
6 “Niara tö ni jökrä diaintari amne, kukwe era metre [...] rabadre gare ni jökräye, ie niara tö” (1 Tim. 2:4, KKN). Ngöbö töita ño ye erere rabadre bare yekäre nita sribire arato. ¡Ye ütiäte krubäte! Ye medenbätä, ñaka kä jürä ngwandre jabätä nitre tötikakäre Bibliabätä.