Kukwe ketamä raba ni dimike dirire kwin
1. ¿Kukwe medenbätä nikwe ja di ngwandre jankunu dirire bäri kwin?
1 Ni kukwe kwin driekä ye abokän ni dirikä erere. Nita kukwe driere, nitre tuinbiti, nitre tötike Bibliabätä ye ngwane nita kukwe ütiäte driere nitre madai. Nita “Ngöbö Kukwei deme” ye mike gare ietre ye ngwane “Ngöbö [raba niaratre] dentari” (2 Tim. 3:15, Kukwe Kuin Ngöbökwe [WBT]). ¡Kukwe ütiäte tä ni kisete! Ja di ngwandre dirikäre bäri kwin ye ütiäte krubäte ¿ñan ererea? Kukwe ketamä raba ni dimike nuainne kwin ye ani mike gare jai.
2. ¿Kukwe drie raba ño nuäre?
2 Diridre nuäre. Kukwe ruäre gare nie yebätä ni tädre blite, akwa nitre ni kukwe nuaka ye kräke kukwe ye mrä aune ñaka raba nüke gare kwin ietre ye ngwandre törö jai. Ye medenbätä, nita ni mada tötike Bibliabätä ye ngwane ni ñan raba kukwe niere krubäte ie mikakäre nainte, ñakare aune kukwe meden bäri ütiäte ye driedre ie. Diridre kwin ye abokän kukwe niedre krubäte ye ñan ai gärätä (Pro. 10:19). Ne madakäre, texto mikani täräbätä ye ñaka känändre jökrä; texto keteiti abokän tä kukwe mike gare metre yebätä ñäkädre. Nikwe ñäkädre texto yebätä, ye bitikäre kukwe ye mikadre gare. Jesukwe kukwe Kädriebare Ngüdrebiti ye ngwane kukwe metre nguseta diribare kwe (Mat., kap. 5-7). Akwa, diribare nuäre kwe aune ñaka blitabare raire kwe.
3. ¿Ñobätä kukwe bämikadre ye ütiäte aune meden bäri kwin nuainkäre?
3 Kukwe bämikadre. Kukwe bämikata ye tä nitre mike töbike, tä kukwe mike gare kwin ietre aune tä dimike kukwe ngwenta törö jai. Nikwe ja tötikadre kukwe bämikakäre ye ñaka ribeta nie. Jesús nämene kukwe bämike ye ngwane nämene kukwe bämike jötrö ngwarbe aune nämene nuainne nuäre (Mat. 7:3-5; 18:2-4). Arato, kukwe bämikadre jondron üai sribeta yebiti ye kwin krubäte. Nikwe ja ükadrete känenkri ye ngwane ni raba kukwe kwin bämike.
4. ¿Nikwe kukwe ngwandretari ño?
4 Kukwe ngwantaridre kwin. Kukwe ngwantarita yebiti ni ja tötikaka mikata töbike. Ye medenbätä, nikwe kukwe ngwantaridre ie ye ngwane ngübadre bätärekä ne kwe kukwe niedre kwe. Ni arabe käkwe kukwe ye mikadre gare angwane kukwe ye nüke gare ño ie ye ñaka raba nemen gare nie. Kukwe ñaka metre niedre kwe angwane ni ñaka raba ñäke ie, ñakare aune kukwe mada ngwantaridre ie dimikakäre (Mat. 17:24-27). Erametre, nita ja di ngwen dirire kwin, akwa ruäre ngwane ni ñaka tä nuainne kwin täte. Ye medenbätä, Biblia tä ni nübaire kukwe drieta nikwe yei olo ketete jankunu, ye köböire kukwe kwin rabai nikwe aune nitre ni kukwe nuaka yekwe arato (1 Tim. 4:16).