¡Mä raba nemen dirikä!
1. ¿Sribi meden ütiäte nitre kukwe driekä jökrä raba nuainne?
1 Kukwe metre driedre ni madai ye sribi keteiti nuainta nikwe abokän kätä bäri kä ngwen juto nibätä. Ni iti tö kukwe metre mikai gare jai kätä kukwe Gobran Ngöbökwe kain ngäbiti, ye nita dimike nökrö Jehová ken bätä tä kite ja töi kwite aune ja ngwen kwin, ye raba bäri kä ngwen juto nibätä (Sant. 4:8). Nitre kukwe driekä jökrä käkwe ja töi mikadre kukwe ne nuainne (Mat. 28:19, 20).
2. ¿Ñobätä nitre ruäre ie ja ñaka nüke törö ni mada tötikakäre Bibliabätä, aune ñokänti raba nuainne?
2 Tö ngwandre Jehovai. Nitre kirabe Ngöbö mikaka täte metre, ie ja namani ruin ñaka töbätä sribi Ngöbökwe ye nuainkäre. Ñodre: Moisés, Jeremías, Amós bätä nitre mada ye nitre ngwarbe ni ne erere. Akwa tö ngwani kwetre Jehovai, yebätä ñaka kä jürä ngwani jabätä kwetre sribi kri Ngöbökwe ye nuainkäre (Éxo. 4:10-12; Jer. 1:6, 7; Amós 7:14, 15). Apóstol Pablo käkwe blitabare jabätä bätä mräkätre mada yebätä: “nunkwe ñaka kä jürä ngwanba jabätä” o metrere “nunkwe blitaba metre”. ¿Nirekwe dimikani? Pablo käkwe niebare: “Ngöbökwe nun dimikaba” (1 Tes. 2:2, nota). Ye medenbätä ni raba tö ngwen metre Jehová käkwe ni dimikai, ni mikai töbätä kwe ni mada tötikakäre Bibliabätä aune rabadre ja töi kwite (Isa. 41:10; 1 Cor. 1:26, 27; 1 Ped. 4:11).
3, 4. ¿Drebiti ni tötikata ni dimikakäre Kukwe Ngöbökwe driere?
3 Ja tuenmetre tötikadre. Kukwe ja üaire ükaninte yebiti Jehová ni Tötikaka Kri kätä ni tötike käre, ne kwe nikwe ni mada tötikadre bäri kwin (Isa. 54:13; 2 Tim. 3:16, 17). Kukwe metre Bibliabätä ye rükadre gare bäri nie aune nikwe ni mada tötikadre bäri kwin, yekäre nikwe ja tuanemetre tötikadre. Kukwe nekäre metrere Kwela Sribi Ngöbökwe kräke bätä Gätä Sribi Ngöbökwe nuainkäre ye ükaninte, akwa gätä jökrä nuainta konkrekasionte ye tä ni tötike kukwe Ngöbökwe ye driekäre.
4 Nikwe ja di ngwandre ja tötike, ne kwe kukwe Ngöbökwe ñaka nüke gare jötrö ye nikwe driedre bäri nuäre. Yekäre, kukwe nieta tärä Benefíciese yebätä página 227 känti ye erere nuaindre: “Mä törba kukwe ye mikai nüke gare ni madai aune käne mäkwe mika gare kwin jai”. Ne mada, nikwe kukwe niedre gätäte ye käkwe ni dimikai kukwe ütiäte kädrieta ye ketete ja töibätä ni mada tötikakäre. Yebätä mäkwe ja tötika kwin, aune ja rabai ruin bäri kwin mäi ni mada tötikakäre.
5. ¿Ni tötikata ño konkrekasionte arato ne kwe ni rabadre dirikä kwin?
5 Nitre kristiano kena nämene nitre mada tötike ño yebätä nämene ja tötike kwärikwäri (Luc. 10:1). Niaratre käkwe nuainbare ye erere, nikwe ja di ngwandre ni mada tötike ni kukwe drie gare bäri ie yebe, ñodre, nitre prekursor, ni umbre, ni ni tuabitikä konkrekasionte yebe. Jondron mada ükaninte ni tötikara bätä jondron üai bämikani täräkwata yebätä, yebiti kukwe metre Bibliabätä ye drieta ño kwe ye mäkwe mika ñärärä. Mäkwe ja di kärä ie dirikäre bäri kwin (Pro. 1:5; 27:17). Kukwe jökrä drieta ye Ngöböta ni tötike ye kwrere mäkwe mika tuin jai (2 Cor. 3:5).
6. ¿Dre ribeta metrere nikwe kukwe Ngöbökwe dirikäre kwin?
6 Mäkwe tö ngwan Jehovai bätä tä ni tötike ye mäkwe ñaka juan ja bäre. Mä tö ririai kukwe ja üairebiti ye mäkwe mika gare orasionte Ngöböi (Sal. 25:4, 5). Mäkwe nuaindre ne erere angwane kä raba nemen juto mäbätä, ni mada dimike nemen mä kwrere: ¡Kukwe Ngöbökwe dirikäre kwin!