Kukwe ütiäte ni ja mräkäre kräke
1. ¿Köbö sabado ye köböire dre kwin nämene nemen nitre israel yekwe?
1 Jehová nämene nitre israel tarere, yebätä kukwe ükaninte kwe köbö sabado ye kräke, ne kwe jondron kwin rabadre kwetre. Köbö yete niaratre ñaka nämene sribire aune kä nämene nemente ietre töbikakäre Jehová töi kwin yebätä aune nämene ja kete ño ben yebätä arato. Ne madakäre nitre rüne nämene kukwe Ngöbökwe ye driere monsotre kwe yei, ne kwe kukwe ye rabadre nemen brukwäte (Deu. 6:6, 7). Kukwe ye köböire, sabado kratire kratire te kä nämene nemente juta Jehovakwe ie ja töimikakäre kwatibe kukwe ja üaire yebätä.
2. ¿Kukwe ükaninte köbö sabado ye kräke ye tä dre driere nie Jehovabätä?
2 Kä nengwane Jehová ñaka tä ribere nitre ja mräkäre rabadre köbö sabado ye mike deme jai. Akwa, kukwe ükaninte ye tä kukwe mike gare nie Ngöbö nikwe yebätä: käre niara töita juta kwe ye dimikakäre kukwe ja üaire yebiti (Isa. 48:17, 18). Kä nengwane ja tötikadre ni Mräkätre yebe, yebiti tä bämike niara töita nibätä.
3. ¿Ja tötikadre ni Mräkätre yebe ye ñokäre ükaninte?
3 ¿Ja tötikadre ni Mräkätre yebe ye ñokäre ükaninte? Enero kä 2009 ye ngwane, Ja Tötika täräbätä Konkrekasionte ye nuainta keteitebe Kwela Sribi Ngöbökwe Kräke bätä Gätä Sribi Ngöbökwe Nuainkäre yebe. Kukwe keta kabrebätä kukwe ye ükaninte; keteiti abokän nitre ja mräkäre rabadre köbö ükete jai bämän kratire kratire te Ngöbö mikakäre täte gwairebe mräkätre kwe yebe, ne kwe niaratre rabadre dite kukwe ja üaire yebiti. Ye medenbätä, nitre ja mräkäre nübaibare köbö medente ja tötika nämene täräbätä konkrekasionte, yete ja tötike mräkätre kwe yebe, ja tötike kwin Bibliabätä aune kukwe meden ütiäte kräketre yebätä arato.
4. ¿Ja tötikadre ora kratibe te? Mäkwe mika gare.
4 Ja Tötika täräbätä Konkrekasionte yete ni nämene niken ye ngwane, ni nämäne kä denkä jai ja mikakäre juto, aune nänkäre gätä yebätä. Ye medenbätä, ora kratibe te gätä ye nuain nämene, akwa gätä ye nämene niken ora ngwena bäri ja mräkätre kwati kän. Kukwe ükaninte mrä gätä ye kräke, ye köböire ora meden te gätä ye nuain nämene ye nita denkä jai Jehová mikakäre täte gwairebe ni mräkätre yebe, akwa ni ñaka rabadre nütüre nikwe ja tötikadre ora kratibe te. Kukwe meden raba nitre ja mräkäre dimike bäri yebätä töbikadre aune ye ererebätä ora diandrekä jai ja tötikakäre bentre.
5. ¿Ni mräkätre ye aibe ben ja tötikadre? Mäkwe mika gare.
5 ¿Ni mräkätre ye aibe ben ja tötikadre? Nitre ja mräkäre bätä nitre gure monsoi ñaka tätre ja tötike gwairebe kukwe Bibliabätä, ye ngwane tätre ja dimike kwärikwäri (Rom. 1:12). Arato ye köböire nitre ja mräkäre tä nüne bäri kwin jabe. Ye medenbätä, ni rabadre kukwe Bibliabätä ye kädriere jabe kwärikwäri, Ja tötikadre ni Mräkätre yebe ye ngwane. Akwa, ruärekänti nitre ja mräkäre itire itire rabadre kä denkä jai ja tötikakäre kaibe arato. Ñodre; ja tötika ye krütadre ye bitikäre, nitre ja mräkäre raba nemen keteitebe, akwa itire itire raba ja tötike kaibe gätä konkrekasionte ye kräke o raba ñäke täräkwatabätä. Köbö ye ngwane nitre ja mräkäre ruäre ñaka tätre televisión ye trä mikekä.
6. ¿Ja tötika ye nuain raba ño?
6 ¿Nuaindre ño? Kukwe ngwantaridre aune nitre mada käkwe mikadre gare ye ñan aibe nuaindre. Gätä nuainta bämän kratire kratire te ye kwrere nitre ja mräkäre ruäre tätre nuainne; kukwe medenbätä ja tötikai ye tätre kädriere keteitire keteitire aune tätre nuainne jene jene, ne kwe ja tötika ni mräkätre yebe ye nuaindre kä jutobiti. Ñodre, tätre ñäke gwairebe Bibliabätä, tätre ja tötike gätä kräke, aune tätre ja kite kukwe driekäre. Dre nuain raba mada ye mikata gare página 6 yebätä.
7. ¿Nitre rüne rabadre ja töimike ño ja tötika ye nuainkäre?
7 ¿Nitre rüne rabadre ja töimike ño ja tötika ye nuainkäre? Monsotre tötikata töi jämebiti ye ngwane kukwe raba nüke gare bäri kwin ietre. Raba nemen angwane ja tötika raba jubäre. Arato, ni rabadre nainte krubäte ye ngwane ni raba jadüke chi. Nitre ja mräkäre ruäre tätre jondron kwete gätä ye bitikäre. Erametre, nitre rüne rabadre mäträre monso kwe yebätä, akwa Ja tötikadre ni Mräkätre yebe ye ngwane ñaka rabadre ngren ngren monso kwe yebiti. Törbadre kukwe niei monso kwe yei angwane nuaindre kwe kä kaibe te köbö mada ngwane, ne kwe ñaka monso ye mikadre jakaire mräkätre mada ye okwäbiti. Ngöbö ñaka ulire, aisete Ja tötikadre ni Mräkätre yebe ye ngwane ñaka nuaindre krenbe aune köböbe kwärä, ñakare aune nuaindre kä jutobiti (1 Tim. 1:11).
8, 9. ¿Ni rüne rabadre dre nuainne ja tötika ye kräke?
8 ¿Ni rüne rabadre dre nuainne? Ja tötikadre ni Mräkätre yebe, ye ngwane kukwe medenbätä ja tötikai ye kräke ni rüne käkwe ja ükadrete kwin aune kukwe ye matai bäri kwin mräkätre kwe yebätä (Pro. 21:5). Niara raba ja di kärere kwäräi kwe yei (Pro. 15:22). Arato, ¿ja tötika yebätä mä tärä kukwe ngwentari monso mäkwe yei? Ye erere mäkwe nuaindi angwane dreta niaratre töibätä o dreta töi nike ye rabai gare mäi.
9 Ruäre ngwane ni rüne ñaka rabadre kä denkä krubäte jai ja tötikakäre. Ja tötikadre bämän kratire kratire te, ye nuaindre ño ye gare nitre ja mräkäre yei, ye medenbätä nitre rüne ye ñaka rabadre käre kukwe mrä ükete ja tötikakäre. Ja tötika ni mräkätre yebe ye krütadre angwane ni rüne raba ja ükete kukwe kädriekäre bämän mada kräke, ñobätä ñan aune kukwe meden raba mräkätre kwe dimike ye täi niaratre töite. Kukwe medenbätä ja tötikai köbö madate ye ni rüne ruäre tä tike täräkwatabätä biti tä mikekä rabadre tuin mräkätre yei yekänti, ñodre tätre ketekä kribätä gwi. Ye erere nuaindre angwane ye raba kä mike nuäre nitre ja mräkäre yebätä, niaratre törbai ja tötikai aune niaratre rabai kä denkä jai ñäkäkäre kukwe yebätä.
10. ¿Ja tötikadre ni Mräkätre yebe, köbö yete nitre kaibe rabadre dre nuaindre?
10 Tita kaibe, ¿ti raba dre nuainne? Ja tötikadre ni Mräkätre yebe, yete nitre kaibe käkwe ja tötikadre. Nitre kaibe raba ñäke Bibliabätä, ja tötike gätä kräke aune raba ñäke La Atalaya bätä ¡Despertad! yebätä. Ja mräkätre kaibe ruäre tätre kukwe mada känene kukwe mikakäre gare bäri kwin jai. Arato, raba ni kukwe driekä mada o nitre ja mräkäre mada ye nübaire ja tötike ben Bibliabätä.
11, 12. ¿Käre Ja tötikadre ni Mräkätre yebe ye köböire dre kwin tä nemen nikwe?
11 ¿Ja tötikadre käre ni mräkätre yebe ye ngwane dre kwin raba nemen nikwe? Nita Ngöbö mike täte ja brukwä ngöibiti ye käkwe ni mikai nökrö bäri Jehová ken. Arato, nitre ja mräkäre tätre Jehová mike täte gwairebe ye ngwane tätre ja tarere bäri. Kukwe yebätä nitre gure käkwe niebare: “Nun nibu tä sribi prekursor ye nuainne, monso ñaka nunkwe ye medenbätä köbö Ja tötikadre ni Mräkätre yebe ye nunta ngübare kä jutobiti. Tä nun mike ja tarere aune nökrö bäri ni Rün kä kwinbiti ye ken. Köbö ja tötikakäre ye tä nüke angwane nunta nüke ngwäte aune nunta ngwentari jai: ‘¿dre nuaindre matare ye tä törö mäi? ¡Ja tötikadre ni Mräkätre yebe ye tä nuaindre matare nie!’”.
12 Nitre ja mräkäre ie sribi tä nuaindre krubäte, akwa tätre köbö ükete jai ja tötikakäre mräkätre kwe yebe, ye köböire jondron kwin tä nemen kwetre. Meri iti tä monso brare nibu ngübare kaibe aune tä sribi prekursor regular ye nuainne käkwe kukwe ne tikabare: “Kena, ja tötika ye nämene nüke törö tie angwane ti nämene nuainne. Ti nämene nainte krubäte yebätä nun nämene ja tötike nane nane. Kä ñaka nämene nemente tie ja tötikakäre ti mräkätre yebe. Ye medenbätä, tita kukwe ne tike debe biankäre munye Ja tötikadre ni Mräkätre yebe ye ükaninte yebätä. Kä nengwane nunta ja tötike bämän kratire kratire te aune ye köböire jondron kwin nibira nemen nunkwe”.
13. ¿Jondron kwin rabadre ni ja mräkäre yekwe yekäre dre nuaindre kwetre?
13 Jehovakwe kukwe ükaninte köbö sabado ye kräke, ye erere arato niara ni Rün kä kwinbiti käkwe Ja tötikadre ni Mräkätre yebe ye ükaninte, ne kwe jondron kwin rabadre nitre ja mräkäre yekwe (Sant. 1:17). Kirabe, nitre israel nämene dre nuainne köbö sabado yete ye ererebätä jondron kwin nämene nemen kwetre kukwe ja üaire yebiti. Ye erere arato, kä nengwane jondron kwin rabadre nikwe kukwe ja üairebiti, yekäre nita dre nuainne köbö biani nie ja tötikakäre ni mräkätre yebe, yebätä nikwe töbikadre (2 Cor. 9:6; Gál. 6:7, 8; Col. 3:23, 24). Ja tötikadre ni mräkätre yebe ye mätä nuainne angwane salmista käkwe kukwe niebare ye erere mäkwe niei: ‘Tikwe krötadre Ngöbö ken ye bäri kwin ti kräke. Ti Rün Kri yei tita tö ngwen ja kriemikakäre’ (Sal. 73:28).
[Rekwadro de página 5]
Ngöbö ñaka ulire, aisete Ja tötikadre ni Mräkätre yebe ye ngwane ñaka nuaindre krenbe aune köböbe kwärä, ñakare aune nuaindre kä jutobiti
[Rekwadro de página 6]
Ñaka kitadrekä
Ja tötikadre ni Mräkätre yebe ye ngwane ne nuain raba
Biblia:
• Kukwe dianinkä Bibliabätä ñäkäkäre bämän kratire kratire te yebätä ñäkädre. Ni iti rabadre ja mike ni blitaka ye erere aune ñäkädre kwe Biblia yebätä. Nitre madabätä blitata angwane ni ja mräkäre mada rabadre ñäke kukwe yebätä.
• Capítulo ruäre Bibliabätä ye bämikadre.
• Capítulo dianinkä ñäkäkäre Bibliabätä ye nitre ja mräkäre käkwe ñäkädre känenkribätä, aune itire itire käkwe kukwe keteiti o ketebu tikadre täräbätä ngwantarikäre. Ye bitikäre kukwe ye känändre gwairebe kwetre.
• Bämän kratire kratire te texto tikadre keteiti täräkwatabätä aune mikadre gare jai ja töite aune tä dre mike gare yebätä blitadre. Texto ye ükadrekrö aune ja tötikadretabätä bämän kratire kratire, ne kwe rabadre gare nie texto kräbe tädre törö nie.
• Kukwe Bibliabätä grababare ye kukwe nuadre aune mikadre ñärärä Bibliabätä.
Gätä:
• Ja tötikadre gwairebe gätä ye kräke.
• Kantiko ükaninte kantakäre bämän kratire kratire te yebätä ja kitadre.
• Kukwe biani kädriekäre Kwela Sribi Ngöbö Kräke o kukwe biani bämikakäre Gätä Sribi Ngöbökwe Nuainkäre yete, ye ngwane nuaindre ño o bämikadre ño yebätä ja kitadre.
Kukwe nitre ja mräkäre kräke:
• Ja tötikadre tärä Los jóvenes preguntan o Aprendamos del Gran Maestro yebätä.
• Kukwe meden ben ja tuata kwelate yebätä ja kitadre.
• Kukwe bämikadre yekänti ni rüne käkwe ja mikadre monso kwrere aune monsotre käkwe ja mikadre rün kwe ye kwrere. Monso käkwe kukwe mada känändre rün kwe ye töi mikakäre kukwe metre yebätä.
Kukwe driekäre:
• Bämän krüte yebätä kukwe medenbätä blitai kukwe driekäre yebätä ja kitadre.
• Kukwe ükadrete nitre ja mräkäre töi mikakäre kukwe driere bäri, kä bianta ngwarbe ietre o Jesús ja nire biani ye Ngwanta Törö jai ye ngwane.
• Nita kukwe driere ye ngwane kukwe ruäre ngwantarita nie, kukwe ye mika raba gare ño ye ni ja mräkäre itire itire rabadre känene ye bitikäre ja kitadre nuainkäre.
Kukwe mada nuain raba:
• Täräkwata sribebare mrä yebätä ñäkädre gwairebe.
• Nitre ja mräkäre itire itire ie kukwe meden tä täräkwata yebätä abokän tuin kwin ietre, yebätä ñäkädre käne kwetre, biti blitadre kukwe yebätä kwetre.
• Ruäre ngwane ni kukwe driekä mada o nitre gure ye nübaidre aune kukwe ngwandretari ietre.
• Video tuadre aune kädriedre jabe.
• Ja tötikadre gwairebe sección “Los jóvenes preguntan” bätä “Actividades para la familia” tä täräkwata ¡Despertad! yebätä.
• Ja tötikadre gwairebe sección “De padres a hijos” bätä “El rincón del joven” tä täräkwata La Atalaya yebätä.
• Sección tä Anuario yebätä o tärä mrä biani gätä kri köbömä yete, yebätä ñäkädre aune kädriedre arato.
• Kukwe ütiäte kädriebare gätä kri köböiti, köböbu o köbömä yebätä, ye mikadreta törö jai.
• Jondron sribebare Ngöbökwe ye mikadre ñärärä aune jondron ye tä dre driere Ngöböbätä nie yebätä blitadre jabe.
• Maqueta, mapa o gráfico ye sribedre ngwairebe.