Nura ngwä tirete niena biare ötadre
1. ¿Sribi meden ütiäte nuainta kä nengwane?
1 Kä Samaria yekänti Jesukwe kukwe driebare meri iti ie, ye bitikäre niebare kwe nitre ja tötikaka ben yei: “Nura tirete ye n[i]ena biare ötadre, ye munkwe mika ñäräre” (Juan 4:35, 36, Kukwe Kuin Ngöbökwe [KKN]). Erametre, nitre kwati ükakrö nämene Ngöbö mikakäre täte, yebätä bämikata nura gwä ötata ye kwrere aune sribi ye ririai kä jökräbiti tibien ye nämene gare Jesús ie. Kä nengwane niara tä kä kwinbiti, akwa täbe ni dimike nura ngwä ötö (Mat. 28:19, 20). ¿Dreta mike gare sribi ye tä nirien bäri aune köböra krüte?
2. ¿Dreta mike gare nura gwä ötata käbiti tibien tä nirien bäri?
2 Nura gwä ötata käbiti tibien. Sribi Ngöbökwe nuainbare kä 2009 ye ngwane, kä jökräbiti tibien nitre kukwe driekä ririabare 3,2%. Juta känti kukwe drie ñäkäita yete sribi Ngöbökwe ririabare 14%. Nitre tötikani Bibliabätä 7.619.000 bäri sö kratire kratire te, ye tä mike gare nitre kukwe driekä bäri biti ta nitre tötikani Bibliabätä aune nitre tötikani kwati krubäte kä känente yekrä. Juta kwati te Sribi Ngöbökwe tä nirien bäri, ye medenbätä nitre ja tötikaka Kwela Galaad yete ribeta krubäte. Nitre blite kukwe madabiti yei kukwe drieta kukwe kwe yebiti, ye köböire juta keta kabre te kukwe kwin tä nemen bare. Kukwe ye tä mike gare nura ngwä ötata ye nibira krüte, yebätä Jehová tä sribi ye mike nirien bäri (Isa. 60:22). ¿Mätä kukwe driere yekänti nitre raba ja töi kwite raba ruin mäi?
3. ¿Ja mräkä ruäre tä töbike ño nura ngwä ötata niaratre käite yebätä?
3 Nura gwä ötata ni käite. Ja mräkä ruäre raba niere: “Jän raba ruin tie, akwa tita kukwe driere yekänti sribi Ngöbökwe ye ñaka nirien”. Erametre kä ruäre känti kukwe drieta ye ñaka nirien krubäte kä mada känti ye kwrere o ñaka nirien kena ye erere, ye medenbätä kä yekänti nura ngwä kena ötabarera jökrä ja mräkätre ruäre tä nütüre aune nemente kia kia ye aibe ükadrekrö. Akwa ¿ye metre?
4. ¿Kukwe drieta ye mikadre tuin ño jai aune ñobätä mikadre tuin kore jai?
4 Nura nökata nemen ötakäre, ye ngwane sribita krubäte. Sribi ye ütiäte krubäte, yebätä Jesukwe niebare: “Nura n[i]ena biare kabre ötadre [...] akwa sribikä ñakare bökän, aisete sribi Bkänkä Ngöbö käkwe sribikä mda mda juandre jötrö sribire abko munkwe ribe ie” (Mat. 9:37, 38, KKN). Jehová abokän nura bäkänkä, yebätä ñongwane aune medente nura ririai ye tä gare niarai (Juan 6:44; 1 Cor. 3:6-8). Akwa, ¿sribi medenta ni kisete? Biblia tä niere: “Mäkwe nura nöka dekä aune nememe dere, ñaka ja kise mika nemen kwekebe” (Ecl. 11:4-6). Nura ngwä ötata käi kitera krüte, aisete ¡nikwe ñaka ja mikadre krene sribi ye nuainne!
5. Kukwe drieta ye nitre ñaka kain ngäbiti, akwa ¿ñobätä nuaindre jankunu kä jutobiti?
5 Nura ngwä ötata ye jämi krüte. Kä känti konkrekasion tä kukwe driere, yete kukwe drieta käre, aune nitre ñaka tä kukwe ye kain ngäbiti, akwa yebiti ta ni rabadre sribi ye nuainne kä jutobiti aune ja töimikadre nuainne bäri (2 Tim. 4:2). Kukwe tare tä nemen bare käbiti tibien ye raba nitre mike töbike dre rakaikä ja käne yebätä. Monsotre tä kite nirien ye ngwane tö nünain jäme aune kwin. Arato, nitre ruäre ñan töta nemen ni kukwe nuai kena, akwa käre nita niken kukwe driere ietre, angwane raba niaratre töimike ni kukwe nuin. Kukwe drieta ye nitre ñaka tä kain ngäbiti, akwa dre rakaikä ja känenkäre ye mikadre gare ietre arato (Eze. 2:4, 5; 3:19).
6. ¿Dre raba ni dimike kukwe driere kä jutobiti?
6 Nita kukwe driere yekänti nitre ñaka töta nemen ni kukwe nuai akwa, ¿dre raba ni dimike kukwe driere kä jutobiti? Nita kukwe driere ju ju te, akwa ni raba kukwe driere jondron rürübäinta yekänti o teléfono yebiti. Ni raba blite kukwe keta kabrebätä. O ni raba kukwe driere ora jene jene te; derekri o nitre tä gwi ye ngwane. Arato, ja kita raba blitakäre kukwe madabiti kukwe kwin driekäre bäri nitre madai. Nikwe sribi prekursor regular nuaindi angwane nikwe kukwe driei bäri. Kä känti ja mräkätre ñaka kwati kukwe driekäre, yekänti ni raba niken nüne kukwe driekäre. Nura ngwä ötata ye mikata tuin ütiäte jai, angwane nikwe ja di ngwain krubäte sribi ye nuainkäre.
7. ¿Nura gwä ötata ye krütai ñongwane?
7 Ni nura nökaka ie kä ñaka krubäte nura gwä ötakäre, yebätä ñaka ja düke aune ñaka ja mike krene, ñakare aune tä sribire sribi krütadre ie ye ngwane. Ye erere nitre ükakröta ye sribi bäri ütiäte nuainta kä nengwane. ¿Kä kwäbe te nikwe sribi ye nuaindi? “Ne[meme] kä mrä” aune nememe ‘kä krüte’ ye ngwane (Mat. 24:14; 28:20, KKN). Jesús abokän Sribikä Jehovakwe, sribi biani ie ye niarakwe mikani krüte; ye erere sribi mikani ni kisete ye nikwe mikadre krüte arato (Juan 4:34; 17:4). Ye medenbätä, ni rabadre kukwe driere jankunu, kä jutobiti aune ja töi kwinbiti nememe kä krüte yete (Mat. 24:13). ¡Nura gwä ükadrekrö ye jämi krüte!
[Rekwadro de página 2]
Nura nökata nemen ötakäre, ye ngwane sribita krubäte