Kä ñaka nemente krubäte mäi yei mäkwe ñaka ja ganaimana
1. ¿Ñobätä nitre ruäre ñaka ja tötika Bibliabätä driere?
1 Sribi krubäte nitre ruäre kisete yebätä ñaka tö ja tötika Bibliabätä driedi. Erametre ni mada tötikakäre Bibliabätä kä diankata krubäte jai: ni rabadre ja ükete ja tötika ye kräke, ja tötike niarabe aune dimikadre ja tuin kukwe tare ben. Apóstol Pablo niebare, niarakwe ja brukwä tätebiti kukwe metre driebare nitre Tesalónica ie (1 Tes. 2:7, 8). ¿Ni raba kä denkä ño jai ni mada tötikakäre Bibliabätä?
2. ¿Jehová tare nikwe ye rabadre ni töi mike sribire ño kätä nemente nie yebiti?
2 Kä diandrekä jai sribi Jehovakwe nuainkäre. Nita sribi keta kabre nuainne Ngöbö mikakäre täte. Bämän kratire kratire nita kä denkä jai nänkäre gätäbätä, kukwe driekäre, ñäkäkäre Bibliabätä aune orasion nuainkäre. Ani töbike kukwe nebätä: ni gure, kisete sribi tädre krubäte, akwa yebiti ta tädre kä jutobiti kä denkä jai muko brare o merire kräke. Ye erere arato, ni Jehová tarekä krubäte, ye rabadre kä denkä jai Jehová mikakäre täte (Efes. 5:15-17; 1 Juan 5:3). Jesukwe niebare, Ngöbö mikakäre täte ni rabadre ni mada tötike Bibliabätä (Mat. 28:19, 20). Nikwe töbikai kukwe nebätä ye käkwe ni dimikai ja töi mike ni mada tötike Bibliabätä.
3. Kukwe ruärebätä kä ñaka tä nemente nie, ¿akwa ni raba dre nuainne ni mada tötikakäre Bibliabätä?
3 Akwa ¿bren kräkäi ñaka kisete nita bren, sribita krubäte ni kisete o sribi Ngöbökwe tä nuaindre nie köböite kä ñaka tä nemen nie ye ngwane dre raba nemen bare? Ni ruäre tä bren yebätä ruäre ngwane tä ni ja tötikaka Bibliabätä kärere ja gwirete. Nitre mada kukwe driekä tä niken gwä gwä kä mada känti yebätä tä ja tötike Bibliabätä ni ja tötikaka ben yebe teléfono o computadora yebiti. Aune ja mräkätre mada tä blite nitre mada konkrekasionte kukwe driekä abokän raba ni mada tötike yebe, ne kwe niaratre ñaka raba ni mada tötike ye ngwane ja mräkätre ye rabadre niken ni ye tötike niaratre täte.
4. ¿Nikwe ni mada tötikai Bibliabätä ye köböire dre kwin rabai nikwe?
4 Pablo kä dianinkä jai aune ja di ngwani kwe nitre mada dimikakäre kukwe metre mike gare jai ye käi namani jutobätä (Hech. 20:35). Niarakwe sribibare ye köböire kä Tesalónica yekänti kukwe kwin namani kwe ye käkwe töi mikani debe bien Jehovai (1 Tes. 1:2). Kä ñaka nemente krubäte nie akwa yebiti ta nikwe ni mada tötikai angwane, bäri nikwe kukwe driedi kä jutobiti.