Kukwe drieta: tä ni dimike ja üairebiti
1. ¿Nita kukwe driere yebätä dre dre kwin tä nemen nikwe?
1 Ni tö kä mikai juto Jehovabätä ye medenbätä metrere nita kukwe kwin ye mike gare käre. Akwa, “Ngöbö kukwei drie[dre]” nieta Bibliakwe ye erere nuaindre, ye köböire Ngöböta kukwe kwin mike nemen bare nikrä, tä ni mike dite ja üairebiti bätä tä kä mike juto nibätä (2 Tim. 4:2; Isa. 48:17, 18). ¿Ñokänti kukwe driedre, ye kätä ni dimike bätä kä ngwen juto nibätä?
2. ¿Nita kukwe driere ye kätä ni dimike ño?
2 Dite aune kukwe kwin. Nita kukwe driere ye kätä ni töimike kukwe kwin Gobran Ngöbökwe yebätä aune ñaka kukwe nakainkä mantre jetebe nibätä yebätä (2 Cor. 4:18). Ne madakäre, kukwe drieta Bibliakwe ye nita mike gare ni madai ye ngwane, kukwe käbämikata Ngöbökwe ye ie nita tödeke bäri bätä kukwe metre ye tä nemen bäri ütiäte nikrä (Isa. 65:13, 14). Nita ni mada dimike nirien ja üairebiti ne kwe ñaka rabadre “ja mike nitre kukwe käme nuainkä kä nebätä yekri” ye ngwane, ye kätä ni dimike arato ja töimike kwatibe ñaka ja mrite kukwe kä nebätä yebe (Juan 17:14, 16; Rom. 12:2).
3. ¿Kukwe drieta ye kätä ni dimike ño ja töimike Kristo erere?
3 Ne madakäre, kukwe driedre ye kätä ni dimike ja töimike Kristo erere. Ñodre, nita ja di ngwen ‘jondron jökrä nuainne nitre jökrä ganainkäre’, ye kätä ni töimike bäri bobre (1 Cor. 9:19-23). Nitre kätä ‘ja tarenike aune näin obeja ngübaka ñaka ye kwrere’ yebe nita blite angwane, tä nemen tuin bobre nie bätä ni töta nemen dimikai (Mat. 9:36). Akwa ye ñan ngörä, nitre ñaka tö ni kukwe nuai o tätre ja mike ni rüere ye abokän kätä ni töimike ja di ngwen kä ngwen nüke jai bätä nita ni mada dimike ye kätä kä ngwen bäri juto nibätä (Hech. 20:35).
4. ¿Kukwe Ngöbökwe driedre ye tuin ño mäi?
4 ¡Sribi ütiäte krubäte tä nikwe! Kukwe drieta yebiti nita Ngöbö Itibe mikadre täte ye mike kri. Kukwe driedre ye tä ni dimike. Nire nire kätä ja töimike kwatibe “kukwe kwin mik[e] gare ni jökrä ie” ye kräke kukwe kwin krubäte tä nemen bare (Hech. 20:24).