NITA JA NGWEN ÑO
Sribidre gwairebe kukwe driekäre nitre blite kukwe jene jenebiti ie
Kukwe kwin Gobran Ngöbökwe yebätä ye mikata gare nitre kukweibiti ngwane, niaratre tä kain ngäbiti bäri kwin. Yebätä Pentecostés kä 33 yete, nitre judío “kä jökräbti temen” ie kukwe hebreo o griego ye nämäne nüke gare, akwa Jehovakwe kukwe mikani gare ietre niaratre kukweibiti (Hch 2:5, 8). Kä nengwane, konkrekasion keta kabre blite kukwe jene jenebiti ye tä kukwe driere kä arabe känti. Ja mräkätre tä konkrekasion jene jene yete, ¿ye rabadre dre nuainne ne kwe niaratre ñaka ja di ngwandre ngwarbe kukwe driekäre aune nitre ñaka rabadre töbike blo bätätre?
Blitadre kwin jabe (Pr 15:22): Nitre umbre kukwe drieta jie ngwanka ye rabadre gwairebe kukwe ükete kwin konkrekasion jene jene kräke kukwe driekäre. Ja mräkätre konkrekasion madate blite kukwe madabiti tä kukwe driere käre nitre braibe blite kukwe kwetrebiti ie ngwane, nikwe ñaka kukwe driedre ju yekänti ye rabadre bäri kwin kräketre. Akwa, ja mräkätre ñaka raba kukwe driere gwä gwä kä yekänti ngwane, nitre ye jökrä ie nikwe kukwe driedre ye rabai kwin kräketre. Ni iti törbadre kukwe mikai gare bäri jai ye ngwane ni raba mike gare ietre (od-S pág. 93 párr. 37). O ruäre ngwane, konkrekasion ye raba ja di kärere nie, nitre blite kukwe kwetrebiti ye känänkäre ne kwe niaratre rabadre tike täräbätä jai (km 7/12 pág. 5, recuadro). Ju kwatibe yete, nitre ruäre tä blite kukwe madabiti ye nikwe ngwandre törö jai. Gobrantre tä kukwe ükete ne kwe nikwe ñaka nitre kä aune nünanta medente kwetre ye tikadre täräbätä jai ngwane, nikwe niaratre kukwei mikadre täte.
Sribidre gwairebe (Ef 4:16): Ni umbre kukwe drieta jie ngwanka tä kukwe bien nuaindre nie ye erere ni rabadre nuainne. Kukwe medenbiti blitata konkrekasion nikwe yete yebiti ni iti ñaka blite, ¿akwa yebiti ta nita tötike Bibliabätä? Nikwe kukwe ükaite ne kwe ja mräkä tä blite niara kukweibiti tä konkrekasion madate o nitre braibe tä ja ükökrö yete käkwe niara tötikadre ye ngwane, ni ye raba nirien bäri jötrö kukwe ja üairebiti.
Ja mikadre juto (Pr 15:28; 16:1): Mätä kukwe driere yekänti ni iti blite kukwe madabiti kwandre mäi ngwane, mäkwe ja di ngwan kukwe driere ie. Mä tädre juto yekäre, konkrekasion mäkwe tä kukwe driere yekänti kukwe meden medenbiti nitre blite yebätä mäkwe töbika aune mäkwe Biblia bätä video sribeta kukwe yebiti ye dianka Internet yete jai. Arato, mä raba ja kite köbö kwin niekäre nitre yei kukwe jene jenebiti aplicación JW Language yebiti.