Ni raba kukwe driere teléfono yebiti
1. ¿Ñobätä ütiäte nikwe kukwe driedre teléfono yebiti?
1 ¿Ñobätä nikwe ja töi mikadre kukwe driere teléfono yebiti? Ñobätä ñan angwane ye köböire ni raba arato nitre mada tötike kukwe metre yebiti ne kwe rabadrete nire (2 Ped. 3:9). Metrere nita kukwe kwin ye driere ju ju te, akwa ni tö blitai nitre ñaka tä kwen gwi nie yebe arato, yekäre nita kukwe mada ükete kukwe driekäre ietre (Mat. 24:14; Luc. 10:1-7; Rev. 14:6).
2. ¿Kukwe ükate raba ño kukwe driekäre teléfono yebiti?
2 Kukwe ükadrete ño. Kukwe drieta ju ju te, ye erere arato kä diankata kukwe driekäre teléfono yebiti. Mä törba kukwe driei teléfono yebiti, angwane kä dianinkä kukwe driekäre teléfono yebiti ye mä raba kärere nuainkäre kaibe o nitre kukwe driekä nibu o nimä ben. Blitadre teléfono yebiti angwane nuaindre kä kaibe te. Tärä medenbiti kukwe drieta ju ju te ye ja mräkätre ruäre kätä mike mesabiti ja ken kukwe driekäre.
3. ¿Nikwe kukwe driedre teléfono yebiti ye ngwane dre ngwandre törö jai?
3 Dre niedre aune niedre ño. Kukwe driedre teléfono yebiti ye ngwane nita blite ni madabe ye kwrere ja kukwei mikadre. Nitre ruäre kätä Sribi Nikwe Ngöbökrä, tärä Razonamiento bätä täräkwata ¿Mä törba kukwe metre ye mikai gare jai? yebätä ñäke ni niaratre kukwe nuaka yei. Kukwe medenbätä blitadre, kukwe meden ngwantaridre, aune texto meden diandrekä kukwe ngwantaridre ye mikakäre gare yebätä töbikadre käne. Tärä drieta ju ju te ye arabe drieta arato. Mäkwe kukwe ne ngwan törö jai: blitadre ni madabe ye ngwane ja kukwei mikadre jäme. Blitadre bätärekä, ni mada mikadre tuin ütiäte jai, ne ñan ñobätä aune, nita blite ño yebätä ni nüke gare kwin. Dre niedre kwe ye mäkwe kukwe nuadre, aune debe biandre ie kukwe niedre kwe yebätä. Ngwian biandre ja töi jeñebiti ye ñaka mäkwe kädekate ie, ñobätä ñan angwane raba nütüre mätä teléfono ütiä kärere ie.
4. ¿Kukwe driedre teléfono yebiti ye raba ni dimike ño kukwe driere ni jökrä ie?
4 Nitre bren tä gwi o nitre käre sribire aune ñaka tä kwen gwi nie yebe ni raba blite. Ne madakäre, nitre ruäre nüne ju krikri mente kwin o kä känti ni ñaka raba nemen kukwe driere, ye medenbätä, ni raba kukwe driere ietre teléfono yebiti aune ye käkwe ni dimikai kukwe driere täte nitre jökrä ie.