Nikwe ja tötikadre ne kwe ni rabadre dirikä kwin

Bobu jire, kukwe arabe ngwanintari Jesús ie ja nire käre yebätä. Ni itire itire käkwe kukwe ngwanintari ie, ye nämene dre ribere ye ererebätä kukwe ye mikani gare kwe ietre (Luc. 10:25-28; 18:18-20). Ye erere arato, kukwebätä nikwe ja tötikadre Bibliabätä nitre ruäre ben ye niena gare kwin nie, akwa nikwe ja tötikadre känenkri aune nitre ja tötikaka tä dre ribere yebätä nikwe töbikadre. ¿Kukwe meden ñaka nüke gare kwin ie aune ñaka tö kain ngäbiti? ¿Texto tä mikani párrafo yebätä ye medenbätä nikwe ñäkädre ja tötikadre ye ngwane? ¿Kukwe diandrekä nuäi ja tötikakäre? Ruäre ngwane ni raba kukwe bämike, kukwe mike gare o kukwe ngwentari ne kwe kukwe ye tä dre driere ni ja tötikaka yei ye rükadre gare ie. Ne madakäre, Jehová aibe tä kukwe metre nura kwrere ye mike nirien nitre brukwäte. Ye medenbätä kukwe kwin mikadre nemen bare kwe ni ja tötikaka ye kräke ye nikwe kärädre ie, arato nita ja tötike tötikakäre aune nita ja di ngwen dimikakäre ja üairebiti yebätä ni dimikadre kwe nikwe kärädre ie (1 Cor. 3:6; Sant. 1:5).