Täräkwata nitre ño erere ño kräke
1. ¿Apóstol Pablo erere nitre sribikä täte metre aune töbätä tätre dre nuainne?
1 Apóstol Pablo nämene kukwe kwin driere jene jene ne kwe nitre “ruäre” käkwe kukwe ye kadre ngäbiti; ye erere nitre sribikä täte metre aune töbätä kätä täräkwata sribere kukwe driekäre nitre ja ngwen ño ño bätä nitre töita jene jene yei (1 Cor. 9:22, 23, KKN). La Atalaya bätä ¡Despertad! ye driekäre kwin, nikwe ngwandre törö jai nire nire kräke täräkwata ye sribeta.
2. ¿Nire nire kräke täräkwata ¡Despertad! ye sribeta?
2 ¡Despertad! Apóstol Pablo käkwe blitabare nitre “Atenabo” ben, nitre ye kwrere kräke täräkwata ne sribeta (Hech. 17:22, KKN). Nitre ye ñaka nämene kukwebätä aune Kukwe Ngöbökwe ñaka nämene gare jire chi ietre. Ye erere arato, nitre ie kukwe Bibliabätä ñaka gare jire chi ye kräke ¡Despertad! ye sribeta. Nitre ye ñaka kristiano, ñaka kukwe Bibliabätä ye kain ngäbiti o Biblia ye ütiäte ye ñaka gare ietre. Täräkwata ne sribeta ne kwe Ngöbö metre tärä ye rabadre gare nitre madai. Arato, tä ni dimike tödeke Biblia yei aune tä mike gare nitre testiko Jehovakwe ye ñaka ja erebe nitre kukwe madabätä yebe.
3. ¿Nire nire kräke La Atalaya kobu ye sribeta?
3 La Atalaya. Täräkwata keteiti sribeta nitre jökrä kräke; nitre kräke Ngöbö tärä aune tätre Biblia mike tuin ütiäte jai ye kräke sribeta, nitre ye kwrere ie Pablokwe niebare: “Mun[ta] [...] Ngöbö mike ütiäte jae” (Hech. 13:14-16, KKN). Nitre yei kukwe Bibliabätä gare kwati kubu, akwa ñaka kwin täte. La Atalaya mada sribeta ja tötikara nitre testiko Jehovakwe yei. Pablo nämene tärä tike yebätä nitre nämene ñäke aune kukwe ye nämene nüke gare kwin ietre, ñobätä ñan aune niaratre yei kukwe Ngöbökwe aune kukwe metre ye nämene gare kwin (1 Cor. 1:1, 2). Ye erere arato, nitre tä nüke gätäbätä aune kukwe nieta nitre testiko Jehovakwe ye nüke gare ietre, ye kräke kukwe tikata täräkwata ja tötikara yebätä.
4. ¿Ñobätä nikwe ja tötikadre täräkwata kobu yebätä kukwe driekäre?
4 Nita kukwe driere ye ngwane nita blite täräkwata katibe yebätä, akwa nita täräkwata kobu ye driere; ye medenbätä, nikwe ja töi mikadre ja tötike täräkwata kobu yebätä. Ye erere nikwe nuaindi angwane, kukwe meden rabai tuin kwin nitre madai yebätä nikwe blitai bentre.