Nitre testiko Jehovakwe: tätre kukwe kwin driere gwairebe
Kä nikanina 100 biti bäri ta nitre testiko Jehovakwe tätre kukwe kwin driere gwairebe. Tätre ye nuainne kä jökräbiti tibien ye köböire tätre kukwe driere kukwe jene jenebiti aune tätre nuainne juta 230 biti bäri (Mat. 24:14). ¿Ñobätä sribi ye ütiäte krubäte? ¿Ñokänti sribi ye nuainta kä jökräbiti tibien? Video Los testigos de Jehová: organizados para predicar las buenas nuevas yebiti nitre testiko Jehovakwe tätre sribi keta kabre nuainne ño kä jökräbiti tibien ye mikata gare nie. Mäkwe video ye tuadre ye bitikäre mäkwe kukwe ngwantarita ne mikadre gare.
¿Video ne tä mä töi mike ño 1) juta Jehovakwe tä ja di ngwen kukwe kwin driere yebätä? (2 Tim. 4:2). 2) nitre sribikä Betel yebätä? 3) kukwe ükateta nitre misionero bätä nitre ni tuabitikä tötikakäre yebätä? (2 Tim. 2:2). 4) ja tötike texto dianinkä köbö kwatire kwatire kräke aune ja tötike gätä nuainta konkrekasionte bämän kratire kratire kräke yebätä? (Hech. 17:11). 5) ja ükökrö gätäbätä ne kwe kukwe kwin rabadre mäkwe? (Heb. 10:24, 25). 6) kä tibien ne kwitai bä nuäre yete jondron kwin rabai bare yebätä? (Isa. 11:9). 7) nura ngwä ükakrö yebätä? (Juan 4:35).
Video ne kwin krubäte nitre testiko Jehovakwe tätre sribi nuainne ño kä jökräbiti tibien ye mikakäre gare nitre madai. 8) ¿Ñongwane video ye mika raba tuare nitre ja tötikaka nibe yei, ni mräkätre yei bätä nitre mada yei raba ruin mäi? 9) Nitre ie mäkwe mikani tuare ¿yebätä matabare ño?
Jehovata kukwe kwin nuainne kä nengwane yebätä nikwe töbikadretari angwane ni töi rabai salmista ye erere, niarakwe niebare: ‘Mäkwe jondron keta kabre nuainbare Ngöbö tikwe Jehová, mäkwe jondron kwin sribebare aune mä töita kwin nun kräke; ni mada ñaka jire mä ye kwrere’ (Sal. 40:5). Video nebiti nikwe ni mada dimikadre Jehová mike tuin ütiäte jai aune juta kwe arato.