Ruäre ngwane nitre känändre kukwe driekäre ietre

1. Konkrekasion blite kukwe jene jenebiti, ¿ye ñobätä diankata kukwe driekäre kä känti nitre blite kukwe jene jenebiti yei?

¹ Pentecostés kä 33 kä 1 yete, nitre ja tötikaka Jesube yebiti üai deme namani ye bitikäre, “niaratre jantani blite kukwe jene jenebiti,” nitre nünanka mente juta mada mada te nämene kä yekänti yebe (Hech. 2:4, Kuke Koin, tärä okwä ükaninte). Ye köböire nitre 3.000 ngökani ñöte. Nitre menteni ye jökrä nämene blite kukwe griekore o hebreore yebiti arato. Akwa, kukwe Gobran Ngöbökwe yebätä driedre niaratre kukwei jeñe yebiti ie Jehová tö namani. Erametre, kukwe kwin ye drieta nitre ie kukwe jeñe kwetre yebiti angwane, niaratre tä kukwe ye kain ngäbiti bäri kwin. Ye medenbätä, kä känti nitre tä blite kukwe jene jenebiti ye ererebätä kä diankata kukwe driekäre konkrekasion jene jene yei (Organizados, pág. 107, párrs. 1, 2 ye mikadre ñärärä). Nitre braibe ja ükakrökä blite kukwe jene jenebiti kätä kukwe driere nitre blite niaratre kukwei yebiti ie, konkrekasionte nitre ja ükakrökä braibe ngübabitikä tä kukwe driere ye käi känti o konkrekasion mada bäri ja ken tä kukwe driere ye käi känti.

2. (a) ¿Nitre blite kukwe madabiti tä nüne medente ye tikadre täräbätä jai ye kräke dre nuaindre, aune ñongwane nuain raba? (b) ¿Kä känti nitre blite kukwe jene jenebiti känänkäre konkrekasion raba ja dimike ño kwärikwäri? (c) ¿Ni blite kukwe madabiti kwandre nie aune törbadre kukwe kwin mikai gare jai angwane nikwe dre nuaindre?

² Nitre jökrä blite kukwe keteitibebiti yekänti nitre kukwe driekä raba kukwe driere ju jökrä te. Akwa nitre blite kukwe jene jenebiti yekänti nünanta angwane, nuain ñaka raba ye erere, ñodre konkrekasion blite kukwe jene jenebiti raba kukwe driere kä ye arabe känti. Nitre blite kukwe madabiti kwandre nie angwane, niara kä aune tä nüne medente ye tikadre täräbätä jai ne kwe ja mräkätre tä kukwe driere nitre ye kukweibiti käkwe tuadrebiti; akwa nikwe ngwandre törö jai nitre ye känändre ye abokän metrere tä gare konkrekasion o nitre braibe ja ükakrökä tä blite kukweibiti yei (rekwadro “Sribidre jabe kwärikwäri” ye mikadre ñärärä). Ye medenbätä, konkrekasion o nitre braibe ja ükakrökä tä blite kukwe yebiti ye rabadre nitre ye tä nüne medente aune nibe ye tike täräbätä jai. Nuaindre ño ye ani mike gare jai ja känenkäre.

3. ¿Kukwe meden medenbätä kä diandrekä bäri o braibe jai nitre känänkäre? ¿Nitre känä raba ja erebe kä jökrä känti?

³ Nitre känändre ño. Kukwe ño ye ererebätä kä diandrekä jai nitre blite kukwe jene jenebiti ye känänkäre. Ñodre, ¿nitre nibe kä yekänti tä blite kukwe yebiti? ¿Nitre nibe tä kukwe driere? Konkrekasion o nitre braibe ja ükakrökä yei, ¿kä ketabe kwanina kukwe driekäre? Nitre nüne braibe yekänti ñaka ja di ngwandre krubäte nitre blite kukwe jene jenebiti ye känene; ñakare aune kä känti nitre tä nüne bäri kwati yekänti ja töi mikadre metrere nitre ye känene. Ütiäte krubäte kukwe ükadrete kwin nitre känänkäre ne kwe nitre kwati krubäte rabadre Jehová kädekete ja di käräkäre ie (Rom. 10:13, 14).

4. (a) ¿Kukwe ükadrete ño nitre blite kukwe jene jenebiti känänkäre? (b) Nitre blite kukwe jene jenebiti känä raba ño ye mä raba niere.

⁴ Nitre umbre konkrekasion jie ngwanka, metrere ni kukwe driekä jie ngwanka rabadre kukwe ükete aune nitre tä ni mada känene ye jie ngwen ne kwe ñaka ja di ngwandre ngwarbe (1 Cor. 9:26). Nitre juta madate blite kukwe jenebiti tä ja ükökrö, ye abokän ja mräkä tötikani kwin raba jie ngwen, akwa metrere ni umbre o ni sribikä konkrekasionte dianinkä nitre umbre konkrekasionte yekwe rabadre nuainne. Konkrekasion keta kabre aune nitre braibe ja ükakrökä tä kukwe ükete nitre känänkäre drekebe ngwarbe kena. Raba täräbätä o Internet yete, nitre kädekata ño ye mike gare jai. Ye bitikäre, blitadre kwe teléfono yebiti nitre yebe o nitre ye tuadrebiti kwe ne kwe kä meden meden känti kukwe drie raba ye ükatekäre täräbätä jai. Rabadre tuin nuain bä angwane, nitre umbre konkrekasionte nitre ja ükakrökä braibe ngübabitikä ye rabadre kukwe ükete ne kwe ruäre ngwane konkrekasion jökrä rabadre nitre blite kukwe madabiti känene (rekwadro “Nitre blite kukwe madabiti ye känänkäre dre nuaindre” ye mikadre ñärärä).

5. (a) ¿Nire nire rikadre nitre blite kukwe madabiti känene ye ngwane kukwe meden ngwandre törö jai? (b) ¿Ni raba dre niere nitre yei?

⁵ Nitre känändre ye känenkri, dre dre ie ni tö ye mikadre gare kwin jai. Kena, nita niken nitre känene ye ngwane ja ngwäkitadre kwin nita niken kukwe driere ye kwrere. Ne madakäre, ja mräkätre kwati tä niken nitre känene ye ngwane, tätre ja kite dre niedi kwe yebätä aune tätre blite nitre kukwei yebiti, ye kätä niaratre dimike blite bäri kwin aune kä mike jutobätä. Nita nitre känene ye ngwane ni raba ora täine jai, akwa nita mapa sribere kä känti kukwe driei kräke aune kä kädekata ño tikata täräbätä ye ngwane ni ñaka raba ora täine. Nitre blite kukwe medenbiti känänta ye kwandre nie angwane, ni rabadre ja di ngwen kukwe driere ietre. Aune ni ye törbadre kukwe mikai gare jai o ñakare akwa, drekebe ngwarbe mikadre gare ni kukwe driekä jie ngwanka yei o ni dianinkä kwe kukwe tikakäre täräbätä yei mikadre gare, ne kwe niarakwe tikadre täräbätä. Nitre tö rabadre kukwe mikai gare jai o ñakare akwa ye erere nuaindre. Nitre känänta ye ütiäte akwa ni rabadre töbike kwin nuainkäre aune sribi mada Ngöbökwe ye nuaindre arato (rekwadro, “Nitre känänta ye ngwane dre niedre” ye mikadre ñärärä).

6. ¿Nitre kukwe driekä tä nitre ie ni kukwe ñaka ruin känene ye tä ja tuin kukwe medenbe?

⁶ Nitre ie ni kukwe ñaka ruin känändre ño. Nitre ie ni kukwe ñaka ruin känänta ye ñaka nuäre nuaindre aune ja di ngwandre krubäte nuainkäre bätä nuaindre jankunu. Nitre blite kukwe jene jenebiti ye raba nüke gare jötrö ngwarbe nie, kädekata ño, bä ño aune tä ja ngwäkite ño yebätä, akwa ni ie ni kukwe ñaka ruin ñan raba nüke gare ye erere nie. Ne madakäre, ruäre ngwane mräkätre aune ja ketamuko kwe tä kriemike, yebätä raba ja töi mike ñaka kukwe mike gare metre niaratre yebätä nitre kukwe driekä tä känene yei. Nitre ie ni kukwe ñaka ruin känändre ño kräke kukwe mikata gare ja känenkäre ne raba ni dimike arato nitre blite kukwe jene jenebiti ye känänkäre.

7. (a) Nitre ie ni kukwe ñaka ruin känänta ye ngwane, ¿ni raba kukwe meden ngwentari? (b) ¿Ni gwi ñaka töbikadre blo yekäre nikwe dre nuaindre?

⁷ Konkrekasion aune nitre braibe ja ükakrökä tä blite kisebiti ye kätä ngwentari nitre nünanka niaratre bäre yei nitre ie ni kukwe ñaka ruin ye tärä gare ietre o ñakare. Nitre gwi ye tärä ni nünanka bäre, sribi muko kwe, nitre ja tötikaka ben kwelate, o mräkätre tuin blite kisebiti. Tärä okwä tikani ketaninkä ji ngrabare abokänbiti mikata gare nitre karo ngwanka yei, monsotre kia ie ni kukwe ñaka ruin tärä kä yekänti ye niara tärä tuin rükadre törö ie arato. Ñokäre mätä niaratre tuinbiti yebätä raba nemen mokrere ye mäkwe ngwan törö jai. Akwa, mäkwe blitai töi jämebiti, ñokäre mätä näin ye mäkwe mikai gare jötrö ngwarbe aune mäkwe ni gwi ye mikai ütiäte jai angwane, ñaka rabai töbike blo. Ja mräkätre ruäre tä DVD o tärä mada mike tuare aune tä mike gare tö kukwe käbämikata Bibliabätä ye mikai gare nitre ie ni kukwe ñaka ruin yei köböire kukwe kwin tä nemen kwetre. Ni gwi ye ñaka törbai kukwe mikai gare nitre ie ni kukwe ñaka ruin yebätä angwane, nita nüne medente tikani täräbätä ye ni raba bien ie o täräkwata ni nübaikäre gätäbätä konkrekasionte ye biandre ie ne kwe niarakwe biandre mräkä kwe ie ni kukwe ñaka ruin yei.

8. ¿Konkrekasion mada ye raba nitre kukwe driekä blite kisebiti dimike ño?

⁸ Konkrekasion keteiti känti nitre blite kisebiti ye rabadre konkrekasion mada blite kukwe madabiti nübaire jabe kä ruäre känti nitre ie ni kukwe ñaka ruin ye känene kä kukwe driekäre ietre yekänti, bati o bobu kä kwatire kwatire te. Nitre ie ni kukwe ñaka ruin känänta ye nuaindre ño ye kräke kukwe nie raba aune bämika raba, konkrekasion känti nitre blite kisebiti tä gätä nuaindre kukwe driekäre ye ngwane. Nitre niken braibe jabätä karo kwatire kwatire te yebe ni kukwe driekä iti blite kisebiti ye juandre. Niaratre ie mapa biandre ne kwe kä medenkänti rikadre nitre ie ni kukwe ñaka ruin känene metrere ye mikakäre gare ietre.

9. ¿Kä känti nitre ie ni kukwe ñaka ruin tä niken yebätä kukwe mikadre gare jai yekäre dre nuain raba?

⁹ Kä känti nitre ie ni kukwe ñaka ruin tä niken jadakakäre o tä ja ükökrö aune niaratre dimikata känti tädre niken yekänti känä raba arato. Nitre kukwe driekä rabadre ja ngwä kite kwin nitre ye känänkäre. Bäri kwin blitadre ni iti o nibu tädre yete ben aune ñaka blitadre ni jökrä kä yekänti ben. Nitre törbadre ni kukwe nuai angwane, nita nüne medente ni raba niere ietre aune niaratre tä nüne medente nikwe ngwandretari ietre.

10. ¿Nitre ie ni kukwe ñaka ruin känä raba ño kä jondron rürübäinkäre yekänti?

¹⁰ Ni raba mapa sribere arato abokänbätä nikwe kä jondron rürübäin käi nemenkä medente ye tikadre aune ni rikadre kä yekänti kä debe näre te. Gasolina rürübäin käi ye ketabe tikadre mapa yebätä. Mapa mada yebätä dänkwä o jondron mada jükata käi, dän bätäte käi, mrö rürübäin käi, hotel, o jondron mada rürübäin käi ye nemenkä medente tika raba arato. Mapa ketare ketare yebätä kä jondron rürübäin käi ye ja erebe tä tikani angwane, nitre kukwe driekä ye rabadre blite kukwe arabebätä nitre yebe ne kwe rabadre kukwe driere bäri kwin. Ñodre, ñokäre nita näin ye nikwe mikadre gare jötrö ngwarbe ni sribikä hotelte yei angwane, ye bitikäre DVD sribebare bätä täräkwata ni nübaikäre gätäbätä konkrekasionte ye driedre ie ne kwe ni sribikä hotelte käkwe biandre nitre ie ni kukwe ñaka ruin yei. Kä jondron rürübäin käi ruäre yekänti, nitre sribikä o nitre jondron kökaka kä yekänti ye tärä blite kisebiti o ñakare ye ni raba ngwentari jerekäbe. Nitre ie ni kukwe ñaka ruin kräke kwela tärä kä yekänti angwane, ni raba tärä sribeta tä DVD yete ye driere mikakäre tärä ükakröta kwetre yekänti.

11. ¿Nitre blite kukwe madabiti känänta ye ñobätä ütiäte kukwe driekäre?

¹¹ Sribi ütiäte. Nitre blite kukwe madabiti känändre ye ñaka nuäre. Ne madakäre, nitre tä nüketa aune nikenta yebätä ñaka raba nemen nuäre kä meden känti kukwe driedre ye ükatekäre täräbätä. Kä keta kabre känti ni blite kukwe madabiti känänta ye käi känti kukwe drieta bäri. Jehová ñaka ni kitete, käkwe kukwe drie ye biani nuaindre nie (Hech. 10:34). “Niara tö ni jökrä diaintari amne, kukwe era metre [...] rabadre gare ni jökräye” (1 Tim. 2:3, 4, Kukwe Kuin Ngöbökwe [WBT]). Ye medenbätä, nikwe sribidre gwairebe Jehovabe aune nikwe ja dimikadre kwärikwäri ne kwe nitre blite kukwe jene jenebiti “töi kuin” ye nikwe känändre (Luc. 8:15, WBT).

[Rekwadro página 5]

Sribidre jabe kwärikwäri

Konkrekasion o nitre braibe tä ja ükökrö blite kukwe madabiti ye törbadre ja dimikamana nitre känänkäre angwane, ni kukwe driekä jie ngwanka rabadre blite nitre umbre konkrekasion bäri no yebe. Bäri kwin blitadre konkrekasion tä bäri no, o nitre blite kukwe madabiti tä nüne bäri kukwe drieta kwetre ye käi känti yebe. Nitre kukwe driekä konkrekasion yekänti ie mikadre, nitre blite kukwe madabiti känänta ye erere kwandre ietre angwane, nitre tä nüne medente aune blite kukwe medenbiti ye niaratre tikadre täräbätä jai, aune biandre kwetre ni kukwe driekä jie ngwanka yei, ne kwe niara käkwe biandre mada konkrekasion o nitre braibe ja ükakrökä tä ribere yei. Nitre kukwe driekä jie ngwanka konkrekasion mada mada te rabadre kukwe ükete konkrekasion jökrä kukwe driekä kä yekänti kräke ne kwe kukwe driedre nitre blite kukwe jene jenebiti ye jökrä ie. Aune niaratre rabadre nitre tö kukwe mikai gare jai ye juen konkrekasion o nitre braibe tä ja ükökrö nitre ye kukweibiti yekänti.

Ne madakäre, ni kukwe driekä yei nitre blite kukwe madabiti (o ni ie ni kukwe ñaka ruin) kwandre aune tö rabadre erametre kukwe mikai gare jai angwane, rabadre jötrö ngwarbe täräkwata Sírvase visitar (S-43-S) yebätä kukwe tike aune bien ni kukwe tikaka konkrekasionte ie. Täräkwata ye köböire nitre ye dimikai jötrö ngwarbe kukwe ja üaire yebiti (km 5/11 pág. 3 mikadre ñärärä).

[Rekwadro página 6]

Nitre blite kukwe madabiti ye känänkäre dre nuaindre

• Ni rabadre ngwentari ni ja tötikaka Bibliabätä, nitre ja mräkäre, sribi muko nikwe yei aune ni mada ie.

• Täräbätä teléfono ükaninte yekänti mä raba nitre blite kukwe madabiti kätä tikani ye känene. Internet, o nitre sribikä teléfono yebätä, yekwe nitre kädekata ño aune tä nüne medente ye ükaninte täräbätä ye raba kwen nie arato.

• Tärä ükakröta käi, obisina gobrankwe, aune kwela nemenkä medente ye ngwantarikäre mäkwe töbika kwin käne.

• Nitre juta madate blite kukwe madabiti tä kukwe ükete nuaindre jai mikata gare periódico yebätä, ye mikadre ñärärä.

• Tienda aune kä mada jondron rürübäinkäre känti nitre blite kukwe yebiti tä niken ye tuadrebiti.

• Kä kärädre ye bitikäre, kä jondron rürübäinkäre, kä ja tötikakäre kwela krite, karo o tren tä nitre ükökrö ngwankäre kä madakänti yekänti tärä mikadrete ne kwe nitre blite kukwe madabiti tä nüke yei jutuadre.

• Kä keta kabre jondron rürübäinkäre mikata täräbätä, o programa sribebare computadora kräke kukwe känänkäre ni jökrä ie Internet yete, ye kukwe ükaninte gobrankwe ñaka ñäkäire angwane kökadre.

[Rekwadro página 7]

Nitre känänta ye ngwane dre niedre

Nikwe blitai töi jämebiti, erametre, aune ñokäre nita näin ye mikai gare nitre ie angwane ñaka rabai töbike blo. Tärä sribebare kukwe madabiti mikadre tuadre käne ye ütiäte krubäte.

Köbö kwin niedre ye bitikäre, nie raba: “Nitre blitaka kukwe ______ känänta nunkwe, kukwe kwin tä ja känenkäre ni kräke nieta Bibliabätä ye kädriekäre ben. ¿Nitre blite kukwe nebiti tärä gare mäi?”.

Nitre ie ni kukwe ñaka ruin känändre ye ngwane, nie raba: “Ñantörö. ¿Ti raba video mike tuare mäi? [Jondron vídeo mikakäre tuare yebiti, mäkwe bersikulo keteiti Bibliabätä sribebare nitre blite kisebiti kräke ye mika tuare.] Bersikulo Bibliabätä ne sribebare nitre blite kisebiti kräke. Video mada ne erere tärä kabre nunkwe, abokän sribebare metrere nitre ie ni kukwe ñaka ruin ye dimikakäre kukwe ja üaire yebiti. ¿Ni ie ni kukwe ñaka ruin o ni ie ni kukwe ñaka ruin kwin aune blite kisebiti tärä gare mäi?”. Nitre ye erere ñaka gare ni gwi yei angwane, bäri kwin kä medenkänti nitre ie ni kukwe ñaka ruin tuabarera kwe ye ngwandretari ie, ñodre sribikänti, kwelate, o tä nüne yekänti.