“¡Mä raba nemen sribi prekursor ye nuainne kwin!”

1. ¿Ja ngwai iti merire käkwe dre niebare sribi prekursor yebätä?

¹ “Sribi ne käkwe kä mikani juto krubäte tibätä aune ti dimikani kukwe ja üaire yebiti; sribi mada bäri kwin ne erere ñaka raba kwen tie”. Prekursora Kathe B. Palm käkwe kukwe ye niebare, niara käkwe sribi ye nuainbare Sudamérica, juta Chile ye jökrä känti. Nitre ruäre raba niere mäi: “¡Mä raba nemen sribi prekursor ye nuainne kwin!”, tätre ye niere, ñobätä ñan angwane nitre kätä sribi ye nuainne yebätä kukwe kwin tä nemen bare.

2. Mä raba niere ñobätä sribi Ngöbökwe ye kätä kä mike bäri juto nibätä.

² Kukwe kwin nikrä. Jesús kukwe bämikaka ni käne, Rün kukwei mikadre täte ye nämene tuin mrö ja nirekrä kwrere ie (Juan 4:34). Ye medenbätä, niarakwe blitabare nitre ja tötikaka ben yebe, ye ngwane nämene gare kwin ie Sribi Ngöbökwe nuaindre ye kätä kä mike juto nitre Jehová mikaka täte yebätä. Erametre, sribi meden nuainta nikwe ye Ngöböta kain ngäbiti angwane ye tä kä mike juto nibätä. Ngwian nikwe, ni die aune nita kä denkä jai nitre mada dimikakäre angwane ye kätä kä mike bäri juto nibätä (Hech. 20:​31, 35).

3. Nita kukwe driere käre angwane, ¿dre kwin raba nemen nikwe?

³ Nita kä denkä jai kukwe driekäre bäri angwane ye raba ni dimike ja tötika Bibliabätä ye kömike ni madabe aune ye käkwe kä mikai bäri juto nibätä. Mätä kukwe driere ye ngwane tä nemen ruin mäi nitre ñaka töta mä kukwe nuai, akwa mäkwe ja ükaite kukwe driekäre bäri kwin, angwane rabai gare mäi nitre raba mä kukwe nuin. Mäkwe sribi prekursor nuaindi kä kwati näre, angwane Kwela Sribi Prekursor Kräke, yete kukwe mada driedi mäi abokän käkwe mä dimikai kukwe driere bäri kwin (2 Tim. 2:15). Nikwe ja di ngwain kä nengwane kukwe Ngöbökwe ye nökö nüra kwrere angwane, ye bitikäre ngwä raba nemenkä (Ecl. 11:⁠6).

4. ¿Monsotre bati kitera ngedenkä kwelate käkwe töbikadre drebätä?

⁴ Monso bati mäkwe töibika. Mä kitera ngedenkä kwelate angwane mäkwe dre nuain ja känenkäre, ¿yebätä mäkwe töbikabarera? Mätä kwelate yebätä kä ñaka nemente krubäte mäi. Mä gediandrekä kwelate ye ngwane kä rabaite ngwarbe mäi, ¿yete mäkwe dre nuaindi? Mä töita sribikäre köbö täte ngwian ganainkäre, akwa, ¿mä raba orare ja töimikakäre sribi prekursor regular nuainkäre? Kukwe driedre nitre töi jene jene ie, mätä ja tuin kukwe ruäre ben, mätä kukwe ükete kwin jondron nuainkäre bätä kukweta nemen gare mäi dirikäre kwin; kukwe ye jökrä käkwe mä dimikai käre.

5. ¿Konkrekasion bätä nitre rüne raba monsotre töimike ño sribi prekursor nuainne?

⁵ Mun rüne, ¿munta monso munkwe töimike Sribi Ngöbökwe ye nuainkäre köbö täte? Munta dre niere bätä kukwe kwin bämike niaratre käne, ye käkwe töimikai Gobran Ngöbökwe kukwei ye mike käne (Mat. 6:33). Ray ngedianinkä kwelate, ye ngwane sribi prekursor diani ja käne kwe, niara käkwe niebare: “Kukwe kwin tä nemen bare nikrä nita sribi prekursor ye nuainne yebätä ti meye nämene töbike käre”. Akwa, ja mräkätre kätä dre niere bätä dre nuainne ye köböire raba nitre mada konkrekasionte töimike sribi prekursor ye den ja käne arato. José nünanka España, käkwe niebare: “Konkrekasion tikwe, yete sribi prekursor ye nämene nemen tuin kwin monsotre bati yekrä. Sribi yebätä niaratre nämene blite kwin, nämene tuin ütiäte ietre bätä nämene nitre mada dimike; ye käkwe ti dimikani sribi prekursor kömike”.

6. Mä töita ñaka sribi prekursor nuainbätä angwane, ¿mäkwe dre nuaindre?

⁶ Ja tuadre ño kukwe ruäre ben. Ni ruäre raba niere: “ti töita ñaka sribi prekursor nuainne”. Ye erere mätä töbike angwane, mäkwe mika gare Jehovai aune mäkwe nie ie: “Sribi prekursor ye ti raba nuainne o ñakare ye ñaka gare tie, akwa ti tö kukwe kwin nuain mä mikakäre täte” (Sal. 62:8; Pro. 23:26). Ye bitikäre, Biblia bätä juta kwe yei mäkwe ja jie ngwamana. Nitre prekursor regular käkwe prekursor ausiliar ye nuainbare käne angwane kä namani juto krubäte niaratre yebätä, aune ye käkwe töimikani sribire köbö täte Jehová kräke (Sal. 34:⁠8).

7. Ja ñaka törö mäi 70 ora nuainkäre sö kratire kratire angwane, ¿mä raba dre nuainne?

⁷ Ora nuaindre 70 sö kratire kratire, yekrä ja ñan tä nemen törö ietre. Prekursor ruäre tä ja tuin kukwe ye erere ben yebe mäkwe blita arato (Pro. 15:22.) Ye bitikäre, mäkwe ora ükate jakrä. Mäkwe kä diainkä bäri jai sribi ye nuainkäre angwane rabai nemen nuäre nuainkäre mäi (Efe. 5:​15, 16).

8. ¿Ñobätä nikwe töbikadre käre sribi prekursor yebätä?

⁸ Töbikadre kukwe mäkwe yebätä. Kukwe keta kabre raba nemen bare nibätä, aisete dre nuainta nikwe yebätä töbikadre. Ñodre, ¿mä jubila köböra? Randy jubila jämi ye känenkri ja dianinkä kwe sribibätä aune niebare kwe: “Tikwe kukwe ye nuainbare köböire sribi prekursor ye kömikani tikwe ti muko yebe, biti medente kukwe drie ñaka krubäte yekänti nun rikaba nüne. Kukwe keta kabre namanina bare nunbätä. . . akwa nun töita kwin ye abokän jondron bäri ütiäte tä nunkwe”.

9. ¿Drebätä nitre gure käkwe töbikadre?

⁹ Nitre gure tätre töbike kwin kukwe yebätä angwane tä nüke gare ietre niaratre nibu ñan raba sribire mantre jetebe. Erametre, tätre ja di ngwen jondron ruäre tuenmetre, akwa ye köböire kukwe kwin tä nemen kwetre. John muko käkwe sribi kwe tuanimetre sribi prekursor ye nuainkäre. John käkwe niebare: “Ti muko tä kukwe driere köbö täte ye kukwe bäri kwin tikrä”.

10. ¿Dre kätä nitre kristiano töimike sribi prekursor ye nuainne?

¹⁰ Tödeka bätä ja tare bämikata. Kukwe driedre ye abokän sribi bäri ütiäte Jehovakrä, ye medenbätä nikwe mikadre tuin ütiäte jai arato. Kä kitera nemen chi kä ne gatekäre aune nitre kätä Jehová kä ye mike gare ye aibe rabai dianintari (Rom. 10:13). Nita Jehová tarere aune ni törba debe bien ie kukwe nuainbare kwe yebätä angwane ye käkwe ni töimikai kukwe driere, Jesukwe niebare ye erere (Mat. 28:​19, 20; 1 Juan 5:⁠3). Nita nüne kä krüte te ye gare nie, ye medenbätä nikwe ñaka ja töimikadre jondron kä nebätä ye jiebiti, ñakare aune ja töimikadre kwatibe kukwe driere bäri kä nebera chi ni käne yete (1 Cor. 7:​29-31).

11. Ni raba nemen sribi prekursor ye nuainne kwin niedre nie angwane, ¿kukwe ye mikadre tuin ño jai?

¹¹ Juta Ngöbökwe kätä ni nübaire sribi prekursor ye nuainne, akwa erametre nita tödeke Ngöböi yebätä nita sribi ye den ja käne. Ye medenbätä, ni iti käkwe niedre mäi: “Mä raba nemen sribi prekursor ye nuainne kwin”, ye ngwane tä kukwe kwin niere mäi. Mäkwe oradre Jehovai, ne kwe mä rabadre sribi ye nuainne nitre kätä sribi prekursor nuainne yebe.

[Blurb on page 4]

Mun rüne, ¿munta kukwe kwin bämike monso munkwe töimikakäre sribi prekursor ye nuainne?

[Blurb on page 5]

Kukwe driedre ye abokän sribi bäri ütiäte Jehovakrä, ye medenbätä nikwe mikadre tuin ütiäte jai arato.