Kukwe Ngwantarita

◼ ¿Ñongwan e tärä biandre ni madai?

Nitre tö kukwe mikai gare jai ye ngwane nuaindre. Nitre tö kukwe mikai gare erametre jai rabadre tuin nie ye ngwane La Atalaya bätä ¡Despertad! o tärä mada mada ye bian raba ietre. Sribi Ngöbökwe nuainta kä jökräbiti ye kräke ngwian biandre o ñakare ye ñan bäri ütiäte (Job 34:19; Rev. 22:17). Akwa, nitre ñaka tä tärä ye mike tuin ütiäte jai, nitre yei ñaka tärä biandre (Mat. 7:6).

¿Ni gwi tö kukwe Ngöbökwe mikai gare jai ye raba nemen gare ño nie? Ni gwi törbadre blitai nibe rabadre tuin nie. Nita blite ye ngwane tä ni kukwe nuin, nita kukwe ngwentari ie aune tä blite siba ye tä bämike tö ni kukwe nuabätä. Nita ñäke Bibliabätä ye ngwane tä kukwe ye mike ñärärä, yebiti tä bämike Kukwe Ngöbökwe ye ütiäte kräke. Tärä biandre ie yebätä ñäkäi kwe ye ngwantaridre ie. Ni gwi törba kukwe mikai gare erametre jai, yebätä ni kukwe driekä käkwe töbikadre kwin käne. Ñodre, ni tädre kukwe driere ji ngrabare ye ngwane ni ñaka rikadre tärä o täräkwata mada mada bien okwä kware nitre jökrä ie. Nitre törba kukwe mikai gare jai o ñakare ye ñan gare nie angwane, bäri kwin nikwe täräkwata chi biandre ie.

Ni kukwe driekä käkwe ngwian biandre ne kwe täräkwata diandrekä kwe ye ñan bäri ütiäte, ñakare aune, tä täräkwata ribere käbe kukwe driekäre ye ererebätä diandrekä kwe jai. Nita ngwian bien ja töi jeñebiti ye ñan nuainta tärä ütiä biankäre, ñakare aune sribi Ngöbökwe nuainta kä jökräbiti ye dimikakäre. Ngwian ñaka nikwe, akwa nita täräkwata mike tuin ütiäte jai angwane ye käkwe ni töi mikai ngwian bien Sribi Ngöbökwe nuainta ye dimikakäre, aune ñaka ngwian rabadrete nie ye aibe ngwane biandre (Mar. 12:41-44; 2 Cor. 9:7). Arato, ye käkwe ni töi mikai tärä ribeta nuäi jai ye erere denkä, ne kwe ngwian bianta sribi Ngöbökwe ye kräke ye nikwe ñaka kitadrekä ngwarbe.

[Rekwadro de página 2]

Ni gwi törba kukwe mikai gare erametre jai, yebätä ni kukwe driekä käkwe töbikadre kwin käne