¿Mäkwe prekursor regular nuainbare ye tä törö mäi?
1. ¿Nitre kwati käkwe sribi meden ütiäte nuainbarera? ¿Ñobätä nitre ruäre ñan niena sribi ye nuainne?
1 Kä kwati krubäte te, ja mräkätre kwati tätre “kukwe kuin [...] dirire” köbö täte te (Hech. 5:42, KKN). Sribi ye nämene kä mike juto niaratre yebätä, akwa kukwe ruärebätä sribi ye tuanimetre kwetre. Ye erere nakaninkä mäbätä angwane, ¿mä raba sribi prekursor ye nuainenta yebätä mä tärä töbike?
2. ¿Nitre käkwe sribi prekursor tuanimetre ye ñobätä rabadre kömiketa?
2 Kukweta nakainkä. Kukwe medenbätä mäkwe sribi prekursor ye tuanimetre, akwa nane kukwe ye erere ben mä ñaka niena ja tuin kä nengwane. Ñodre, 90 ora nuain nämene ye ñaka nämene nemen nuäre mä kräke, akwa kä nengwane 70 ora nuainta, yebätä ¿mä raba ja töimiketa nuainenta? Nanekänti, mä nämene mä mräkätre ngübare o mä nämene sribire krubäte, akwa ye erere mä ñaka niena nuainne krubäte. Meri iti testiko Jehovakwe namani bren yebätä sribi prekursor ye tuanimetre kwe, ye bitikäre kä namani 89 niarabiti angwane sribi ye kömikaninta kwe; ñobätä ñan aune kä nikani kwatibiti bäri ta angwane niara ñaka nämene niken hospital yekänti, aisete namani töbiketa sribi prekursor ye nuainkäre.
3. ¿Ni ja mräkäre käkwe dre nuaindre ne kwe ni iti käkwe ja mikadre prekursor?
3 ¿Mä ñaka sribi prekursor ye nuainne, akwa mä mräkätre ruäre käkwe nuainbare akwa yebiti tuanimetre kwetre? Nane sribi ye tuanimetre kwe nämene rün o meye umbre kwe ngübare yebätä (1 Tim. 5:4, 8). ¿Mä aune mä mräkätre mada raba niara dimike? ¿Ñobätä mun ñan kukwe ye kädriere jabe? (Pro. 15:22). Ni ja mräkäre ja dimikadre ne kwe ni iti käkwe ja mikadre prekursor, ye ngwane niaratre jökrä raba niere tätre sribi ye nuainne gwairebe.
4. ¿Mä ñan raba sribi prekursor ye nuainne angwane mäkwe dre nuaindre?
4 Nane, mä täbe ja tuin kukwe ruäre ben aune mä ñaka raba sribi prekursor ye nuainenta, angwane mäkwe ñaka ja di ngwan nekä. Mä töita sribi yebätä ye tä kä mike juto Jehovabätä (2 Cor. 8:12). Akwa, mä nämene sribi prekursor nuainne ye ngwane kukwe namani gare mäi yebiti mäkwe kukwe drie jankunu. Mäkwe käre kädekate orasion yete, aune mä tädre mokre, ne kwe sribi prekursor ye mä raba nuainenta angwane mäkwe nuaindre (1 Juan 5:14). “Jukwe [...] kri [...] sribi kräke” ye Jehová raba tike mä käne, aune ye köböire mä raba sribi prekursor regular ye nuainenta kä jutobiti (1 Cor. 16:9, Ngöbö Täräe).