“Jondron jökrä [nuaindre] kukwe kwin köböire”
1. ¿Nitre kukwe Ngöbökwe driekä kätä ja töimike dre nuainne, aune ñobätä?
1 Kukwe kwin Ngöbökwe driedre ni madai, sribi ye abokän nämene Pablo kisete nämene gare ie (1 Cor. 9:16, 19, 23). Ye erere arato, ni tö nitre mada tuai nüne kwin kärekäre, ye medenbätä nita ja di ngwen bäri kukwe kwin Ngöbökwe driere ietre.
2. Kukwe drieta ye ngwane, ¿nikwe ja töi mikadre dre nuainne aune ñobätä?
2 Medente bätä ñongwane kukwe driedre ne kwe nitre kwandre nie. Ni ie gwakita gare ñaka kötü o krade ye kite niara tö ie ye erere känti; ñakare aune, medente bätä ñongwane gwa raba kwen bäri ie ye erere känti tä kötü o krade ye kite. Nita “ni nire känene ni gwakitaka” ye kwrere. Yebätä, ni rabadre köbö ükete kwin jai arato, ne kwe nitre kwandre nie aune ni rabadre “gwa bätäkä ngwarbe” ükökrö (Mat. 4:19; 13:47). Ñodre, ¿kätä kite dere o kätä kite ngwen dekä ye ngwane ni raba niken kukwe driere kä madakänti? Pablo käkwe ja töimikani ‘kukwe kwin Ngöbökwe driere täte’ ni jökrä ie, aune nuainbare kwe kä jökrä känti (Hech 17:17; 20:20, 24).
3, 4. Kukwe driedre ye ngwane, ¿ni raba kukwe meden kädriere ni madabe aune ye köböire dre raba nemen bare?
3 Kukwe ütiäte ni madakrä yebätä blitadre. Nitre gwakitaka, tö gwa meden kitai ye erere kräke tä ja ükete kwin. ¿Nikwe kukwe kwin Ngöbökwe ye driedre ño, ne kwe rabadre tuin ütiäte nitre ni kukwe nuaka ye ie? Käne, kukwe meden ütiäte nitre jökrä kräke yebätä nikwe blitadre ben, aune dre niedre kwetre kukwe yebätä, ye nikwe kukwe nuadre kwin bätä blitadre jäme ben (Sant. 1:19). Ni raba kukwe ngwentari ietre, ne kwe töbike ño kukwe yebätä ye rabadre niere (Prov. 20:5). Nikwe nuaindre ne erere angwane, kukwe meden ütiäte metrere nitre yekrä, yebätä nikwe blitadre ben. Pablo käkwe ‘jondron jökrä nuainbare ni jökrä ganainkäre’ (1 Cor. 9:22). Kukwe meden tuin ütiäte nitre madai, yebätä nikwe blitadre ben, ne kwrere ni raba kukwe ye mike mate ni mada brukwäbätä.
4 “Kukwe kwin [...] jondron bäri kwin yebätä”, mikadre gare ni madai ye tä ¡kä mike juto krubäte nibätä! (Isa. 52:7). Nikwe “jöndron jökrä [nuaindre] kukwe kwin köböire”, ne kwe nikwe kukwe ye driedi ni kwati ie (1 Cor. 9:23).