‘Sribidre kä jutobiti’
1. ¿Nita kukwe driedre ye ngwane nikwe dre bämikadre?
1 Ni kristiano käkwe sribi jökrä Ngöbökwe ye nuaindre kä jutobiti. Ye medenbätä, “ñan kä ngwiandre krene jabtä amne [...] sribidre ja di ngöi” jökräbiti, ni klabore kwrere Jehovakrä ye ni nübaita nuainne (Rom. 12:11 KKN). Akwa, kukwe ruäre raba ni töimike ñaka kukwe driere kä jutobiti. ¿Nikwe dre nuaindre ne kwe sribi Ngöbökwe ye nuaindre käre kä jutobiti? (2 Tim. 1:6, 7.)
2. ¿Ja tötikata kaibe ye kätä ni dimike ño kukwe driere?
2 Ja tötikadre kaibe Bibliabätä. Ni Gobran Ngöbökwe kukwei driekä ye kätä kukwe Ngöbökwe ye tarere bätä kukwe metre tä Bibliabätä ye kätä kä mike jutobätä (Sal. 119:97). Nita ja tötike kaibe ye ngwane kukwe ütiäte tä nemen gare nie, ye kätä kä mike juto ni brukwäbätä aune ni töta nemen ja tötikai jankunu, ¿ñan ererea? Nita Ngöbö bätä ni mada tarere ye kätä ni töimike Ngöbö käikitekä bätä kukwe kwin Ngöbökwe ye mike gare ni jökrä ie (Heb. 13:15). Nita kukwe kwin mike gare kä jutobiti angwane nita bämike sribi ye ütiäte nikrä.
3. ¿Ngöbö üai raba ni dimike ño sribi kwe ye nuainkäre?
3 Ngöbö Üai kärädre. Sribi Ngöbökwe nuaindre kwin ye ñaka raba nemen bare ja di jeñebiti nie, ñakare aune Ngöbö üai ye köböire ni raba sribi ye nuainne kä jutobiti (1 Ped. 4:11). Ye medenbätä, nikwe krötadre ni iti die krubäte ye ken, niara käkwe ni dimikai kukwe driere (Isa. 40:26, 29-31). Apóstol Pablo käkwe ja tuabare kukwe tare ben kukwe driebätä ye ngwane, kukwe ne niebare kwe: “käre Ngöböta ti die mike” (Hech. 26:21, 22 KKN ). Ye erere arato, üai deme Jehovakwe ye raba ni dimike sribi kwe ye nuainne kwin. Ye medenbätä, orasion yebiti nikwe üai kwe kärädre ie (Luc. 11:9-13).
4. Nikwe kukwe driedre kä jutobiti ye ngwane, ¿dre raba nemen bare? Akwa, ¿nikwe dre ngwandre törö jai?
4 Nikwe Gobran Ngöbökwe kukwei driedre kä jutobiti angwane ye raba nitre mada töimike nuainne erere arato (2 Cor. 9:2). Arato nita kukwe metre driere, ye nikwe bämikadre bätä nuaindre kä jutobiti angwane ye raba nitre töimike ni kukwe nuin. Ne madakäre nikwe töbikadre kwin käne blitakäre ni madabe bätä nuaindre töi jämebiti (Tito 3:2). Kä jökrä ngwane nikwe bämikadre nita ni mada mike tuin ütiäte jai bätä törba ni kukwe nuai o ñakare ye tä gare ietre.
5. ¿Ngöbö kätä ni nübaire dre nuainne?
5 Nikwe Gobran Ngöbökwe kukwei driedre käre kä jutobiti. Ja tötikadre kaibe Bibliabätä aune oradre käre Jehovai, niara käkwe üai deme biain nie. Nikwe ne nuaindre angwane nikwe kukwe driei ‘“Ngöbö üai deme” yebiti aune kukwe ye era metre nikrä’ ye erere nikwe bämikai (1 Tes. 1:5).