Jehová kräke sribita ye mikadre tuin ütiäte jai
1. ¿Kukwe drieta ye tuin ño nitre kwati ie?
1 Nitre gobrainta Satanakwe tätre nütüre kukwe drieta ye abokän nitre ngwarbe ni nike o nitre töi ñaka kätä sribi ye nuainne (1 Cor. 1:18-21). Ni ñaka ja ngübarebiti angwane kukwe ngwarbe nieta ye raba ni ngwen dinekä aune kä ñaka rabai juto nibätä sribi ye nuainkäre (Pro. 24:10; Isa. 5:20). ¿Ni kädekata testiko Jehovakwe ye ñobätä mikadre tuin ütiäte jai? (Isa. 43:10).
2. ¿Ñobätä ni raba niere kukwe drie ye abokän ‘sribi deme’?
2 ‘Sribi deme.’ Apóstol Pablo käkwe niebare kukwe drie ye abokän ‘sribi deme’ (Rom. 15:15, 16). Nita sribi ye nuainne ye ngwane, nita sribire Ngöbö deme yebe, aune sribi ye tä niara kä ye mike deme arato (1 Cor. 3:9; 1 Ped. 1:15). Kukwe drie yebiti nita Jehová “käikitekä”, ye medenbätä kukwe drie ye ütiäte krubäte Jehová mikakäre täte (Heb. 13:15, Kukwe Kuin Ngöbökwe [KKN]).
3. ¿Kukwe kwin driedre ye ñobätä ütiäte krubäte?
3 Kukwe kwin driedre ye abokän sribi ütiäte mikata nuaindre nitre ruäre ie. Angeletre ye käkwe sribi ye nuaindre kä jutobiti (1 Ped. 1:12). Aune nuaindre kwin kwetre. Ni abokän ‘vaso sribebare dobrobiti’ ye kwrere, akwa Jehovakwe ni dianinkä sribi ütiäte kwe ye nuainkäre (2 Cor. 4:7).
4. ¿Kukwe drie ye ütiäte krubäte ni kräke ye bämika raba ño?
4 Nuaindre käne. Nita kukwe drie ye mike tuin ütiäte jai angwane nita sribi ye mike bäri “ütiäte” jondron mada yebiti ta aune bämän kratire kratire te nita kä denkä jai kukwe driekäre (Fili. 1:10, KKN). Ni raba bämike: Nitre musika täkäkä käikitakata kä jökräbiti tibien ye ngätäite ni tädre musika täke. Ye ütiäte krubäte ni kräke, ye medenbätä nikwe ja kitadre bätä ja di ngwandre musika ye ngö mike bäri kwin. Ye erere, ni jämi niken kukwe driere ye känenkri nita ja tötike ne kwe ‘nikwe kukwe Ngöbökwe yebiti diridre kwin’ aune nita ja di ngwen “diri[re] metre ta” (2 Tim. 2:15; 4:2, KKN).
5. ¿Nita kukwe driere ye nire nire tä mike tuin ütiäte jai?
5 Nitre kwati tätre kukwe niere, akwa nikwe ñaka ja di ngwandre nekä kukwe yebätä. Nita kukwe driere yekänti nitre ruäre kätä kwin niere nie kukwe drieta ietre yebätä. Nitre käkwe ni kadre ngäbiti kwin ye ñan ai bäri ütiäte, ñakare aune Jehová käkwe ni kadre ngäbiti ye abokän bäri kwin ni kräke. Nita sribire kräke ye niarata mike tuin ütiäte jai (Isa. 52:7).