¿Dre nuaindre debe biankäre Ngöböi?

1. ¿Ñobätä ni töita debe bianbätä Jehovai?

¹ Jehovakwe jondron keta kabre biani nie, akwa monso tare kwe ye biani ni kökatarikäre, ye abokän kukwe bäri ütiäte nuainbare kwe nikrä (Sant. 1:17). Ni kökanintari ye köböire ngite juanta ta nibiti, akwa kukwe kwin keta kabre tä nemen nikwe arato (Efe. 1:⁠7). Kukwe ye ni töi mikadre debe bien ie, ¿ñan ererea? Jesús ja nire biani Ngwanta Törö jai ye käi näire nikwe töbikadre kukwe ütiäte yebätä angwane ye käkwe ni töimikai bäri debe bien.

2. ¿Ni kökanintari yebätä ni aune ni mräkätre raba debe bien ño?

² Mikadre ütiäte jai. Jesús ja nire biani ye Ngwainta Törö 30 marzo yete. Kä diankata ja tötikakäre ni mräkäbe, ye ngwane blita raba ni kökanintari yebätä aune ye käkwe ni dimikai kukwe ye mike tuin ütiäte jai. Arato, texto dianinkä Bibliabätä köbö kwatire kwatire te bämän yekrä yebätä ñäkädre. Ni kökanintari ye köböire kukwe meden kwin tä nemen nikwe, nita ja mäke ño Jehovabe, ja ruin ño nie, nita ni mada mike tuin ño jai bätä drei nita tö ngwen kä ja känenkäre, yebätä ni itire itire käkwe töbikadre. Ne madakäre, kantiko mrä 8 bätä 109 kantai Jesukwe ja nire biani ye Ngwainta Törö jai yekrä ni raba ja kite (Sal. 77:12).

3. ¿Ni raba debe bien ño Jehovai?

³ Debe biandre. Ni tare Jehovakwe ye medenbätä monso kwe juani kwe ni kökatarikäre, yebätä nikwe blitadre ni madabe debe biankäre ie (Sal. 145:​2-7). Ye medenbätä, nitre ja mräkäre kätä kukwe ükete ne kwe iti käkwe ja mikadre prekursor ausiliar nuainkäre marzo nemen mayo yebätä. Mä ñan raba ne erere nuainne angwane, ¿mä raba kä denkä jai kukwe driekäre bäri? (Efe. 5:16) Ni tö debe biain angwane nikwe ja di ngwandre nitre mada dimike kwen gätä yebätä (Rev. 22:17). Ja tötikaka mäbe, sribi muko, mä mräkätre, nitre nünanka mä bäre bätä nitre tuabitita mäkwe, ye mäkwe nübai aune kä tika täräbätä jai biarebe. Ye bitikäre, täräkwata nitre nübaikäre ye mäkwe döräi Jesús ja nire biani Ngwainta Törö jai ye ngwane.

4. ¿Jesús ja nire biani ye Ngwainta Törö jai ye ngwane ni raba dre nuainne?

⁴ Jehovakwe monso kwe biani ni jökrä ütiäre aune Jesús ja nire biani Ngwainta Törö jai ye ngwane nikwe bämikadre kukwe ye ütiäte nikrä. Kä ye ngwane nikwe kä diandrekä jai töbikakäre debe biankäre ie ni kökanintari bätä “kukwe kuin ütiäte kri ñan [tändre] Kristobtä” nuainbare kwe nikrä yebätä (Efe. 3:​8, Kukwe Kuin Ngöbökwe [KKN]).