¿Monso mäkwe niena juto biare?
1. ¿Ñobätä ütiäte monsotre mäkwe rabadre juto biare?
1 Monsotre niena näin kwelate. Ye medenbätä monsotre kristiano tätre ja tuin kukwe keta kabre ben, akwa niaratre raba “kukwe era erere niere” nitre madai arato (Juan 18:37, KKN). Monsotre mäkwe, ¿tä juto biare kukwe driekäre?
2. ¿Dre rabadre gare monsotre mäkwe yei ne kwe tädre juto biare?
2 ¿Bieta meden nuainta kwelate abokän ñaka kwin ye gare metre monsotre mäkwe yei? ¿Ñobätä bieta ye käme ye gare ietre? ¿Niaratre töi mikadre näin kwela krite, ye ngwane tädre juto biare ja tuakäre kukwe yebe? ¿Niaratre töi mikadre ja kukwe muko känene, dö ñan o droga duen ye ngwane dre nuaindre kwetre ye gare ietre? ¿Tätre kukwebätä niedre jerekäbe kwetre o kukwe meden mikata täte kwetre ye raba mike gare kwin? (1 Ped. 3:15).
3. Ja tötikadre ni Mräkätre yebe ye ngwane, ¿nitre rüne rabadre monsotre kwe tötike ño?
3 Ja tötikadre ni Mräkätre yebe ye ngwane nuaindre. Kukwe keta kabre ben tätre ja tuin kwelate yebätä munta blite bentre. Akwa monsotre jämi nikenta kwelate ye känenkri munkwe blitadre kukwe yebätä bentre, ye ngwane kä jürä ñaka rabai bätätre. Ja tötikadre ni Mräkätre yebe ye ngwane, ¿mun raba ja tötike kukwe yebätä monsotre munkwe yebe? Niaratre tätre kwelate ye ngwane kukwe meden ben tätre ja tuin ye mun raba ngwentari ietre. Ne madakäre, kukwe ben ja tuabare kä känente kwetre yebätä mun raba blite bentre bobukäreta ne kwe rükadre gare bäri kwin ietre (Sal. 119:95). Arato, mun raba ja kite monsotre munkwe yebe; mun rüne raba ja mike nitre dirikä ye kwrere o monso mada nänkä kwelate ye kwrere. Mäkwe monsotre mäkwe tötika kukwe mikakäre gare Biblia yebiti aune tärä Razonamiento bätä volúmenes Los jóvenes preguntan yebiti rabadre blite arato. Ja ngwai iti nämene ja kite monsotre kwe yebe monsotre jämi niken kwelate ye känenkri, ne kwe niaratre rikadre kwelate ye ngwane blitadre kwetre nitre dirikä kwelate yebe aune niaratre testiko Jehovakwe ye mikadre gare kwetre. (La Atalaya 15 diciembre 2010, páginas 3 nemen 5, mikadre ñärärä).
4. ¿Nitre rüne töbike kwin käkwe dre nuaindre?
4 Nita nüne kä krüte te, aisete monsotre tä ja tuin bäri “kukwe [...] taretare krübäte” ben (2 Tim. 3:1, KKN). Akwa, nitre rüne töbike kwin tätre monsotre kwe tötike, ne kwe ñaka rabadre kukwe blo nuainne (Pro. 22:3). Ye medenbätä, monsotre jämi niken kwelate ye känenkri mäkwe niaratre dimika ne kwe rabadre juto biare ja tuakäre kukwe keta kabre ben.