¿Nita juto biare kukwe ükateta ye nuainkäre?
1. ¿Kukweta nakainkä kä jökräbiti tibien yebätä nikwe dre nuaindre?
1 Kukweta nakainkä kä nebätä ye bämikata kä kukwe bämikara ye kwrere, 1 Corintios 7:31 tä niere ye erere, kä yekänti kä ükateta jankunu bä jene jene aune nitre kukwe bämikaka ye tä ja ngwä kite bä jene jene arato. Kukweta nakainkä kä jökräbiti tibien yebätä ruäre ngwane nikwe kukwe ükadrete jene jene jai, ora ükadrete aune drebätä nikwe blitadre ye nikwe ükadrete jai kukwe driekäre. Akwa, ¿nita juto biare nuainkäre?
2. ¿Nikwe dre nuaindre ne kwe ni tädre näin gwaire juta Jehovakwe yebe?
2 Kukwe ükateta jene jene jai kukwe driekäre. Kukwe ükateta mrä mrä nuaindre ye erere nitre kristiano tä nuainne käre. Jesukwe nitre ja tötikaka ben juani kukwe driere ye ngwane, ñaka rikadre jondron ngwä ngwena aune ngwian ngwena jai niebare kwe kena ietre (Mat. 10:9, 10). Akwa, niaratre rüe rakaikä aune kukwe ye driedi kä mada mada känti nämene gare ie, yebätä ja känenkäre kukwe ükaninte kena kwe ye kwitani bä jene kwe mada (Luc. 22:36). Siklo nikanina ta yete, juta Jehovakwe nämene kukwe ükete kukwe driekäre nitre kä ye näire nämene nüne ño ye ererebätä. Ñodre, nämene kukwe driere täräkwata kia sribe nämene yebiti, radio yebiti aune bosina mikani karote yebiti. Kä nengwane nitre ñaka tä kwen gwi nie kä keta kabre känti; aisete nieta bäri nie, nikwe kukwe driedre kä jökrä ngwane aune nitre kwati tä nemen yekänti ne kwe kukwe drieta ju ju te ye mikadre nemen bare täte. Aune nitre tä sribire dekä nükebe dere kwandre gwi nie yekäre, kä jatadre de ye ngwane nikwe kukwe driedre nieta nie. Erametre, karo kä kwinbiti Jehovakwe ye tä ja kwite jankunu nänkäre nekwäre sekwäre. ¿Nita näin jankunu jiebiti aune gwaire ben? (Ezeq. 1:20, 21.)
3. ¿Nikwe dre nuaindre blitakäre kukwe ütiätebätä?
3 Drebätä nikwe blitadre. ¿Nitre ie nita kukwe driere ye abokän kukwe meden tä mike töbike kä nengwane? ¿Ngwian? ¿Mräkätre? ¿Rü? Kukwe meden tä nakainkä aune nitre tä nüne ño mikadre gare jai yekwe ni dimikai ja ükete blitakäre kukwe ütiätebätä (1 Cor. 9:20-23). Nitre gwi blitadre angwane, ni ñaka raba kukwe mike gare drekebe ngwarbe ietre aune kukwe medenbätä nita blite yebätä nikwe ñaka blitadre jankunu, ñakare aune bäri kwin kukwe meden tä mike töbike yebätä blitadre bentre.
4. ¿Ñobätä ni tädre juto biare kukwe ükateta ye nuainkäre?
4 Kukweta nakainkä kä jökräbiti tibien köböra krüte aune ja tare nikai kri ye kömikai. “Kä kitera neme braibe ni käne.” (1 Cor. 7:29, Kukwe kuin Ngöbökwe.) Ye medenbätä, ni tädre juto biare kukwe ükateta ye nuainkäre. Ye aibe köböire nikwe ja di ngwandi kukwe driere kä nebera braibe ni käne yete.