Kukwe Ngwainta Törö jai yekrä ja ükadrete kwin
Kristo ni Jie Ngwanka käkwe ja nire biani ni ütiäre. Kukwe ütiäte ye ngwankäre törö jai ni jökrä nänkä niara jiebiti käkwe ja ükaite kä jutobiti (Luc. 22:19). ¿Kukwe Ngwainta Törö jai ye känenkri dre nuaindre?
◼ Ora bätä kä. Jesús ja nire biani ni ütiäre ye Ngwainta Törö jai ora nuäi bätä kä medenkänti ye mikadre gare kwin ni jökrä ie. Ju ja Ükarakrö yete konkrekasion mada käkwe ja ükaikrö angwane, ütiäte krubäte ni rükadre gätä ye känenkri. Gätä ye krütadre angwane kä mikadrete nitre mräkä yei, ne ñan ñobätä aune ora niken jötrö ta. Ñaka ja mikadre jukwete bätä ni mada jiete.
◼ Täräkwata. ¿Täräkwata ni nübaikrä ye niena nitre kukwe driekä yekwe bätä dre kädrieta yete ye niena gare ietre? ¿Täräkwata driedre ño yebätä mäkwe ja kitanina nuainkäre? ¿Nirei mäkwe täräkwata ye biain? Mäkwe ja di ngwan täräkwata ye döräire jökrä.
◼ Karo o jondron nänkäre. Nikwe ngwandre törö jai ja mräkätre kukwebätä o nitre ruäre tö kukwe mikai gare jai, ye dimikadre ne kwe rikadre gätä yebätä. ¿Kukwe meden ükaninante nitre ye dimikakäre?
◼ Ban bätä bino. Nitre umbre ie ngwanta törö, ban bätä bino ye ñaka biandre Ñänä jämi niken nekä ye känenkri. Arato nitre dianinkä nänkäre kä kwinbätä tärä aune bren, abokän ñaka raba niken gätäbätä ye ie ban bätä bino ye jänrikadre. Ne madakäre, ban bätä bino debe erere känändre kukwe ye bämikakäre (La Atalaya 15 febrero kä 2003, página 14-15, párrafo 14 bätä 17 mikadre ñärärä).
◼ Ju ja Ükarakrö. Köbö ükadrete Ju ja Ükarakrö ye ükatekäre kwin gätä ye känenkri, mesa bätä dänkwä kwin, blato, copa ye känändre biare arato. Gätä ye nuaindre kä madakänti angwane, mikrofono kwin känändre blitakrä, ne kwe kukwe kädriedre ye ni jökrä käkwe kukwe nuadre kwin. Nitre ni käi ükatekä bätä nitre käkwe ban bätä bino biain, ye diandrekä biare bätä dre dre nuaindre kwetre ye mikadre gare ietre. Arato ja ngwäkitadre kwin kwetre köbö ütiäte ye näire.
Jesús ja nire biani ni ütiäre Ngwainta Törö jai, ye kukwe bäri ütiäte nuaindi kä nete, yebätä ni jökrä käkwe ja ükadrete kwin. Jehovakwe Monso tare kwe Jesukristo biani ni kä nebätä ütiäre, yebätä nire nire kätä Niara mike täte ja brukwä tätebiti, nitre ye kräke kukwe kwin krubäte mikai nemen bare kwe.