Köbö kwin krubäte nitre nübaikäre ja tötike Bibliabätä
1 Sö enero yebätä ja känenkäre, konkrekasion jökrä käkwe sö kratire kratire te kä diainkä köböiti bämän krüte yebätä nitre nübaikäre ja tötike Bibliabätä ne nuain raba bämän kena yebätä. Rabadre kwin konkrekasion kräke ye ererebätä nuain raba sábado o domingo yete. Nitre käkwe ñaka ja tötika Bibliabätä ye kadre ngäbiti angwane, tärä Enseña o täräkwata La Atalaya bätä Despertad bäri mrä ye mikate raba ietre. Nitre umbre bätä nitre sribikä konkrekasionte jökrä rabadre kä denkä jai sribi ne nuainkäre bäri bätä nitre kukwe driekä ye dimikakäre ja tötika Bibliabätä ye kömike nitre madabe.
2 Nitre Umbre Sribi Ngöbökwe jie ngwanka Konkrekasionte käkwe bämän krüte diainkä sribi ye nuainkäre. Kukwe ye ngwandre törö jankunu konkrekasion yei, ne kwe ja mräkätre käkwe ja ükadrete aune ja di ngwandre nitre mada tötikakäre Bibliabätä ju ju te bätä nitre tö namani kukwe mikai gare jai ye tuabitikäreta.
3 Ja ükadrete ño. Täräkwata Nuestro Ministerio del Reino sö enero kä 2006 yete täräkwata jatani känti kukwe mikata gare yebätä mun raba ñäke bätä tärä Razonamiento página 11 bätä 12 yekänti arato. O, mun törba angwane, munkwe ja ükate täräkwata ¿Mä törba kukwe metre ye mikai gare jai? ye driekäre. Ne madakäre, täräkwata Nuestro Ministerio del Reino sö Agosto kä 2007 página 3 yekänti kukwe keta kabre mikata gare ja tötika Bibliabätä kömikakäre nitre käkwe täräkwata La Atalaya bätä Despertad kani ngäbiti yebe. Nitre umbre bätä nitre sribikä konkrekasionte käkwe gätä nuaindi— 10 nemen 15 minuto näre kukwe driekäre—, ye ngwane ja tötikadre o kukwe keteiti o ketebu ütiäte bämikadre ja tötika Bibliabätä kömikakäre.
4 Nitre jökrä käkwe ja tötika Bibliabätä ye kain ngäbiti ni ñaka raba nütüre, o kain ngäbiti kwetre angwane nuaindi jankunu kwetre ye ni ñaka raba nütüre arato. Akwa ye käkwe ñaka ni ngwandre di nekä, ne ñan ñobätä aune Jehová kätä nitre töi jäme ye ngwen juta kwe yekwäre (Juan 6: 44). Ne madakäre, kukwe metre ye ñaka nökadre jrekäbe nikwe, ñakare aune ngübadre aune ngätrie niena yebiti ñö metadrekä, ne abokän nitre brukwä kwin yebe ja tötikadre Bibliabätä gärätä. Ngwen törö jai ne nuainta nikwe angwane, nita ja mike “sribikä Ngöbökrä” (1 Cor. 3:9).