Täräkwata kia yebiti nikwe kukwe kwin ye driedre
1. ¿Juta Jehovakwe kätä kukwe driere ño täräkwata kia yebiti?
1 Mekerabe nükebe kä nengwane, juta Jehovakwe kätä kukwe kwin ye driere täräkwata kia yebiti. Kä 1880 yete, C. T. Russell bätä nitre mada kukwe driekä niarabe käkwe täräkwata kia ye sribebare ne kwe nitre ñäkäkä täräkwata Watch Tower yebätä käkwe dräidre nitre madabiti. Täräkwata kia sribebare ye namani ütiäte krubäte, ye medenbätä ja mräkä Russell käkwe kä 1884 corporación legal sin fines de lucro ükaninte sribi Ngöbökwe nuainkäre bäri ye ngwane, kukwe tract (“täräkwata kia”) ye mikani kukwe kädekata: Zion’s Watch Tower Tract Society ngätäite arato (abokän kä nengwane kädekata Watch Tower Bible and Tract Society of Pennsylvania). Kä 1918 ye ngwane, Nitre ja Tötikaka Bibliabätä käkwe täräkwata kia ye dräibare 300 millones biti bäri. Aune kä nengwane, täräkwata kia ye täbe ütiäte kukwe driekäre.
2. ¿Ñobätä täräkwata kia ye ütiäte krubäte?
2 Ñobätä ütiäte krubäte. Täräkwata kia ye tuäre aune nitre töta nemen ñäkäibätä. Kukwe tikanibätä ye nemen tuin ütiäte nitre ie aune tä kukwe keta kabre mike gare kukwe braibiti. Täräkwata Ni Mikaka Mokre o tärä, ye täte nitre töta nemen bäri täräkwata kia yei ja kräke. Ne madakäre, nitre tä krire kukwe driere aune monsotre kia ye raba kukwe drierebiti. Täräkwata ye chi aune nuäre ngwandre kä jökrä känti.
3. Kukwe kwin namani mäkwe o nitre madakwe kädrieta tärä aune täräkwata sribebarera yebätä abokän tä mike gare täräkwata kia ye ütiäte krubäte mä raba niere.
3 Täräkwata kia ye köböire nitre kwati ie kukwe metre namani gare. Ñodre, meri nünanka Haití ie täräkwata kia ye kwani ji ngrabare, diani kwe kisete aune, ñäkäbarebätä kwe ye bitikäre, niebare kwe: “¡Kukwe ne metre!”. Ye bitikäre, nikani Ju ja Ükarakrö yekänti, ja tötika Bibliabätä kani ngäbiti kwe aune ja känenkäre ja ngökabare ñöte kwe. ¡Ngöbö Kukwei die tä täräkwata kia yebätä köböire kukwe jökrä ne namani bare!
4. Täräkwata kia driedi sö ruäre te ye ngwane, ¿ñokäre nikwe biandre nitre gwi yei?
4 Kukwe drieta ju ju te ye ngwane. Täräkwata kia ye ütiäte krubäte kukwe driekäre, ye medenbätä sö noviembre yete ja känenkäre drie rabai sö ruäre te. Nikwe ñaka täräkwata kia mikadrete jerekäbe, ñakare aune nuaindre metrere blitakäre nitre gwi yebe. Nitre gwi törbadre kukwe mikai gare jai angwane, blitadre kena bentre o tuadrebiti bobukäre ye ngwane, raba ja tötike ño Bibliabätä tärä Dre drieta yebiti o tärä mada mada yebiti ye mikadre gare ietre. ¿Täräkwata kia ye driedre ño? Täräkwata kia keta kabre tä nikwe, yebätä medenbiti nikwe bliai ye nikwe mikadre gare kwin käne jai.
5. ¿Ni tädre kukwe driere ju ju te ye ngwane ni raba täräkwata kia ye driere ño?
5 Täräkwata kia medenbiti nikwe kukwe driedi aune kä meden känti ye ererebätä nikwe blitadre. Kena nikwe täräkwata kia biandre nitre ie. Jondron üai tä kena täräkwata yebätä ye raba nitre töi mike ñäkebätä. Ni raba täräkwata kia keta kabre mike tuare ietre ne kwe niaratre käkwe diandre akwle kati jai. Nita kukwe driere ye käi känti nitre ñaka töta nemen jukwe tikai angwane, nikwe täräkwata kia ye ketadrete kisete ne kwe jutuadre ni gwi yei o ni raba krien jukwe täni ye nikwe ngwandretari ietre, ne kwe tätre töbike ño kukwe yebätä niedre kwetre nie. Kukwe ngwantarita täräkwata kia yebätä angwane, niaratre tä töbike ño kukwe yebätä ye ni raba niemana ietre, o ni raba kukwe mada ngwentari ietre töi mikakäre kukwe mike gare bäri jai aune blita kömikakäre bentre. Kukwe tä mikani täräkwata kia yebätä nikwe ñäkädre keteiti ietre, ne kwe niaratre rabadre kukwe ngwantarita ye mike gare o nikwe nübaidre blite kukwe yebätä. Ni raba ñäke Biblia yete arato texto bäri ütiäte yebätä. Nikwe blitadre ünän ye bitikäre ni raba köbö aune ora ükete jai tuabitikäreta. Ju känti nitre ñaka gwi yekänti konkrekasion kätä tärä o täräkwata mikete angwane, ni raba täräkwata kia ye mikete nitre ye kräke akwa ñaka kämerete tuadre nitre jökrä ie.
6. ¿Ni tädre kukwe driere ji ngrabare ye ngwane ni raba täräkwata kia ye driere ño?
6 Kukwe driedre ji ngrabare ye ngwane. ¿Mä tärä kukwe driere ji ngrabare täräkwata kia yebiti? Nitre nänkä ji ngrabare ye tä näin jötrö ngwarbe aune ñaka töta nemen nünainkä blitakäre nibe, ye medenbätä niaratre töita kukwe mikabätä gare jai o ñakare ye ñan tä nemen gare nie. Bäri kwin nikwe täräkwata kia ye biandre nitre nänkä ji ngrabare yei aune täräkwata Ni Mikaka Mokre mrä nükani ni kisete ye ñaka biandre ietre, ñobätä ñan aune ñäkädibätä kwetre o ñakare ye ñan gare jire nie. Jondron üai tä kena täräkwata yebätä aune tä kukwe keta kabre mike gare kukwe braibiti ye raba niaratre töi mike ñäkebätä kä rabadrete ngwarbe ietre ye ngwane. Niaratre nünandrekä blitakäre nibe angwane, nikwe kukwe tä täräkwata yebätä ye kädriedre bentre.
7. Kukwe driedre kä jökrä känti ye ngwane kukwe drie raba ño täräkwata kia yebiti, abokä kukwe namani bare ruäre kätä bämike ye mä raba niere.
7 Kukwe driedre kä jökrä känti ye ngwane. Kukwe drieta kä jökrä känti ye ngwane tä nemen nuäre kukwe driedre täräkwata kia yebiti. Ja mräkä iti tä gwi ye ngwane tä täräkwata kia ye ruäre mike balite ngwandre jai. Niara tä blite ni ruäre ben, o ni sribikä tiendate yebe angwane, tä täräkwata kia ye bien ie ñäkäkärebätä. Ja mräkätre gure jabe nikani basare juta Nueva York yekänti angwane, nitre juta keta kabre känti tuai kwetre namanina gare ietre yebätä nikanintre täräkwata Naciones aune täräkwata kia sribebare kukwe keta kabrebiti ye ngwena jabe. Nitre namani blite kukwe jene jenebiti niaratre okwäbiti ye ngwane, namanintre täräkwata kia ye bien kati ietre kukwei ye ererebiti, nitre blite kukwe jene jenebiti ye nämene jondron rürübäine ji ngrabare, ja düke parque yekänti o nämene mröre restaurante yete.
8. ¿Ñobätä täräkwata kia ye bämikata nura kwrere?
8 “Nura ye nökö.” Täräkwata kia ye bämikata nura kwrere. Nitre sribikä tirete tätre nura metekä ye ngwane, medente nura ye mu rabi ñaka gare ietre. Ye medenbätä Eclesiastés 11:6 tä niere: “Mäkwe nura nöka dekä aune nememe dere, ñaka ja kise mika nemen kwekebe; medente ririai kwin ye ñaka gare mäi, nete o sete o kä ketebu yekänti raba nirien”. Yebätä, täräkwata kia ütiäte krubäte tä “kukwe mike gare” ye nikwe driedre jankunu (Prov. 15:7).
[Kukwe nieta página 3]
Täräkwata kia ye ütiäte krubäte kukwe driekäre, ye medenbätä sö noviembre yete ja känenkäre drie rabai sö ruäre te.