Nitre tö kukwe mikai gare jai ye känändre
1. ¿Kukwe drieta nikwe ye ütiäte nikrä ye ni raba bämike ño?
1 Jesukwe kukwe driebare ye ngwane ja di tätebiti kukwe kwin mikani gare kwe nitre töi jäme yei (Isa. 61:1, 2). Ni abokän kukwe mikaka gare bätä ni sribikä Kristokwe, ye medenbätä Jesukwe nuainbare erere nikwe ja di ngwandre nitre tö kukwe mikai gare jai, ye känene kukwe drieta nikwe ye käite; ye abokän sribi ütiäte tä ni kisete (Mat. 10:11; 2 Cor. 5:20).
2. ¿Pablo käkwe dre nuainbare kukwe driekäre ni jökrä ie aune dre namani bare?
2 Nitre känändre kä jökrä känti. Apóstol Pablo käre nämene niken käne sinagoga yete kukwe driekäre nitre judío bätä nitre mada ja mikaka judío kwrere yei (Hech. 14:1). Akwa kä Filipo ye känti niara bätä Silas nikani nitre känene “kä nämene nitre israelitakwe blitakrä Ngöböbe [niaratre namani] nütüre” ye känti nikani. Yete kukwe driebare kwetre meritre ie aune iti kädeka nämene Lidia käkwe kukwe metre ye kani ngäbiti bengwairebe (Hech. 16:12-15).
3. Nita kukwe driere ju ju te, ¿akwa medente ni raba nuainne mada?
3 Nita kukwe driere ju ju te ¿akwa ni raba dre nuainne mada? ¿Nita nemen karo ngübare yekänti, parque yekänti, obisina känti nitre tä sribire, kä känti nitre tä ja ükökrö kwati o jondron rürübäinta yekänti kukwe drie raba? Nitre nüne jutate o nüne ju krikri mente kwin yekänti ñaka nuäre kukwe driekäre, yekänti kukwe drie raba carta o teléfono yebiti. Kä meden känti nita kukwe driere yekänti nitre kukwe nuadre kwin ne kwe “sribi ni Dänkienkwe, yebätä [...] ja kita[dre] ja di ngöibiti” (1 Cor. 15:58 KKN).
4. Kä känti kukwe drieta nikwe ye braibe kukwe driekäre angwane, ¿ni raba dre nuainne?
4 Nitre kukwe driekä ruäre tä ja kwite konkrekasion juta kwe ye käite o konkrekasion juta madate kukwe driekäre bäri. Arato ruäre tä ja kite blite kukwe madabiti, ne kwe kukwe driedre kwetre nitre blitaka kukwe yebiti yei.
5. ¿Kä käme te nita nüne kä nengwane ye nikwe mikadre tuin ño jai aune nikwe ja töimikadre kwatibe dre nuainne?
5 Kä tibien ne abokän tire kwrere (Mat. 9:37; 13:38). Nita nüne kä krüte te aune gwäune kukwe käme ye diainkä kä nebätä, ye medenbätä nita dre nuainne, dre nuain raba nikwe bätä dre gare nie yebätä nikwe töbikadre, ne kwe nikwe kukwe ükadrete jai kukwe driekäre bäri. Nikwe ja di ngwain Gobran Ngöbökwe mike käne angwane, Jehová tä käbämike nie kukwe kwin mikai nemen bare kwe nikrä (Mat. 6:33).