Ni tädre juto biare ja tötika kömikakäre
1. ¿Kukwe meden nuaindre Mateo 28:19, 20 ye mikakäre täte?
1 Jesukwe niebare ‘nän ti mike gare ne kwe nitre rabadre näin ti jiebiti’ (Mat. 28:19, 20). Ye medenbätä, ni tädre juto biare ja tötika Bibliabätä kömikakäre kä jökrä ngwane, köbö biani ja tötika driekäre bämän krüte yebätä ye ñan aibe ngwane nuaindre. Kukwe nieta nete ye raba ni dimike.
2. ¿Nire nire ie ni raba ja tötika Bibliabätä driere?
2 Driedre. Nita ja tötika driere käre angwane ni raba ni iti tötike (Ecl. 11:6). ¿Mätä blite kena ni madabe ye ngwane mätä ja tötika driere ie? Juta Estados Unidos, konkrekasion keteiti käkwe ja di ngwani gwaire nuainne sö krati te, aune ye köböire ja tötika kömikani nitre 42 ben. Ne madakäre, nitre tö kukwe mikai gare jai yekänti mä rikadre, angwane mäkwe ñan töbika niaratre ie gare mätä ja tötika Bibliabätä ye driere. Mä rikadreta känti angwane mäkwe ja tötika drie bengwairebe ie. Ñaka kadre ngäbiti kwe aune ñan töbika, mä raba kukwe mada nuainne töimikakäre Biblia yebätä. Arato, nitre nünanka mä bäre, mä mräkätre bätä sribi muko o nitre nänkä kwelate mäbe törba ja tötikai Bibliabätä ye mäkwe ngwantari ietre. Nitre niena ja tötike, mräkätre o ja ketamuko kwe yei mä raba ja tötika Bibliabätä driere arato.
3. ¿Täräkwata meden tä nikwe ja tötika kömikakäre, aune kä meden känti kukwe drie rababiti?
3 Täräkwata nebiti nuaindre. Täräkwata ¿Mä törba kukwe metre ye mikai gare jai? yebiti ja tötika Bibliabätä kömika raba. Täräkwata ye bian raba nitre jökrä ie. Jondron rürübäinta yekänti, ji ngrabare, tärä tikata bätä nitre tuabitita o nitre ñaka tä kwen gwi nie, ye ngwane täräkwata yebiti kukwe drie raba. Mätä niken kä mada känti, sribi känti o jondron kökö, ¿ye ngwane mätä niken ngwena jai? Ja tötika drieta ño ye kädrieta página mrä yebätä.
4. ¿Täräkwata Kukwe metre yebiti ja tötika kömika raba ño?
4 ¿Täräkwata ye drie raba ño? Mäkwe bian nitre ie angwane kukwe ngwantarita yete ye mäkwe drie, biti mäkwe nie: “¿Kukwe meden nibi tuin ütiäte mäi?” Ye bitikäre, párrafo meden tä kukwe ye mike gare yebätä mäkwe blita ben bätä página mrä känti ja tötika drieta yebätä mä raba ñäke o kädriere jötrö ngwarbe. Tärä Enseña yebätä kukwe mikata gare bäri ye mäkwe nie ie, mäkwe tärä ye bian ie aune mäkwe kukwe ükate tuabitikäre.
5. ¿Ñobätä ni tädre juto biare ja tötika kömikakäre?
5 Nita kukwe driere yekänti nitre ruäre tö kukwe metre Bibliabätä mikai gare jai. Nita nitre mada dimike ji kwin niken ni ngwena ja nire kokwäre ye känene ye käita nemen juto nibätä bätä ni tädre juto biare ja tötika kömikakäre angwane ni raba niaratre dimike (Mat. 7:13, 14).