Ñan jürä ngwan jabätä
1. ¿Kukwe meden känti ñaka kä jürä ngwandre jabätä?
1 ¿Nane ni mada mä kötaidre yebätä mä ñaka tärä kukwe driere kwelate? ¿Ye erere namanina bare mäbätä? Kä jürä krubäte mäbätä angwane bäri mäkwe ja di ngwandre ne kwe kä jürä ñaka rabadre mäbätä kukwe driekäre. Dre raba mä dimike ye ani mike gare jai.
2.¿Mäkwe kukwe driedre kwelate ye ngwane, ¿mä raba bämike ño mätä töbike kwin käne?
2 Töbikadre kwin käne. Kwelate mä raba kukwe driere, akwa ye ñan aibätä mä rikadre blite Bibliabätä nitre jökrä ben kukwe drieta ju ju te ye kwrere. Ñongwane mä raba blite yebätä mäkwe töbika kwin käne (Ecl. 3:1, 7). Ruäre, ni mä tötikaka kwelate tä blite o tä sribi bien nuaindre mäi ye ngwane mä raba kukwe mike gare kukwe mikata täte mäkwe yebätä. Arato, ñobätä mä ñaka niken bieta ruäre yebätä ye ni nänkä kwelate raba ngwentari mäi. Kwela kömikata ye ngwane monsotre kristiano tätre niere nitre dirikä kwe yei niaratre abokän testiko Jehovakwe, aune täräkwata tä blite kukwe mikata täte nikwe yebätä ye tätre bien ietre. Monsotre mada tätre täräkwata mikete mesa sribikäre kwe yebiti, ne kwe monsotre mada käkwe kukwe ngwandretari ietre.
3. ¿Kukwe driekäre kwelate ye kräke mä raba ja tötike ño?
3 Ja tötikadre. Mäkwe ja tötika kwin käne ye köböire mä raba blite jäme ni mada yebe (1 Ped. 3:15). Ye medenbätä, kukwe meden ngwantari raba mäi aune mä raba mike gare ño ietre yebätä mäkwe töbika (Pro. 15:28). Ne madakäre, Biblia, tärä Los jóvenes preguntan o Razonamiento aune tärä madabätä känti blitata jondron sribebare yebätä, ye mä raba niken ngwena jai, ne kwe mä törbadre kukwe mikai gare ye ngwane mäkwe nuaindrebiti. Ja tötika mä mräkätre yebe ye nuaindre angwane mä raba niere mä rün ie mä tö ja kitai kukwe ye bämikabätä.
4. ¿Ñobätä mäkwe ja di ngwandre jankunu kukwe driere kwelate?
4 Ja töi mikadre kwin. Mäkwe kukwe metre driei ye ngwane monsotre nänkä kwelate mä kötaidi rabadre ruin mäi, akwa ñaka töbika ye erere. Kä jürä ñaka mäbätä ye rabadre tuin ni madai angwane niaratre töi ñan rabai krütare aune törbai mä kukwe nuai. Akwa, ñaka mä kukwei nuadre kwetre angwane mäkwe ñaka ja di ngwan nekä. Mätä ja di ngwen nuainne ye käkwe kä mikai juto Jehovabätä (Heb. 13: 15, 16). Mäkwe ja di kärä jankunu ie, ne kwe “kä jürä ñan rabadre jire chi” mäbätä blitakäre (Hech. 4:29, Kukwe Kuin Ngöbökwe; 2 Tim. 1:7, 8). Ni iti käkwe mä kukwe nuadre ye käkwe kä mikai nuäre mäbätä. Ni ye raba Jehová mike täte ye ñaka gare mäi.