Ja tötikadre kaibe bätä ni mräkätre yebe ye ütiäte krubäte
1. ¿Nitre Braibe konkrekasion jökrä ngübabitikä töita drebätä nikrä kä nengwane, aune ñobätä tä nuainne?
1 Siklo kena ye erere, Nitre Braibe konkrekasion jökrä ngübabitikä ye kätä juta Jehovakwe ngübarebiti ne kwe tädre kwin (Hech. 15:6, 28). Kukwe tare krubäte rabai bare ye nibira ja ken ye tuin nie, ye medenbätä kä nengwane ni Gobran Ngöbökwe kukwei driekä käkwe ja mäkädre bäri kwin Jehovabe. ¿Kä dianka nämene Ja Tötikakäre täräbätä Konkrekasionte rabaite, yete nikwe dre nuaindi? Ni jökrä käkwe kä ye diandrekä jai ja tötikakäre Bibliabätä ni mräkätre yebe. Ne köböire nikwe ja tötikai bäri Kukwe Ngöbökwe yebätä bätä ñö ja nirekrä ye rabai nikwe (Sal. 1:1-3; Rom. 11:33, 34).
2. ¿Ño ni raba köbö ükete jai ja tötikakäre ni mräkätre yebe?
2 Köbö diandrekä ja tötikakäre ni mräkätre yebe. Nitre ji ngwanka mräkätre käne ye kisete Jehovakwe sribi mikani, ye erere nunta nübaire nuainne bätä ja tötika Bibliabätä ye nuaindre käre kwetre mräkätre yebe (Deu. 6:6, 7). Nitre ñaka gure aune mräkätre ñaka ngübadre ie, ye käkwe kä ye diandrekä jai ja tötikakäre bäri kwin kaibe Bibliabätä. Ütiäte krubäte ni itire itire käkwe “kä nemente nie ye nikwe kökadre jökrä jai” ja tötikakäre bätä töbikakäre kukwe yebätä. Ne kwrere ni täi dite kukwe ja üaire yebiti, ye abokän ribeta nikwe “kä käme krubäte” nete (Efe. 5:15, 16).
3, 4. ¿Drebätä ja tötikadre, aune drekäre nuaindre?
3 Drebätä ja tötikadre. Tärä Índice de las publicaciones Watch Tower bätä CD-ROM Watchtower Library ye käkwe ni dimikai kukwe känene, abokän rabai tuin kwin nie ja tötikakäre ni mräkätre yebe. Kukwe kädrieta täräkwata La Atalaya yebätä ni ja mräkäre raba ja tötike, ñodre: “Kukwe kwin ni ja mräkäre kräke”, “Monsotre mäkwe ye tötika” bätä “Monsotre bati kräke”. O kukwe kädrieta täräkwata ¡Despertad! yebätä ja tötikadre, ñodre: “Monsotre bati kätä kukwe ngwentari” o jondron kwin krubäte sribebare Ngöbökwe kädrieta yebätä.
4 Ñäkädre bätärekä Bibliabätä ye köböire kukwe ye raba nemenkä ni töibätä aune ni brukwäbätä (Heb. 4:12). Arato nitre testiko Jehovakwe käkwe video ükaninte ye ni raba tuin aune kädriere jabe. Kukwe keta kabrebiti ni raba ja töimike kukwe ükete jai ja tötikakäre. Dre tuin bäri kwin ni mräkätre yei ye ni raba ngwentari ietre.
5. ¿Ñobätä ütiäte krubäte kä nengwane nikwe ja tötikadre kaibe bätä ni mräkätre yebe?
5 Ñobätä bäri ütiäte kä nengwane. Ni tädre dite kukwe ja üaire yebiti, ye angwane ni tädi juto biare kukwe ne nuainkäre: “Munkwe nünanka dite aune Jehová käbike mun mike kwäre ye mika ñärärä” (Éxo. 14:13). Nitre rüne kätä Kukwe Ngöbökwe ye ribere jai monsotre kwe ye ngübakäre “nitre töi käme krubäte kä nebätä ye ngätäite” (Fili. 2:15). Bätä monsotre ye tä ja di ribere ja tuakäre ja mika gure ngwarbe kädrieta bätä nuainta kwelate yebe (Pro. 22:3, 6). Nitre gure metre käkwe “kö krämä” ükanite Jehovabe ye mikadre dite (Ecl. 4:12). Ye medenbätä, kä nemente nie ye ni jökrä käkwe diandrekä jai kukwe utiäte erere nuainkäre ne kwe “tödeka deme” nikwe ye mikadre bäri dite (Jud. 20).