Kukwe drieta yebiti Ngöbö tare nikwe bämikata
1. Jesukwe Jehová tarebare, ¿ye käkwe töi mikani dre nuainne?
1 Jesús nämene Jehová tarere aune ye käkwe töi mikani jondron jökrä nuainne. Kukwe driebare kwe yebiti bämikani kwe nämene Jehová tarere, niarakwe niebare erere: “Tita ti Rün tarere rabadre gare [nitre ie] amne ti Rün tä dre nuemna tie, erere tita nuene täte jökrä, ye rabadre gare ietre arato” (Juan 14:31 Kukwe Kuin Ngöbökwe [KKN]). Ye erere ni nänkä niara jiebiti kätä nuainne, kukwe drieta yebiti Jehová tare nikwe nita bämike, ye abokän ütiäte krubäte nikrä (Mat. 22:37; Efe. 5:1, 2).
2. ¿Jehová tare nikwe ye nita bämike ño?
2 “Mä kä raba mikani [deme]”. Nita blite Jehová aune Gobran kwe yebätä kä jökrä känti nitre madabe, ye ngwane nita mike gare Jehová tare nikwe bätä nita niara kä ye mike deme arato (Sal. 83:18; Eze. 36:23; Mat. 6:9 KKN). Ngöbö kä mikadre deme bätä töita dre nuainbätä ye rabadre bare, ye ie ni tö; ye medenbätä nita kukwe driere Jesukwe nuainbare ye erere (Mat. 26:39).
3. Nita Jehová tarere, ¿ye käkwe ni dimikai ño ja tuin kukwe keta kabre ben?
3 Ja tare ye tä ni dimike. Nita Jehová tarere ye kätä ni dimike ja tuin kukwe keta kabre ben (1 Cor. 13:4, 7). Jesukwe kukwe driebare ye ngwane ja tuani kwe kukwe keta kabre ben, käkwe niara ngwandre di nekä. Akwa nämene Jehová tarere bätä sribi biani ie ye tö namani nuain täte, ye käkwe dimikani kä ngwen nüke jai kukwe driere jankunu (Mar. 3:21; 1 Ped. 2:18-23). Jesús erere nita ja tuin kukwe keta kabre ben, akwa nita Ngöbö tarere ye käkwe ni dimikai kä ngwen nüke jai. Jesukwe kukwe kwin bämikani nikrä, ye erere nikwe nuaindre angwane ye käkwe ni töimikai kukwe driere jankunu. Ni mräkä raba ja mike ni rüere, ni nemen bren, o nitre ruäre ñaka ni kukwe nuin, kukwe ye jökrä raba ni ngwen di nekä. Akwa kukwe yebiti ta nita ja töimike kukwe driere jankunu, Jehová tare nikwe ye bämikakäre.
4. ¿Ni Jehová tarekä yekwe kukwe meden ütiäte tä?
4 Ja tare ye ütiäte krubäte. Nita Ngöbö tarere ja nire tätebiti ye ni raba bämike sribi nuainta nikwe yebiti, ye kukwe ütiäte nuainta nikwe (1 Cor. 13:13). Ngöbö kä mikai deme ye käi nibira nökrö ja ken, ye medenbätä, nunta orare ne kwe Niara ‘taredre bäri munkwe’ (Fili. 1:9; Mat. 22:36-38).