Kukwe ye ütiäte bämikadre Jesús ja nire biani ngwainta törö jai 17 abril
1. Jesús ja nire biani Ngwanta Törö jai, ye ngwane ¿ñobätä ja rabadre ruin nie salmista ye erere?
1 Jehovakwe kukwe keta kabre nuainbare salmista kräke aune mikani kwäre, yebätä kukwe ne niebare kwe: “¿Tikwe dre biain Jehovai jondron kwin nuainta kwe ti kräke ye ütiäre?” (Sal. 116:12). Kä nengwane ni Ngöbö mikaka täte rabadre debe bien bäri Jehovai; salmista käkwe kukwe niebare ye bitikäre siklo nikani kwati ta, angwane Jehovakwe jondron kwin nuainbare ni kä nebätä kräke: ni kökanintari kwe. Ye medenbätä, Jesukwe ja nire biani ngwainta törö köbö 17 abril ye ngwane, nikwe bämikadre nita debe bien Ngöböi kukwe yebätä (Col. 3:15).
2. ¿Ñobätä debe biandre ni kökanintari yebätä?
2 Kukwe kwin tä nemen nikwe. Jesukwe ni kökanintari ye köböire “ni nämane ngite ye dianinkä jökrä nibtä mento” (Col. 1:13, 14, Kukwe Kuin Ngöbökwe [KKN]). Ja mika ngite ye juanta ta nibiti ye köböire ni töita nemen kwin sribikäre Jehová kräke (Heb. 9:13, 14). Ni raba orare Jehovai töi bökänbiti (Heb. 4:14-16). Arato, nita tödeke kukwe yei angwane, ye köböire nüna raba kärekäre (Juan 3:16).
3. ¿Nikwe bämikadre ño nita debe bien Jehovai ni kökanintari kwe yebätä?
3 Ütiäte ni kräke bämikadre. Kena, nikwe ñäkädre aune töbikataridre texto dianinkä ñäkäkäre Jesús ja nire biani Ngwanta Törö jai bämä ye kräke, yebiti nita bämike kukwe ye ütiäte ni kräke. Ye medenbätä, La Atalaya 1 febrero 2011 yebätä kukwe nieta “¿Está usted listo para el día más importante del año?”, ye ükaninte ni dimikakäre nuainne. Ketebukäre, orasion yebiti debe biandre Jehovai ni kökanintari kwe yebätä (1 Tes. 5:17, 18). Ketamäkäre, Jesús ja nire biani Ngwanta Törö jai, ye ngwane ni tädre gätä yebätä Jesukwe nuainmana ye kwrere (1 Cor. 11:24, 25). Ketabokäkäre, Jehovata ni jökrä tarere ye erere ja töimikadre, aune ni mada nübaidre ne kwe rükadre siba nibe köbö yete (Isa. 55:1-3).
4. ¿Nikwe ja töimikadre kwatibe dre nuainne?
4 Ni kukwebätä törbadre debe biain angwane, rabadre gätä nuainta Jesús ja nire biani Ngwanta Törö ye mike tuin ütiäte jai. ¡Gätä ye bäri ütiäte nuainta kä kwatire kwatire te! Aisete, köbö ütiäte ye tä kite nökrö ja ken ye ngwane nikwe ja töimikadre salmista ye erere, niarakwe niebare: “Kukwe kwin niere Jehová yebätä ja brukwä tätebiti aune jondron kwin keta kabre nuainta kwe ye ñaka käikwitadrekä jabiti” (Sal. 103:2).