Jondron ütiäte krubäte tä nikwe mikadre gare
1 Kukwe Ngöbökwe yebätä jondron ütiäte ja üairebiti raba kwen, ye abokän ütiäte krubäte nikrä (Sal. 12:6; 119:11, 14). Bati Jesukwe blitabare känti kukwe keta kabrebiti Gobran Ngöbökwe ye bämikani kwe, biti ngwanintari kwe nitre ja tötikaka ben yei: “¿Kukwe jökrä ne dre gärätä nü gare munye?” Jän niebare ie angwane niebare kwe ietre: “Ye erere aune, ni jökrä töbätä, tötikani gobran kä kwinbätä yebätä ngwane, ye abokän ni brare ju bökänkä ye kwrere, abokän kätä jondron ütiäte mrä bätä kira kwe ye dente aune mike gare” (Mat. 13:1-52).
2 Ni jatani ja tötike ye ngwane, kukwe metre Bibliabätä namani gare käne nie, ye jondron ütiäte krubäte kira ye kwrere ni raba niere. Kukwe ñaka nüke gare yebätä nita ja tötike jankunu Kukwe Ngöbökwe yebätä, ye köböire kukwe mada metre Bibliabätä tä nemen gare nie ye abokän jondron ütiäte mrä tä kwen nie ye kwrere (1 Cor. 2:7). Ne madakäre, “nitre sribikä täte metre bätä töbätä” ye köböire kukwe mada mrä ütiäte tä nüke gare nie (Mat. 24:45).
3 Jondron kira aune mrä ütiäte ja üaire yebiti, ye ütiäte krubäte nikrä. Ne käkwe ni töi mikai ja kite bäri aune ja töimike nirien ni mada tötikakäre Kukwe Ngöbökwe yebiti, kukwe ütiäte namani gare nie ye nikwe mikai gare ni mada ie töi kwinbiti.
4 Nikwe ja tötikadre Jesubätä. Jesukwe ja di ngwani kukwe Ngöbökwe ye mike gare ni madai, yebiti bämikani kwe kukwe ye nämene tuin jondron ütiäte ye kwrere ie. Ruäre namani di nekä, akwa ye bitita kukwe ütiäte nämene gare ie ye mikani gare kwe (Juan 4:6-14).
5 Nitre tönamani Ngöbö mikai gare jai ye nämene tare Jesukwe, ye käkwe niara töi mikani kukwe ütiäte Bibliabätä ja nirekrä ye mike gare ietre (Sal 72:13). Nitre ie mrö nämene kukwe ja üaire yebiti ye namani tuin bobre ie, ye käkwe töi mikani “jondron krubäte driere” ietre (Mar. 6:34).
6 Nikwe nuaindre Jesús erere. Jondron ütiäte tä nikwe ye tuin ütiäte nie angwane, kukwe ütiäte keta kabre ja üaire yebiti tä Bibliabätä, ye nikwe mikai gare nitre madai Jesukwe nuainbare ye erere (Pro. 2:1-5). Ruäre ni di raba nekä, akwa ye bitita nikwe kukwe metre ye mikai gare ja brukwä jutobiti nitre mada ie (Mar. 6:34). Jondron ütiäte ja üairebiti tä nikwe ye tuin ütiäte nie angwane, ye käkwe ni töi mikai käre ja di ngwen kukwe driere bäri.