Ni kristiano käkwe oradre ye ütiäte krubäte
1. ¿Nikwe dre nuaindre kukwe driekäre kwin?
1 Ni ñaka raba sribi Ngöbökwe ye nuainne ja di jeñebiti. Jehová kätä ja di bien nie sribi kwe ye nuainkäre (Fili. 4:13). Niara kätä angeletre kwe ye juen ne kwe ni dimikadre nitre obeja kwrere ye känene (Rev. 14:6, 7). Kukwe Ngöbökwe abokän nüra kwrere, nita kukwe ye nökö aune ñö metekäbiti, akwa Jehová tä mike nirien (1 Cor. 3:6, 9). Ye medenbätä, ni kristiano käkwe oradre tö ngwankäre täte ni Rün kä kwinbiti yei ye abokän ütiäte krubäte.
2. ¿Kukwe medenbätä ni raba orare?
2 Dre kärädre jakrä. Nita niken kukwe driere ye ngwane nikwe oradre käre (Efe. 6:18). ¿Kukwe medenbätä oradre? Kä jürä ñaka rabadre nibätä, bätä ja töimikakäre kwin kukwe driekäre nitre nünanka ni käite yei (Hech. 4:29). Jehovakwe ni jie ngwandre nemen nitre tö ja tötikai Bibliabätä yekänti, ye kärä raba arato. Kukwe ngwantaridre nie angwane ni raba orare ja töite ja di käräkäre Jehovai kukwe ye mikakäre gare (Neh. 2:4). Nikwe ja di kärädre Sribi Ngöbökwe ye mikakäre käne (Sant. 1:5). Jehová kätä ni tuenmetre sribi ütiäte kwe nuainne, yebätä nita debe bien ie angwane ye kätä kä mike juto niarabätä (Col. 3:15).
3. ¿Orasion nuainta ni madakrä ye köböire kukwe drieta ye raba nirien ño?
3 Oradre ni madakrä. Arato nikwe oradre “jakrä kwärikwäri”, ni raba ja mräkätre ye kädekete orasionte (Sant. 5:16, KKN; Hech. 12:5). ¿Mätä bren yebätä ñaka nuäre mäkrä kukwe driekäre? Ye erere angwane, ja mräkätre ñaka bren yekrä mäkwe oradre ne kwe rabadre kukwe driere jankunu. ¡Orasion mäkwe ye mä ñan raba nütüre mätä nuainne ngwarbe! Arato ni raba orare ne kwe nitre tä gobrane rabadre töbike kwin kukwe drieta yebätä aune ja mräkätre tuanemetre kwetre ‘nüne jäme aune kwin’ (1 Tim. 2:1, 2).
4. ¿Ñobätä nikwe oradre jankunu?
4 Kukwe kwin driedre kä jökräbiti tibien ye sribi kri krubäte. Akwa nikwe “blitadre janknu” Jehovabe angwane niarakwe ni dimikai sribi ye nuainne (Rom. 12:12, KKN).